15 от 21 апреля 2022 (25927)

udmdunne.ru
+7 951 195 37 65
Лэсьтӥськон
ГУРТ УЛОН
№15 (25927)
2022-тӥ ар 21-тӥ оштолэзь 5
Клубез выльдон иназ луиз
Пичи Пурга ёросысь Учаысь культура юртлэн кивалтӥсез Татьяна Мокеева:
клубез тупатъян гужем йылпумъяськыны кулэ.
Туспуктӥз Максим ЕГОРОВ
Пичи Пурга ёросысь
Учаысь культурая юртлы
42 ар ни. Сое 3-тӥ арзэ
пичиен-пичиен тупатъяло.
2000-тӥ аръёсы культурая
юртэ пырон йӧныз ик ӧй вал
ни: липетэз сисьмемен, котыр
зор-кот виялляз. Борддоръёсыз
шоры ик учкыны шимес
йӧтылӥз, шуо гуртоос.
— Клубе мон ӵапак 22 ар
талэсь азьвыл лыктӥ, — вера
культурая юртлэн кивалтӥсез
Татьяна Мокеева. — Юрт куашкан
калэ вуэмын ни вал.
Асьме ужасьёсын тупатъяны-утялтыны
вырылӥм. Но
кемалы ӧз тырмылы. Мылкыд
ик куашкалляз. Весь
ӝожтӥськемысьтымы, 10 ар
талэсь азьло клубмылэсь липетсэ
воштӥзы ик вал. Нош
2018-тӥ арын ёросэнымы
кивалтыны кутскиз Сергей
Юрин. Огпол Учае лыктэм, специалистъёсыныз
ӵош ужаммес
адӟизы, ремонт лэсьтом,
шуизы. «Пичи Дорлэн лулчеберетэз»
проектъя укноосмес,
ӧсъёсмес со аре ик вошъязы.
Отӥяз липетсэ нош выльдӥзы
на. Кылем арын шуныт сётӥсь
выль гумыос пуктылӥзы. Таин
валче сцена вылэ линолеум но
вӧлдӥзы, туэ залысь борддорзэ,
вӧлдэтсэ буяськом. Выж но
мукет лэсьтозы, шуо, пуконъёсты
но воштозы.
Тупатъян гужемозь йылпумъяськыны
кулэ. Оглом
выльдӥськон 3 миллион манет
тыр усиз ни, туэ эшшо
1 миллион манет висъямын.
Быдэс гуртэн вуэмзэ возьмало.
Культурая юртысь калык
уг бырылы, ремонт шоры учкытэк,
репетициос, шудонъёс,
ужрадъёс ортчыло. Шыпытлы
татын чик но дышемын ӧвӧл:
весь юр-яр каро. Кружокъёссы
гинэ 17. Отчы пичиез но,
бадӟымез но пыриське. Нош
клубын ужасьёс 3 но ӝыны
сяна ӧвӧл, шуыны луоз.
— Сомында кузя гинэ ужаны
секыт ик, но кружокъёсты
кулэстыны уг лэзё, — веранзэ
азьланьтэ Татьяна Мокеева. —
Асьмелэн аккомпаниатормы
ӧвӧл бере, садикысь крезьгуръя
дышетӥсез ӧтчаськомы,
со ми дорын ӝыны ставкалы
ужа. Но со флейталы дышетскемын.
Калык арганчиез
куре бере, кылем сӥзьылысен
ӧтчаськомы Эдэйгуртысь Антонова
Катяпаез. Первой 2-3
мурт гинэ дораз гожтӥське
вал, нош табере чотаса уд быдты.
Катяпай арняяз 2 пол ми
доры ветлыны жаде ни, дыр.
Одӥг лыктэмен, лумбыт 7 час
ӵукнаысен 8 час ӝытозь ужа.
Пиналъёслэн но, арлыдоослэн
но кырӟаны-эктыны мылкыд
вань бере, кызьы уд шуды, шуэ.
Клубын ужасьёс школаен
но, нылпи садэн но кусып
возё. Соин ик праздникъёслы
концерт пуктонэ, ужрадъёсы
нылпиос, дышетӥсьёс
ӵемысь пырисько. Пӧлазы
чебер кырӟасьёс но вань. 3-тӥ
арзэ ни мыло-кыдо кырӟа
дышетӥсьёслэн ансамбльзы.
Бере уг кылё арлыдоослэн но
коллективъёссы. Пересьмон,
висён шоры уг учко — ӵемысь
люкаськыло.
— Клубмы 300 интылы чакламын
вал ке, пукон тырмытэк,
концертъёс дыръя сылӥсез
но трос вал, — шарая Татьяна
Владимировна. — Али сюлэм
шуг: ремонт бере 200 пукон
гинэ на луоз — сомындалы уксё
кылемын на. Эшшо ӧжытгес
калык тэроз. Оло, кытысь ке
уксё сюроз на. Учаын гинэ
1 сюрс пала улӥсез. Артысь
5 гуртъёсты но лыдъяно ке,
1 сюрс 700 кузя луиськомы. Али
ик ужрад возьмало ни. Артистъёсмы
но сценалэсь мӧзмо.
Берло 5 арзэ егитъёс культурая
юртэ пырамысь воксё
дугдӥзы ни вал. Дунтэк дискотекаос
но ӧз гочатылэ. Крезьгур
шудэ, нош пинал калык
урамын люкаськыса сылэ.
Ужрадъёс но соослы нокыӵе
ӧз потылэ. Усьтыны ик клубез
толыкез ӧй вал. Оло поколение
воштӥськиз, оло клубез
выльдэм иназ луиз.
— Али юр-яр каро, — шуэ
кивалтӥсь. — Сюлэм ик шумпотэ.
9-тӥ-11-тӥ классъёс
клубе тужгес курисько. Огогенызы
вераськыса пуко,
экто. Теннисэн шудон ӝӧк котырысь
калык уг бырылы. Тупатъян
ортчиз ке, бильярд ӝӧк
но пуктэммы потэ. Клубмы
арысь аре чебергес луэ но, пиналъёслэн
но лыктэмзы потэ,
милям но ужаммы потэ, выль
коллективъёс но кылдо.
Фермеръёс
Пудо вордон малпанэз быдэсмиз
Глазов ёросысь Понино
гуртысь Татьяна Кунаева
фермер кариськиз,
табере быдэс семьяеныз
пудо вордо.
Татьяна Владимировна
миым 60 арессэ пусйиз.
Но гуртаз тэк пукемез воксё
уг поты. Ужлэсь мылкыд
басьтӥсько, шуэ. Соин ик семьязэ
ӝутказ Гурт удысъя но
сиён-юонъя министерстволэн
«Агростартап» конкурсаз пыриськыны.
Абердин-ангус выжыысь
скал вордон сярысь
проект гожтӥзы но вормизы.
Кунаевъёслы 3,6 миллион манет
тыр грант висъязы.
— Шумпотонмылэн пумыз
ӧй вал, — вера Татьяна Владимировна.
— Гид тыр пудо
вордон сярысь малпанэ быдэсмиз.
Кылем арын ик скал
басьтыны пӧртэм мугъёсъя
ӧм быгатэ, но туэ март пумын
Ярославль кемысь 30 ветыл
вуттыны пӧрмытӥмы. Гуртмылы
ӝог дышизы. Али куазь
шуныт бере, нуназезэ кенерын
возиськомы. Инкуазьын
тазалыксы юнгес луэ, шуизы.
Коть уйлы но кельты — пыд
улазы куро трос валимы но, уг
кынмо.
Нылкышно быдэс улонзэ
пудо вордонын ужамын,
совхозын, отӥяз фермеръёс
дӥньын тыршиз. Табере аслаз
хозяйствоез кылдӥз. Сӥльлы
пудо будэтэмез потэ. Азьланяз
мылкыдыз вань полуфабрикатъёс
но лэсьтыны. Берло
дыре кунян сӥль юасьёс
йылӥзы угось. Кооперативе
огазеяськисьёс но арысь аре
тросгес луо. Шаерамы али
сӥльлы ярась пудоос 3 сюрс
339 йыр ни, миым сярысь, со
504-лы уногес.
Нялтас вераса, Понино
гурт котырын 2010-тӥ
аръёсы совхоззы куашказ.
Со бервылын табере фермеръёс
кылдо. Ёрос администрациысь
гурт удысэз
азинтонъя управлениен кивалтӥсь
Галина Суслопарова
ивортэмъя, али татын 6
фермеръёс ужало. Соос ик
гуртэз возьыны выро, «Милям
кичӧлтонмы» конкурсэ
проектъёсынызы пырисько,
соцобъектъёс ӝутыны коньдонзэс
висъяло.
Бамез дасяз Елена САРАМАТОВА