2009 Finansiële Jaar - Overberg Agri

Doelwit en Strategie
Die doelwit van die Overberg Agri Groep is die handhawing van ’n volhoubare en gefokusde besigheid om welvaart te skep
tot voordeel van aandeelhouers en ander belangegroepe.
Die strewe na ’n volhoubare en welvarende maatskappy word vergestalt deur die gefokusde maatskappystruktuur wat bestaan
uit ’n landbou-gefokusde maatskappy asook ’n groepering van beleggingsondersteunende maatskappye. Die filosofie agter
die maatskappystruktuur is om fokus te bewerkstellig op volhoubaarheid, om spesifiek ’n rol te speel in die volhoubaarheid
van landboukliënte en om besighede te bedryf waardeur welvaart gebou word vir die maatskappy, sy aandeelhouers en die
betrokke belanghebbendes.
Direksie
Die toepassing van goeie korporatiewe bestuursbeginsels en die effektiewe beheer en bestuur van die Groep is primêr die
Direksie se verantwoordelikheid. Die Direksie is verbind tot die behoorlike nakoming van sy pligte en verantwoordelikhede
soos uiteengesit in wetgewing en die maatskappy se Statute en poog deurentyd om nie bloot die minimum voorskrifte in
hierdie verband na te kom nie, maar om goeie korporatiewe burgerskap na te streef in alle opsigte. Hierdie primêre doelwitte
en die nakoming daarvan word deurlopend geëvalueer aan die hand van die verwagtinge van alle belanghebbendes van die
maatskappy en die Direksie is daadwerklik verbind tot die nakoming van etiese waardes en norme ten opsigte van alle aspekte
van die onderneming. Voldoening aan hierdie beginsels word voortdurend geëvalueer en reggestel waar nodig.
Ooreenkomstig die bepalings van die maatskappy se Statute moes die Direksie met die 2008 Algemene Jaarvergadering verminder
van 12 na 10 nie-uitvoerende Direkteure. Die vermindering het toevallig plaasgevind deurdat mnr. Willem Agenbach
tydens die vergadering as Direkteur en Voorsitter van die Direksie uitgetree het en mnr. JG Muller (Direkteur) op 6 Mei 2008
oorlede is.
Die Direksie bestaan dus sedert die Algemene Jaarvergadering, wat op 26 Augustus 2008 plaasgevind het, uit 10 nie-uitvoerende
Direkteure en 4 uitvoerende Direkteure. Die nuutverkose Voorsitter, mnr. Deon de Kock, asook die nuutverkose
Ondervoorsitter, mnr. Douw de Kock, is beide nie-uitvoerende Direkteure.
Komitees vanuit die Direksie- en Bestuursgeledere word gevorm met die spesifieke doel om die Direksie behulpsaam te wees
en by te staan met die uitvoering van sy verantwoordelikhede. Hierdie komitees is die Oudit- en Risikokomitee en die
Vergoeding- en Nominasiekomitee. Drie geskeduleerde vergaderings en een ongeskeduleerde vergadering is gedurende die
jaar deur die Oudit- en Risikokomitee gehou. Die Vergoeding- en Nominasiekomitee het twee keer die afgelope jaar vergader.
Ad hoc-komitees word ook van tyd tot tyd gevestig om fokus op spesifieke aangeleenthede te vestig soos benodig.
Enkele voorbeelde hiervan is ’n Komitee vir die bestuur van Swart Ekonomiese Bemagtiging asook ’n Komitee vir die bestuur
van spesifieke Eiendomsaangeleenthede. Die Swart Ekonomiese Bemagtigingskomitee, wat bestaan uit drie nie-uitvoerende
Direkteure en die Besturende Direkteur, het ten doel om as besprekingsforum te dien vir SEB-aangeleenthede en funksioneer
binne die raamwerk van ’n formele Handves. Die Komitee vir Eiendomsaangeleenthede se primêre doel is om die Direksie
by te staan ten opsigte van vaste eiendomsaangeleenthede en die komitee was veral die afgelope jaar aktief betrokke by die
maatskappy se langtermynonderhoudsbehoeftes en noodsaaklike opgraderings.
Hierdie komitees het geen besluitnemingsmagte nie, maar maak aanbevelings aan die Direksie. Die Voorsitter van die
komitees rapporteer na afloop van elke vergadering aan die Direksie ten opsigte van hulle werksaamhede en aanbevelings.
Elke filiaalmaatskappy beskik sedert Augustus 2007 oor ’n volwaardige Direksie wat binne sekere bemagtigingsriglyne die volle
verantwoordelikheid van ’n Direksie dra. Die Direkteure wat dien op hierdie Direksies word hoofsaaklik aangewys vanuit die
Direkteure wat op die Groep Direksie dien. Ses vergaderings is deur die onderskeie filiaaldireksies gehou gedurende die jaar
onder oorsig. Die filiaaldireksies, wat juis gevestig is om meer fokus op die doelstellings en werksaamhede van die filiaalmaatskappye
te plaas, funksioneer baie effektief en doeltreffend.
9
OVERBERG AGRI BEPERK EN SY FILIALE
KORPORATIEWE BESTUUR