15 от 21 апреля 2022 (25927)

udmdunne.ru
+7 951 195 37 65
ЛЫДӞИСЬКОН СИГ
№15 (25927)
2022-тӥ ар 21-тӥ оштолэзь 27
ушъя Пурысь Йырез пеньлы
пӧрмытэмез понна! Мынам
визьмы ӧй тырмысал сое вормыны.
Моко, берытскы!
Боко гулбеч пасетӥ потэ.
КУИНЕТӤ СУРЕД
Нюлэс куш. Писпу борды
думемын син выллем пужыен
бубыли. Потэ Моко. Бубылиез
адӟыса, куаляк луэ.
Моко. Синмо, мар палёмид
шорам? Мынам номыри ӧвӧл
тыныд сётыны, визьмы гинэ
но кытчы ке пегӟем.
Чебери. Тон монэ уд-а сиы,
кык пыдо чонари?
Моко. Чонари, пе. Мынам
нимы Моко, мон коркатэм
коркакузё.
Чебери. Нош мон — Чебери.
Адӟиськод-а, кыӵе чебересь
бурдъёсы?
Моко. Нош малы тыныд
сомында синъёс?
Чебери. Пӧетлы, тушмонъёсме
кышкатыны.
Моко. Думылэм киоспыдъёс
но пӧет-а?
Чебери. Ой, тонэ адӟыса,
воксё вунэтӥськем чонари вотэсэ
канжаськемме. Но мон
шумпотӥсько татчы сюремелы.
Мукет дыръя кин сомында
саклык висъясал ай?
Моко. Мон ӧй вала:
юрттоно-а тыныд мозмытскыны
яке, чебереныд ушъяськыса,
думетын пукод-а?
Чонари учкыса уз улы чильквальк
пиштэмед шоры.
Чебери. Ой-ой-ой, мозмыты
монэ та путэтысь, кышкасьтэм
герой!
Моко (бубылиез мозмытыса).
Мон — герой? Серекъяськод
шат? Верай ке малы
гуртысь пегӟемме, шорам учкемед
но уз поты. Юнме шат
Боко пӧрмостэм шуэ монэ.
Чебери. Котьма медло,
нош мон понна тон — герой.
Жаль, улон сэрег ӵектэме уг
луы. Мон — эрико бубыли!
Улон интые туннэ — таиз сяська,
ӵуказе — мукетыз. Отын ик
мон понна валес валемын, ческыт
мӧлен ӝӧк вӧлдэмын.
Моко. Нош лымы усиз ке,
кытчы пырод?
Чебери. Писпу сул вискы
пыро но тулысозь ческыт уммен
изё. Тон, Моко, ачид сярысь
сюлмаськы: кезьытскиз
ке, кытчы кариськод?
Моко. Уг тодӥськы. Нош,
визь люкатэк, гуртэ пыдме но
уг лёгы, возьыт Боко азьын.
Чебери. Мон тодӥсько
кинлы вазиськыны — Венялы.
Со тон кадь ик пуштырес. Улыны
гуэз вань бере, визьмыз
но бордаз, дыр. Веня бадӟым
лӥялын улэ, тӥни отчы вамышты.
Моколэн мышкыз ыше гинэ,
нюлэс куше Боко потэ.
Боко. Моко, кытын тон?
Мон та, Боко, тынад эшед!
Чебери (паймыса). Вот таиз
герой ке, герой! Иське, тон
Боко? Ой, кыӵе интересно!
(Котыртӥз ортче.) Туала геройёс
таӵе причёскаен ветло
шат?
Боко. Кыӵе герой мон?
Моко, тӥни кин герой! Шонер
лэсьтӥз, йырсиме ого-пало
ӵышкыса. Ыж йыр мон, визьтэм
— вот кин.
Чебери. Тон но визьтэм?
Паймымон! Огез пуштырес,
мукетыз — ӵышкем йыр, нош
визь кеньырзы кыкназылэн
ӧвӧл.
Боко. Иське, тон Мокоез
адӟылӥд, синмо бубыли?
Чебери. Оло, адӟылӥ. Но
нырысь вера, малы тыныд
Моко кулэ?
Боко. Мон сое обиди,
пӧрмостэм шуи. Соин ик
Моко гуртысь пегӟиз. Нош
тодӥськод-а, кыӵе со амало?
Ассэ, Пурысь Йырез — сисьгубиослэсь
эксэйзэс — пӧяны
быгатӥз.
Чебери. Кызьы, пе, уд
тоды сыӵе героез? Со монэ
чонарилэсь утиз. Веня доры
мынӥз Моко. Ойдо сюрес
возьмато.
Боко но Чебери ышо. Сцена
вылэ мыд-мыд палась пото
Моко но Веня. Ӵушъяллэн тыбыраз
ӝуй ныпъямын.
Веня (Мокоез зынъя). Мар
люкетыса сылӥськод сюрес
вылын? Адӟиськод, мынам
ныпъетэ секыт.
Моко. Тонэ утчасько, венё
йыр. Ойдо юртто. (Венялэсь
ныпъетсэ аслыз басьтэ.) Мынон
сямен бӧтьыртом.
Веня. Мон но уг яратӥськы
супыльтыса сылӥсьёсты. Я,
марлы монэ утчад?
Моко. Мон Моко, коркатэм
коркакузё, визь-кеньырлы дорад
лыктӥ.
Веня. Визь-кеньырлы ке —
кылзо, кеньыр-губилы ке —
сиёнэ мынам кык кӧтлы уз
тырмы, нош толалтэозь кыдёкын
на.
Моко. Тон но толалтэзэ
кӧлыны дасяськиськод-а?
Веня. Бен, куасьмем куаръёс,
ӝуй вортто но, веньёсы улэ
шымырскыса, тулысозь кӧло.
Моко. Мынам веньёсы
ӧвӧл, йырсие но шобырскымон
будымтэ. Гуын улӥсьлы
уг яраськы бере, юнме тыныд
вазиськи.
Веня. Кӧня ке нуналзэ нюлэскын
улӥд ке, оло, тынад но
мугорыд веньёсын шобырскоз.
Моко (кышкатскыса). Кулэ
ӧвӧл мыным веньёс!
Веня. Жаль, таӵе сюлмо
коркакузёез мон гуам лэзьысал,
ӟеч эшъёс луысалмы.
Моко. Эшъяськыны мон уг
быгатӥськы, нырысь визь люкано.
Веня. Малы тыныд со секытэз
нуллыны, юрттӥськыны
сотэк но пӧрмытӥськод. Но сокем
кулэ ке, вазиськы артысь
тыметлэн кузёезлы. Буль-
Бульлэн веднаськон пуртыяз
оломар но пӧзе, оло, визез
но вань. Сюрес кузя азьлань
мынӥд ке, дораз вуод.
Моко сцена сьӧры ыше. Веня
ныпъяськон куспын Боко но Чебери
пото.
Веня. Мо… Мо… Моко, йырад
веньёс кылдӥллям, лэся!
Горд йырсиед но бездэм кӧня
ке дыр куспын. Неужто тонэ
вукузё веднаны вуттӥз?
Боко. Янгышад, Веня. Мон
Боко, Моко эшме утчасько .
Веня. Умойтэм вераськиськод,
Боко. Моколэн нокинэз
ӧвӧл, со эшъяськыны уг
быгаты: визьмы, пе, уг тырмы.
Мон сое вукузё доры келяй.
Боко. Вукузё доры? Мар
дауртӥд, вукузёос но коркакузёос
кемалась дырысен кужыменызы
мертасько — кин кинэ
вормоз. Буль-Буль пӧялоз Мокоез.
Чебери. Ой-ой-ой, кӧттыр
мостэм Буль-Буль мынэсьтым
геройме ляльчилы
пӧрмытоз! Со кемаласен йыр
берыктон суралтэт дася ни,
вань лулозэ аслыз киултэмез
потэ.
Веня. Мар сылӥськод, ойдо
бызим!
Бызьыса кошко.
НЬЫЛЕТӤ СУРЕД
Вукузё, такмакъёс кырӟаса,
бодыен пуртыез сура.
Буль-Буль.
Мынэсьтым пӧрась
тьфу, тьфу!
Удалтӥз, котьмар тон шу.
Веднаськон пурты тӥлед
Возьматоз, мар со сумед.
Суралто огпол, кык пол,
Кисьмалоз ӝуке зол-зол.
Тыметэз соин сюдо,
Вуэныз ваньдэс удо.
Сцена вылэ потэ Моко. Вукузё
доры матэктыса, пельпумаз
чабке.
Моко. Тон-а, мар-а Буль-
Буль луиськод?
Куалектэменыз вукузё интыяз
пуксе.
Буль-Буль. Кин тон сыӵе?
Тонэныд йырин ӧжыт ӧй кисьты
суралтэтме!
Моко. Мон — Моко, коркатэм
коркакузё.
Буль-Буль. Мон нокинэ куное
ӧй ӧтьы, уката ик коркакузёез.
Мон та тыметын кузё, эн
ветлы зынъяськыса.
Моко. Зынъяськытэк но
ныр чатырске. Мар дармантӥськод,
Буль-Буль?
Буль-Буль. Тыметын уясь
вань жагез, турынэз, вубуртчинэз
огазе люкай но куасьтыса
изӥ. Эбек дылькен но
вуэн сураса, табере тани ӝук
пӧзьтӥсько. Киосы ик жадизы
ни, уен-нуналэн ужаса.
Моко (ымзэ кырыжъяса).
Кинэ сюдыны малпаськод та
ческыт сиёнэныд?
Буль-Буль. Ымдэ эн усья,
тон понна такем кема ӧй
курадӟы. Сыл ай, сыл, нош тыныд
мар кулэ луиз мынэсьтым?
Моко. Визьлы лыктӥ дорад.
Пуртыяд, оло, кеньыр
пӧзе? Мыным но кӧнязэ ке
сётод-а?
Буль-Буль (Мокоез котыр
ласянь бергатыса). Нош малы
тыныд со кулэ?
Моко. Визь-кеньыр люкай
ке, гуртэ берто, зэмос коркакузё
луо. Веняен но, Чебериен
но эшъяськыны быгато. Соку
Боко монэным данъяськоз.
Буль-Буль. Кельшиськод
тон мыным. (Палэнэгес кариськыса.)
Хе-хе-хе, визьтэм, иське?
Туж умой, тон ик мыным
кулэ, визьтэм коркакузё, сьӧд
ужъёсме быдэсъяны юрттод.
(Моколы вазиське.) Ярам, тон
понна визьмо ӝуке жаль ӧвӧл.
Усьты ымдэ.
Кисыысьтыз пу пуньы поттэ
но, суралтэтэз омыртыса,
Моколы мыче. Тымет доры бызьыса
вуо Боко, Веня но Чебери.
Боко. Моко, эн кылзы Буль-
Булез! Со тонэ пӧяны турттэ.
Буль-Буль. Визьмо луэмед
потэ-а?
Моко (Буль-Бульлы вазиськыса).
Зэм ик-а ӝукед мыным
визь пыртоз?
Буль-Буль. Эшшо ке, уг
оскы! Уд тодӥськы шат: кин
трос ӝук сие, со визьмо но
кужмо будэ.
Боко. Моко, вукузё тонэ
пыраклы тыметэ кельтоз!
Чебери. Мон ноку уг адӟы
геройме!
Буль-Буль. Соос юри исам
каро тонэ. Визьмыд ӧз ке луы,
кызьы мылзы потэ, озьы ик
кузёяськозы тонэн. Я, усьты
ымдэ. Боколы ӟеч эш луэмед
потэ-а?
Моко. Эх, мар ке луэм, лу!
(Ӝукез оскалтэ.) Бр-р-р, кыӵе
кӧш. (Собере Вукузёлы вазиське.)
Дан тыныд, Буль-Буль
кузё!
Буль-Буль. Ох, макем ӝог
визьмо луиськод! Кыкетӥ пуньы
— Чебери понна.
Чебери. Моко, мон тонэ
ӝуктэк но, визь пырытэк но
яратӥсько!
Моко (ӝукез сиыса). Мон
дась тон понна ужаны, Буль-
Буль кузё.
Буль-Буль. Визьлюке тон
мынам! Ме, эшшо одӥг пуньы
си, таиз Веняен эшъяськыны
юрттоз.
Веня. Моко, со зын ӝуктэк
но мон дорын котьку кунояны
быгатод!
Моко (ӝукез сиыса). Мар
кароно, Буль-Буль кузё?
Буль-Буль. Ӟечок! Мар кароно
шуиськод-а? Улля та кураськисьёсты!
Моко. Кинъёс тӥ сыӵе?
Палэнске ӝоггес тымет котырысь!
Боко. Моко, сазьтӥськы,
мон ук та, Боко, эшед!
Моко (Боко доры матэктыса).
Мон тонэ уг тодӥськы,
ӵышкем йыр. Нош эшъёсы
мынам ӧвӧл. Кошкы татысь,
окты-калтыостэ но сьӧрад ну.
Боко (Венялы но Чеберилы
вазиськыса). Йырыз пыраклы
берытскемлэсь азьло Мокоез
мозмытоно .
Веня. Мон Буль-Булез веньёсыным
бышкало, Мокоез
сюдыны медаз быгаты.
Чебери. Нош мон Мокоез
тыметысь вуэн пызъё. Со чылкыт
на, вукузёлэсь веднамзэ
гылтоз.
Боко. Моко яратэ эктыны
но кырӟаны. Такмакъёсмес
кырӟай ке, эшъяськеммес тодаз
ваёз.
Веня веньёсыныз вукузёез
тыметэ улля, Чебери Мокоез
вуэн пазя. Боко кырӟа, Мокоез
эктыны кыскаса.
Боко.
Мокоен Боко эшъёс —
Гулбечысь ерпечкаос.
Улонды ке туж мӧзмыт,
Дорады вуом сэрыт.
Буль-Буль. Мар кариськоды,
йыртэмъёс? Али ик палэнске
тымет котырысь!
Моко (сазьтӥськыса). Боко,
тон-а со? Веня, Чебери, тӥ но
татын? Мар вал монэным?
Боко. Буль-Буль тонэ йыр
берыктон ӝукен сюдӥз, пыраклы
дораз кельтыны турттэ
вал. Ярам, дыраз вуимы. (Мокоез
ӟыгыртэ.) Дуно эше тон
мынам!
Веняен Чебери но Мокоез
ӟыгырто.
Моко. Мынам визьмы
ӧвӧл ук, кулэ шат тӥледлы
сыӵе эш?
Боко. Туж-туж кулэ! Визьмыд
тынад кобыен омыртонтэм.
Вождэ эн вай оломар
но зулемысьтым! Ойдо гуртэ
бертом.
Моко. Мон пумит ӧвӧл.
Но нырысь одӥг ужез быдэстоно.
Вождэ эн вай, Буль-
Буль, но пӧраськыны тон уд
быгатӥськы. Йыр берыктон
суралтэттэ музэ кисьто, пырыез
но тыметэ медаз сюры.
Эшъёс, юрттэ мыным!
Ваньзы ӵош пуртыез бекырто.
Буль-Буль. Пӧяд монэ,
Моко, визьтэм улэ аналскид!
Маин табере вуэз ведналом?
Моко. Эн куректы, Буль-
Буль! Чылкыт тымет аслэсьтыд
но кырсь малпанъёстэ
гылтоз.
Боко. Йырыд зол ик ужа,
Моко, нокыӵе ӝук, кеньыр
кулэ ӧвӧл!
Моко. Табере мон валай,
вӧзад эшъёсыд вань ке, тон
трос поллы кужмогес но визьмогес
луиськод. Боко, кыӵе
умой, асьмелэн юртмы вань.
Кылме сётӥсько, мон сое утё,
кузёосмылы но юртто. Мар ке
лэсьтэмлэсь азьло йырме бергато:
кисьтӥськем-а, ӧвӧл-а
кеньырез?
Йырыныз солань-талань
выретэ. Ог-огзы борды ӟыгырскыса,
ваньзы серекъяло.
Пумыз.