Reoim - OEI

LIBERANDO INCÓGNITAS
Hoxe hai unha importante reunión. A Raiña ten convocado ao comité de liberación e hai moita
expectación. Dende que dirixe o país, a Raíña leva feitos moitos cambios, non sempre ben
recibidos polos que antes tiñan o poder, que protestan: "Onde se viu un país coma este!, xa
non hai exército, hai comité de liberación de incógnitas!". E ameazan: "Temos que volver ao
de sempre, hai que derrocar a Raíña, non podemos perder incógnitas e caer nas mans dos
atrapadores de incógnitas".
As incógnitas son elementos moi importantes do país. Están gardadas con vixilancia especial.
Serven para resolver problemas. Nunca se sabe o que pode agochar unha incógnita, só cando
o problema está resolto libérase a incógnita descubríndose o seu valor. A incógnita máis
famosa é X, pero tamén hai Y, Z, a, b, c e outras raras que só se utilizan en certas ocasións.
Así de enrarecido está o ambiente. E aínda non saben o motivo polo que a Raíña ten
convocado ao comité de liberación!
Silencio, fala a Raíña:
"Meus queridos amigos e amigas, membros do comité de liberación: os atrapadores de
incógnitas queren poñernos a proba, esta é a mensaxe que acabo de recibir:
Onte procedemos a atrapar unha incógnita, témola retida seguindo o
procedemento habitual. Calquera intento de rescate pode dar lugar a que a
incógnita se precipite na cova das serpes e desapareza para sempre.
Anunciamos que a nosa intención é a de atrapar tódalas incógnitas que
podamos do voso país para así estar en condicións de resolver por nós
mesmos os problemas e ter o dominio. (Atrapadores de incógnitas)
Ante isto, queridos amigos e amigas, propóñovos actuar con sixilo e intelixencia. Tentaremos
rescatar a incógnita atrapada. Trátase de X. O primeiro é saber onde e como se atopa.
Enviarei especialistas a analizar a situación e mañá de novo reunirémonos para peparar o
rescate".
Esa noite un comando de especialistas obtivo imaxes de X. Efectivamente, estaba sobre a
cova das serpes, vixiada por sete guerreiros, dous ao seu carón e cinco enfronte. Todos en
equilibrio sobre a cova das serpes.