ACEH_03378

JUZ 29 AL-MA'ARIJ (70)
Meunyo buet nyang got sit jipeulikot
Di jih peuturot napsu seurakah
18. Dumna areuta ka jipeusapat
Jikeubah got that han jinapakah
19. Tuhan Neupeujeuet manusia nyoe
Malam ngon uroe sabe geulisah
20. 'Oh teuka nyang brok susah jih that-that
21. Meu teuka nyang got kriet jih sileupah
22. Meulengkan ureueng nyang na seumbahyang
23. Sabe seumbahyang han tom geukeubah
24. Bak atra gopnyan hak cit ka teuntee
25. Ureueng meulakee nyang tan napakah
Got nyang gasien that hana meulakee
26. Jipateh teuntee lom peue geupeugah
Jipateh bit na uroe kiamat
27. Lom pih keu azeub yo jih that leupah
28. Jiteupue keubit azeub Po jih nyan
Han ek jih aman droejih jipeuglah
29. Meunan pih ureueng jaga meunalee
30. Meulengkan teuntee inong jih nyang sah
Atawa namiet nyang milek droejih
Meunyo nyan di jih han jeut keu salah
31. Meunyo ngon laen nyan salah raya
32. Amanah teuma han tom jiubah
Meunan pih han tom meuiseuk janji
33. Lom jiek saksi ade sileupah
34. Lom seumbahyang jih that jiplihara
Bek na nyang cupa meubacut salah
35. Nyan keuh ureueng nyan asoe churuga
Neupeumulia geuh that le Allah
36. Peue dum si kaphe jijak bak gata
Peunteng that haba mehmoh jih leupah
37. Rot uneun rot wie meutumpok-tumpok
38. Meuh'eut jih geujok churuga indah
Bak geupeutamong jih lam churuga
Nikmat churuga hanaban peugah