“Kimia 7-8-9”e-mail - Albas

Libër mësuesi për tekstin “Kimia 7-8-9”
Pyetjet dhe menaxhimi i tyre në një orë mësimi
Kushdo që dëshiron të bëhet një mësues i aftë, duhet pa diskutim të perfeksionohet në
mënyrën e hartimit dhe drejtimit të pyetjeve. Pyetjet gjatë orës së mësimit përbëjnë një nga
mjetet më efikase, sepse thënia: ”Nëse ju përmirësoni me 10 % pyetjet tuaja, produktiviteti
i punës suaj do të përmirësohej me 20 %”, është me vlerë në mësimdhënie.
Me anë të pyetjeve mësuesi motivon, përfshin, nxit të menduarin aktiv dhe kritik të
nxënësve, si dhe përmirëson dukshëm atmosferën në klasë. Që pyetjet të jenë cilësore,
mësuesi duhet të mbajë parasysh: pushtetin që kanë pyetjet, aplikimin e tyre në të tria
fazat e zhvillimit të mësimit (brendësi, analizë, vlerësim), ndihmesën që ato japin për
kapërcimin e pengesave në marrjen e informacionit, si dhe ndërtimi i tyre në forma të
shkurtra për t’u lënë hapësirë nxënësve dhe mendimeve të tyre.
Taksonomia e pyetjeve është një mënyrë e klasifikimit të tyre. Ajo ndihmon për të
krijuar një larmi pyetjesh që përkojnë me nivele të ndryshme të dijes. Gjatë hartimit të
pyetjeve mësuesi duhet të ketë parasysh hierarkinë sipas taksonomisë së pyetjeve.
Zakonisht pyetjet e niveli të ulët, mund të kërkojnë që nxënësi të dallojë metalet nga
jometalet, ndërsa një pyetje e nivelit të lartë do të kërkonte zbatimin e vetive të metaleve
në një reaksion oksido-reduktimi. Të dyja llojet e pyetjeve kanë rëndësinë dhe vlerën
e tyre, por problemi qëndron në atë që asnjë tip pyetjesh, nuk duhet të theksohet më
shumë në kurriz të tjetrit.
Në taksonominë e Blumit përfshihen gjashtë nivele, të cilat duhen pasur parasysh
gjatë hartimit të pyetjeve.
24