15 от 21 апреля 2022 (25927)

№15 (25927)
2022-тӥ ар 21-тӥ оштолэзь 19
Автоледи
Улонын котьмалэн кутсконэз
— сюрес. Оло, кин ке понна
сюрес — со огшоры пурысь
асфальт. Нош мынам сюресэ —
со котьку тунсыко учыр, выль
тодмоос, яркыт тодэ ваёнъёс.
Малы озьы луэ — уг валаськы.
Котькуд нунал мыным мар ке
но выльзэ дася. Адями ӝыны
улонзэ сюрес вылын ортчытэ:
ужаз-а со мынэ, гуртаз-а бертэ,
сюаназ-а дыртэ… Сюрес
вылысен асьмеос пумиськиськом,
люкиськиськом, куддыр
синмаськиськом но. Вож нуны
нырысьсэ сюрес вылэ потэ гуртаз
бертон понна (нылпи ваён
юртысь лэземзы бере), нош
пересь мурт (кулэм мурт) берпумзэ
сюрес вылэ потэ, гуртэныз
люкиськыса. Сюрес вылын
чик юнме ветлӥсьёс ӧвӧл, котькин
кыӵе ке ужен-малпанэн
ураме потэ. Нош ужтэм муртъёс
диван вылын кыллё, дыр.
Кыкетӥ арзэ руль сьӧрын
ветлӥсько ни. Туннэ нуналлы
таӵе малпанэ вуи: шуге-леке
шедем муртлы одно ик юрттоно.
Кылем гужем та учыр вал.
Огез ӵош дышетскем эше Иж
сьӧрын улэ. Ӵапак нырысьсэ
анай луыны дасяське. Нылпи
ваён дырыз но матэктэ ни.
Пичиеныз нылпиеным урамын
шудыкумы, Люда мыным
жингыртӥз.
— Кӧт улы ӵукна дырысен
висе ни. Роддоме нуод-а монэ?
— Ӵукна тырысь?! Мар тон
али но нылпи ваён юртын
ӧвӧл на? — юасько. — Дыр
12 час ни ук!
— Тон ачид шуид вал ук,
нырысьсэ нылпи вайисьёс
кема курадӟо.
— Тыныд ӵукна ик мыноно
ни вал. Малы «скороез» уд
ӧтиськы?
— Соослэн монтэк но трос
ужзы. Таксиен мынэме уг
поты, эшшо пиналы таксиын
потыны ёрмиз ке, нашталод
отын ваньзэ, — вераз эше.
Мон таӵе кылъёслэсь куалектӥ.
Пичи нуныме машинае
пуктӥ но эше доры
ширтӥ. Ӝыны час но ӧз ортчы,
мон отын ни вал. Ӝоген
Иже вуим. 5-тӥ нылпи ваён
юрт доры ӧжыт гинэ ӧм вуэ,
машинае тӥяськиз. Эше,
вӧсезлы чидатэк, ӝуштэ ни.
Эмъюртозь пыдын мыноно
луимы. Огаз киям — кык
аресъем нылпие, мукет киям
— эшелэн дӥськутъёсыныз
кык пакетъёс. Огзэ пакетсэ
ачиз нуиз. Вуим. Людаез эмчиос
кие кельтыса, машинае
доры дыртӥ. Мар кароно табере?
Кузпалэлы жингыртӥ.
Телефонэн вераськемме вӧзам
сылӥсь таксист кылэм но,
юрттыны куриськиз. «Ярам, —
шуисько. — Юрттэлэ». Час пала
бугыръяськиз но машинаме
тупатӥз.
— Автосервисэ туннэ ик
мынэ, — дэмлаз воргорон.
— Ӝытазе мыно. Тау юрттэмдылы!
Пиосмурт кошкиз гинэ,
олокытысь кыӵе ке песянай
вуиз.
— Нылы, дорозям уд келя-а?
Автобусэн бертыны коньдонэ
ӧвӧл. Пие эмъяськонние машинаен
вайиз но кельтӥз. Нош
мон коньдон но, пенсионнойме
но, телефонме но кутыны
вунэтӥськем. Сыӵе ведь йыры
луиз ни, ваньзэ вунэтӥсько.
Пересь кышно аслам песянае
тус потӥз. Пичи мугоро,
суд йырсиё, пурысялэс-чагыр
синмо. Йырысьтыз сяськаё
вож кышетэз но пересь нэнэелэн
кадь. Малы ке но песянаелэн
вань кышетъёсыз вожмытэсь
вал.
— Ярам, келяло, — шуисько.
Пересь кышномурт туж
лякыт сямо, небыт куараё вылэм.
Быдэс сюресэз бӧтьыраса
пукиз.
— Мон терапевт доры
лыктӥ вал, гожтӥськытэк.
Часлэсь ятыр пуки, вити, нош
эмчи нуназе бере кык час но ӧй
вал ай, «сменае быриз» шуыса
кошкиз. Мон пырыса ӧй вутты.
Вир зӥбетлэсь эмъюмъёсы
уг юртто, выльёссэ мед гожтоз
шуыса курыны ӧдъясько вал.
Али но тани йыры пачкатэм
кадь висе…
Сюресмы вакчи вал —
дас вить минут но ӧм мынэ
— вуим. Пересь 9-тӥ январь
урамын улэ вылэм. Но вуэммы
бере со шуак чалмытскиз.
Учкисько но — йырзэ машина
ӧс вадьсы лэзем но кылле.
«Умме усиз-а, мар-а?» — малпасько.
Сайкатыны кутски.
Уг сайка. Мар луиз — уг валаськы.
Сюлэм жугиськемзэ
эскери — туж ляб ке но,
шӧдӥське. Озьыен, луло. «Скорое»
жингыртӥ. Вуизы ӝог.
Эмъяськонние нуизы. Паспортсэ,
полиссэ эскеризы —
ваньмыз сьӧраз вылэм, киысьтыз
пуйыяз.
«Скоройысь» мӧйы пиосмурт
эмчи монэ куриз:
— Тон, нылоке, та адресъя
пыра ай, ӵыжы-выжыезлы
ивор сёт.
— Я, пырало, — вази.
Воргорон песяйлэн паспортысьтыз
адрессэ возьматӥз.
Мон ӵапак со корка
дорын ик вылӥськем. Домофонэ
жингыртӥ. Со куспын
«скорой» кошкиз. Песянайлэн
квартираяз пиез кышноеныз
вылӥллям. Ваньзэ мади но
кошки. Гуртэ бертӥ. Пичи пие
машинаын сор-сор изиз.
* * *
Со учыр бере ӝыны ар
ортчиз ни вал. Тол. Куазь
пелляське. Сюрес вылысь
вань пусъёс лымы улын, уг
адско. Озьы мон, кык сплошной
гожез адӟытэк, пумитам
мынӥсь машинаос азьын
берытски. Сюрес урдсын
сылӥсь ГИБДД машина син
шорам ӧз йӧты. Дугдытӥзы.
Пыдесъёсы ик куалекъяны
кутскизы — табере правоме
басьтозы ук! Озьы ке, мон
ПДД-ез умой тодӥсько, катъёсты
тӥятэк ветлӥсько. Но
инспекторлы табере сое уд
валэкты ни. Тани со дорам
лыктӥз.
— О-о! Тодмо автоледи!
— пиосмурт пальпотыса шорам
учкиз. — Малы ПДД-ез
тӥяськомы?
Инспектор самой со пересь
кышномуртлэн пиез
вал. «Кызьы со монэ, ӝыны
ар ортчыса, тодмаз на?» —
пайми.
— Соку гужем машинадэс
мынамез вадьсы пуктӥллямды,
нош мынам видеокамерае
ужа вал. Машина
номерды но, асьтэос но
видео ям гожтӥськемын.
— Валамон. Кыӵе-мар ни
анайды? — юасько.
— Инсульт вал солэн. Али
кылльыса улэ, уг ветлы ни.
Пиналъёсы сое туж зол ярато,
ялан дораз курисько. Песянайды
висе, нерад эн каре,
шуисько. Уг валало, валесэ но
дораз тубо. Сузэре соин али
улэ, утялтэ. Тӥ ПДД-ез чакласа
ворттылэ. Мон ялан сюрес
вылады уг шедьы, мукетъят
праводэс келялоды. Таӵе куазен
эшшо но сакгес луоно, сюрес
пусъёсты эшшо но умойгес
учконо.
— Ярам, тау, тыршо, — шуисько.
— Сюресты мед удалтоз,
автоледи! — инспектор документъёсме
берен сётӥз.
Правоме ӧз басьтэ.
Калыкын шуо: адями кызьы
ке улэ (кыӵе солэн сямыз),
озьы ик руль сьӧрын
но ассэ возе. Саклыктэм мурт
сюрес вылын но саклыктэм.
Нош руль сьӧрын пукись
муртлэн синмыз ӧрӟилэн
кадь ӟеч луыны кулэ. Сюрес
вылысь но, сюрес урдсысь
но пусъёсты котьку адӟыны
кулэ, котькыӵе куазен.
Льӧль трамвай
Тол. Кати анаеныз трамвай
дугдылонние мыно.
Эмъяськон юртозь быдэс час
пала трамваен мыноно.
— Анай, мон льӧль трамваен
ворттылысал!
— Льӧль трамвайёс уг луо,
нылы.
— Кызьы уг луо? Мон
адӟылӥ ук! Кылем арняе
эмъяськонниысь бертыкумы,
дортӥмы льӧль трамвай
ортчиз.
— Ма, кызьы? Ортчысал
ке, мон но адӟысал ук!
— Мон уг пӧяськиськы! —
Кати ӝожомиз.
Катилы 6 арес. Школае
уг ветлы ай. Анайзэ вань
дӥськут но пыдкук льӧль
буёлозэ басьяны косэ. Со
яратоно буёлэз угось. Соин
солэн котырысьтыз «пичи
дуннеез» быдэсак льӧль:
курткаез но изьыез, пыдкутчанъёсыз,
валес котырез,
гуртысьтыз дӥсь возён шкафез,
великез...
— Ана-а-ай! Ойдо, льӧль
трамваен мыном!
— Шуи ни ук мон тыныд:
льӧль трамвайёс Ижкартӥ уг
ветло. Асьмелэн трамвайёсмы
ӵужо-гордо.
Нош Кати ялан нукыртэ,
«льӧль трамвай но льӧль трамвай».
Анаезлы, Людалы, нылызлэн
вогъяськонэныз йырин
ӧвӧл ай. Малпанъёсыз кыдёкын.
Али туж секыт солы.
Толэзь талэсь азьло, эмъяськонниын
эскериськыкуз, (диспансеризация),
мугораз пыктосэз
вань шуизы. Соку быдэс
дунне солы сьӧдалэс-пурысь
луиз. Малпанъёсыз йыромем,
сураськем ыж уллё кадь, бергало-бергало
но шонер нёжалэ
уг пото. «Мар понна? Кызьы
озьы луиз? Оло мон зол
сьӧлыкаськем? Оло мон кулэ
ӧвӧл ни та дуннеын?»
Эмчиос Людаез кӧня ке арнялы
стационаре эскериськыны
выдыны косӥзы вал. Катизэ
нокинэн кельтыны шуыса,
нылкышно пумит луиз. Табере
эмъяськонние йӧнатӥськыны
но анализъёс лэсьтыны ветлэ.
Кузпалыз вахтаен ужа, быдэс
толэзьёслы гуртысьтыз кошкылэ.
Дас минут пала витемзы
бере кыдёкын трамвай питранъёслэн
такыртэмзы кылӥськиз.
Люда паллян пала
йырзэ берыктӥз но синъёсызлы
ӧз оскы — доразы льӧль
трамвай дыртэ. Сыӵе со лякыт,
гылӟыса кадь лыктэ, зарезьтӥ
уясь корабль кадь адӟиське.
Быдэсак сьӧдалэс-пурысь инбам
улын, сыӵе ик сьӧд курмем
рельсаос вылын — сыӵе чебер
льӧль-льӧль син пӧртмась
маке.
— Мон верай ук, верай ук,
анай! Вань асьмелэн льӧль
трамваймы! — Кати шумпотыса
тэтчаны кутскиз.
Люда трамваез абдраса
учке.
— Анай, ӝоггес! — Кати
китӥз кыскыса сое ӧте.
Трамвае пуксемзы бере
Люда котырак учкиз. Соослэсь
пыремзэс нокин но ӧз
адӟы кадь, нокин но шоразы
ӧз учкы. Кондуктор, билет
басьтыны косон интые, трамваез
мишураен чеберъя. Дугдылонни
бере дугдылонни
ортче, нокин но пырись ӧвӧл
ни. Кондуктор татчыозь шоразы
уг но учкылы, ялан трамваез
чеберъя. Укноосы чилясь
кагазлэсь вандылэм суредъёс
лякылэ. Люда ачиз со доры
лыктӥз но коньдонзэ мычиз.
— Мынам билет сётонэ
тӥяськиз, — вазиз кондуктор.
«Малы нош коньдон сэре ӧз
куты меда?» — паймиз Люда,
но ӧз ни ериськы кышномурт
котыре, интыяз пуксиз.
— Анай, мед нуысал вал та
трамвай асьмеды мукет дуннее,
кытын феяос уло, — шуиз
нылаш.
— Мед вылэм, нылы, —
пальпотӥз Люда. — Куддыр
кулэ, дыр, паймоноезлы-луонтэмезлы
но оскыны.
— Отын, кытын феяос уло,
тон ӧй висьысалыд. Отын нокин
уг висьы. Та волшебной
трамвай, дыр, анай, — Кати
ӟучо-удмурто вераськыны
выре.
— Озьы, дыр, нылы. Ваньмыз
умой луоз, эн сюлмаськы.
— Мон тодӥсько. Асьмеос
волшебной трамваен мынӥськомы
ук!
Пичи ныл ялан зуле но
зуле. Со туж зол шумпотэмын.
Час пала соос мынӥзы но
эм юртэ вуизы. Эмъяськонниын
Людалы веразы, вань анализъёсыз
умоесь шуыса. Онкомаркёръёс
нокыӵе пыктосэз
уг возьмато ни. Люда понна
котырысь дунне нош ик яркыт
буёло, чебер луиз.
Асьмелэн ӟечезлы осконмы
льӧль трамвай кадь. Юн
ке осконэд, со тонэ ширтыса,
питранъёсыныз кужмо такыртыса,
шудо азьлане нуоз.
Осконэд ӧвӧл ке, сьӧдалэспурысь
инбам улэ ик кылёд.
2014-тӥ арын Выль ар
азьын Ижкартӥ, зэмзэ но,
льӧль трамвай ветлӥз.
________
Наталья ВАРЛАМОВА.
Ижкар