IV. Inkesta Soziolinguistikoa. 2006 - Euskara - Euskadi.net

IVInkesta(EAE)EUSK.qxd 3/7/08 16:26 Página 50
50
EUSKAL AUTONOMIA ERKIDEGOA
IV. INKESTA SOZIOLINGUISTIKOA
4.3. EUSKARAREN ERABILERA ELEBIDUNEN ARTEAN
Orain arte aztertutako emaitzen arabera esan dezakegu azken 15 urteotan, oro
har, hau da, gizarte osoa kontuan hartuta, euskararen erabilerak aurrera egin
duela neurri batean ala bestean: gero eta lagun gehiagok erabiltzen du euskara
EAEn.
Erabileraren hazkunde hori, gainera, ez da eremu edo jarduera jakin batean edo
batzuetan bakarrik gertatzen ari, gizarte-bizitza osoan baizik. Egia da, halere, euskara
erabiltzeko baldintza egokiak behar direla, eta horiek oraindik EAEko esparru
eta gune gutxitan ematen direla.
Gero eta lagun gehiagok daki euskaraz eta, horren arabera, esan bezala, gero eta
gehiagok erabiltzen du euskara. Baina, gaur egun elebidunen artean euskara erabiltzen
dutenen proportzioa lehen erabiltzen zutenena baino handiagoa ala txikiagoa
da? Galdera horri erantzuten eta zergatiak argitzen ahaleginduko gara
jarraian.
Hasteko, unibertsoa mugatuko dugu. EAEko 16 urtetik gorako elebidunak 557.600
dira, unibertso osoaren %30,1. Horietako %31,8 euskal elebidunak dira, %28,4
elebidun orekatuak eta %39,7 erdal elebidunak. Adinari dagokionez, elebidunen
%43,4 gazteak dira (35 urte baino gutxiago dituzte), %38,9 helduak dira (35 eta
64 urte) eta %17,7 zaharrak (>65 urte). Eta lehen hizkuntzari dagokionez, erdia
baino gehiago (%56,5) euskaldun zaharrak dira, %11,6 jatorrizko elebidunak eta
%31,9 euskaldun berriak. Beraz, hiru elebidunetatik bik etxean jaso dute euskara
eta ia herenak eskolan edo euskaltegian ikasi du euskara.
Elebidunen %61,2k euskara gaztelania beste (%19,6) edo gehiago (%41,6) erabiltzen
du, %24,1ek euskara erabiltzen du, baina gaztelania baino gutxiago, eta
%14,7k ez du euskararik erabiltzen.