15 от 21 апреля 2022 (25927)

№15 (25927)
2022-тӥ ар 21-тӥ оштолэзь 17
Кылбур дунне
Быдӟымнунал
Поэма
Римма РЫЛОВА
«Быдӟымнунал ӝоген вуоз,
Сое возьма быдэс улос.
Юрт котырез утялтоно,
Выж-вӧлдэтэз но миськоно», —
Паска азьын котьку нэнэ
Нылпиослы валэктылэ.
Куинь-ньыль семья люкаськыса,
Кышномуртъёс кенешыса,
Бадӟым ужрад борды кутско,
Валче веме ни ортчыто.
Нырысь огаз коркан тыршо,
Бӧрысь мукет корка выжо.
Валес котыр поттылэмын,
Лымы вылын курткылэмын.
Кудӥз кутске борддор борды,
Ӝужыт муртъёс — вӧлдэт борды,
Укноосты кин ке миське,
Гурмес тӧдьы бура нэнэ.
Пӧсьгес вуэ пень поныса,
Кыз вайёсты керттылыса,
Ӵуж карытозь ик зыраса,
Кышномуртъёс ваньзэ мисько,
Паска азьын утялтӥсько.
Нунал куспын корка выльме,
Лыслэн зыныз котыр вӧлске.
Выж нош кыӵе чиля, пиштэ!
Вӧйын буям кадь адӟиське.
* * *
Выль ӝӧккышет нэнэ вале,
Шторкаосты но ошылэ.
Пужъятылэм ӵушконъёсты
Котькуд укно янакъёсы
Паска азьын ошылӥськом,
Оброс азьмес чеберъяськом.
Кыӵе шулдыр луиз коркан!
Ӝӧк выламы пучы но вань.
Йырын одӥг гинэ малпан:
Ма, ку вуоз Паска нунал?
Тани Пучыарня вуиз.
Кулэмпотон уй но ортчиз.
Ӝытпал нэнэ кукей буяз,
Оброс азе но интыяз.
Изим меда, я ӧм меда?
Вуиз кема возьмам ӵукна!
Гур котырын эли-кеби
Чупрес выре ини нэнӥ.
Зырет пӧзем ни — ӝӧк вылын!
Тачыр ӝуа кӧс пу гурын.
Тани пыжиз огез табань!
Солэсь ческыт я мар бен вань?
Ваньмы ини ми ӝӧк сьӧрын,
Ческыт зынлэсь сайкаллямын.
Дядяй пуке тӧр пуконын —
Солы дано уж оскемын.
Табань пыже ке — вӧяно,
Ческыт зырет но пононо.
Кылдэ ньылод — табань ческыт!
Но дыр ӧвӧл — возьма сандык.
Выль дэремез ни дӥсяно,
Чебер кышет но керттоно.
Коркась корка ни ветлоно,
Тросгес кукей, пе, бичано.
* * *
Косэм ужзэс быдэстӥмы —
Дыр вуэмын ни шудыны.
Курегпузмес питыръяны
Гурезь йылэ тубиськомы.
Татын ини тачак калык!
Ваньзы воштӥськемын яркыт.
Ми кадьёсыз резь бызьыло,
Кукейёссэс питыръяло.
Нош егитъёс лэчырало,
Семён Виноградовлэн «Табань сиён» суредэз.
Круген шудо но кырӟало.
Кукейёсмы но сиемын,
Суй-пыдъёсмы жадьылэмын.
Шунды вылэ тубем бере
Луть-лать бертӥськомы доре.
Ой-ой! Кыӵе сием потэ!
Я, мар меда пыжем нэнэ?
Уть ай, уть! Паймод, ява!
Пыжиськеммы мар мында!
Перепеч, кокрок, шаньга,
Чорыгнянь, шунянь, шекра.
Сӥльын шыд но пӧзьтэмын,
Шукисаль но пуктэмын…
Кыӵе ӟеч милям нэнэ!
Ваньмыз туж ческыт кошке!
Нош шутэтскеммы бере
Нерге ветлон таре кутске.
Вань мӧйыос вӧсясько,
Вӧсь нерге гур кырӟало.
Уйшор вакыт гинэ доре
Туж жадьыса калык бертэ.
Озьы Быдӟымнунал ортче...
Сюресмы Инмарен сётэмын
Аза ЖАГИНА
* * *
Вордӥськем музъеммы,
Вордӥськем шаермы
Инмарен сётэмын,
Асьмелы висъямын.
Та удмурт шаермес,
Та узыр музъеммес
Кылдытӥсь синйылтӥз,
Асьмемыз яратӥз.
Сайка, кылзы, эше,
Ӟеч верам кенешез.
Усьты тон сюлэмдэ,
Ӝут вылэ синъёстэ.
Та мусо шаермес,
Та удмурт музъеммес
Инмармы бурмытоз,
Каргамлэсь мозмытоз.
Та удмурт шаерын,
Быдэс музъем вылын
Христос мед данъяськоз,
Со Эксэй мед луоз.
Шумпотон, яратон,
Утиськон, мозмытскон —
Ваньмыз ик та удмурт
Дуннее вӧлдӥськоз.
* * *
Сазь улэлэ, сэзь улэлэ,
Иисус азьын шулдыръяське.
Шумпотондэс, мылкыдъёстэс
Чик жалятэк кисьтэлэ.
Кырӟаса но бураса,
Эктыса но куаныса
Данъяломе, ушъяломе
Вылысь Быдӟым Инмармес!
Тау карон кылъёсмес
Тон азьын ми вераськом.
Тау, Атай, тау, Иисус,
Тау, Быдӟым Святой Дух!
Мынам сюлмам Иисус пыриз,
Сьӧлыкъёсме Со куштӥз,
Аслаз гажан-жалянэныз
Быронтэм улон сётӥз.
Иисус Христослэн дэлетэз,
Атайлэн яратонэз,
Святой Духлэн но герӟетэз
Асьме пушкын мед луоз!
* * *
Яратон со, яратон со,
Яратон со — быронтэм,
Пӧсь шундылэн шунытэз кадь,
Сюлмысь ноку потонтэм.
Инмарлэн нимыз Яратон,
Солэн кылыз паймымон.
Кулэмысь но со улӟытэ,
Ваньмес одӥг кадь яратэ.
Вае, вае данъяломе
Асьмелэсь Кылдытӥсьмес.
Удмурт кылын кырӟаломе
Солы шулдыр кырӟанмес.
Яратон со, яратон со,
Яратон со — быронтэм,
Инмарлэн со яратонэз,
Даурлы люкиськонтэм.
Кырӟаса лэзём али но,
Вераса лэзём али,
Инмарен сётэм музъеммес
Туж сӥлы каром али.
Яратон со, яратон со,
Яратон со — быронтэм,
Инмарлэн гажан-жалянэз
Даурлы люкиськонтэм.
* * *
Кызьы ортчиз меда улон сюресэд?
Вал, дыр, котькыӵе но уродэз но ӟечез,
Кельты ваньзэ сое, вунэт уродзэ,
Оскыса ӟечезлы, вамышты азьлане.
Ортчемзэ-быремзэ чик но эн жаля,
Берыктыны сое уг луы ни — вала,
Кӧня улонэд вань на та дунне вылын,
Кылемзэ сое мед улод чылкыт сюлэмын.
Дунне вылын улонмы туж но вакчи,
Нуналъёсын но аръёсын со мертамын.
Мед быгатомы сое ортчыны валче —
Вань улон сюресмы Инмарен сётэмын.