Kanada - Saf

3. Markaðsmál og þróun
3.1. Lykilmarkaðir
Kanada skilgreinir 11 markaði sem sína lykilmarkaði, þar af fimm (Bandaríkin, Frakkland,
Þýskaland, Bretland og Ástralíu) sem kjarnamarkaði og sex sem nýja markaði (Japan, Kína,
S-Kóreu, Mexíkó, Brasilíu og Indland). Langflestir ferðamenn koma frá Bandaríkjunum en
dvöl þeirra er að jafnaði styttri en annarra erlendra ferðamanna.
CTC greinir hvern af 11 mörkuðum sínum sérstaklega (niðurstöður birtar á vef CTC) og gerir
áætlun um hvernig má ná markmiðum um aukna umferð ferðamanna frá hverjum stað fyrir
sig sem byggir á viðamiklum rannsóknum á væntingum gesta á hverjum markaði fyrir sig.
Sérstakir upplýsingavefir eru fyrir hvern markað á vef CTC (www.canada.travel.). Allar
markaðsrannsóknir, útgefnar skýrslur, talnaefni, upplýsingar um markaðsaðgerðir o.fl. sem
vitnað er til að neðan er efni sem er aðgengilegt og öllum opið á vef stofnunarinnar.
Stærsti markaður Kanada eru Bandaríkjamenn í skemmtiferð, þar á eftir koma bandarískir
viðskiptaferðalangar. Heildarfjöldi Bandaríkjamanna sem ferðast til Kanada hefur þó dregist
saman undanfarin ár, sem dæmi voru heimsóknir frá Bandaríkjunum yfir 15 milljónir árið
2004 en þeim hefur fækkað jafnt og þétt síðan þá og árið 2010 var fjöldi heimsókna 11,8
milljónir yfir árið. Á sama tímabili hefur fjöldi annarra erlendra ferðamanna haldist nokkuð
stöðugur, flestir voru þeir árin 2007 og 2008 en þá voru heimsóknir erlendra ferðamanna
annarra en Bandaríkjamanna um 4,4 og 4,5 milljónir. Fjöldi ferðamanna tók snarpa dýfu á
árinu 2009 og fór niður í 3,9 milljónir heimsókna en ferðaþjónustan virðist vera að taka við
sér að nýju miðað við tölur frá síðasta ári þegar 4,1 milljón heimsóknir erlendra ferðamanna
annarra en Bandaríkjamanna eru skráðar (Canadian Tourism Commission - Tourism
Snapshot, 2011, bls. 3).
Tilgangur ferða til Kanada er ólíkur eftir því hvaðan ferðamennirnir koma. Bandaríkjamenn
eru líklegastir til að koma til Kanada í skemmtiferð (55%) en aðrir erlendir ferðamenn eru
jafnlíklegir til að koma í þeim tilgangi að heimsækja ættingja eða vini (36% í hvorum flokki).
Munar þar mestu um Breta, sem eru næstfjölmennasti hópurinn sem kemur til Kanada, en
margir þaðan eiga ættingja í Kanada. Stefnu í markaðsmálum er ætlað að taka tillit til ólíkra
þarfa ferðamanna eftir því hvaðan þeir koma.
22