Ons Erfenis - Die Gereformeerde Kerke in Suid-Afrika

Tema: Ons Erfenis
Hierdie verhouding genade-geloof word byvoorbeeld
skeefgetrek in die gevoelsgodsdiens. Dat ons alleen uit
genade gered word en dit alleen deur die leë hand van
die geloof ontvang word, is vertroebel in die oordrewe
gevoelsliedere wat in die negentiende eeu as gesange
opgeneem is. Die Gereformeerdes het toe die veiliger
weg gekies om net berymde Psalms (sowel as ander
berymde Skrifgedeeltes) te sing. Dit was ’n veiliger weg,
maar die stryd moes eintlik gegaan het oor liedere met
’n Skrifgetroue inhoud.
Dit gaan egter nie net oor die verlossing van die mens in
die Bybel nie. In die gereformeerde teologie is daar ’n
heilsame uitbreiding van visie in sy teologie van:
Die koninkryk van God
Die koninkryk van God moet gesien word as die wesenlike
inhoud, die kern en die doel van die ganse geskiedenis.
Die boodskap van die koninkryk staan sentraal in die
Bybelse verkondiging. Daarom moet die koninkryk van
God ’n sentrale plek inneem in die gereformeerde teologie.
Die teologie handel oor méér as die verlossing van
die mens en die kerk – die kosmos kom ook in die gesigsveld.
Teologie moet beoefen word in verantwoordelikheid
teenoor die kerk én die wêreld.
26 • Die Kerkblad September 2006 •
Die koms van die koninkryk, soos die Bybel dit verkondig,
is gerig op die voleinding; ’n nuwe hemel en ’n nuwe
aarde waarop geregtigheid woon (2 Pet 3:13). Ons lewe
in spanning tussen die reeds en die nog-nie: die reeds
van die vervulling in Jesus Christus en die nog-nie van
die voleinding wat nog moet aanbreek. In dié geval praat
die Bybel van ’n lewende hoop. Ons lewe nou nog in ’n
gebroke werklikheid, maar ons het ’n lewende hoop dat
God alles tot ’n heerlike voleinding sal bring.
Dit is belangrik vir ons roeping as gelowiges. Ons kan nie
die koninkryk in sy heerlikheid laat aanbreek nie, maar
ons mag koninkrykswerk doen met hoop! Ons roeping is
omvattend, dit gaan oor kerk en samelewing, ja, dit is
selfs wêreldwyd!
Ons het ook ’n roeping teenoor die skepping van God.
Paulus sien die skepping ook in hierdie spanning tussen
die reeds en die nog-nie. Die skepping sien reikhalsend
daarna uit dat God sal bekend maak dat Hy ons as sy
kinders aangeneem het. Dan word ook die skepping vry
(Rom 8:19-23)! Ons is saam met die skepping op weg,
op pad … totdat God alles voleindig en Hy alles sal wees
vir almal en alles (1 Kor 15:28)!
Aan Hom alleen die eer! •