RAPPORT DA GESTIUN 2010

Kick off «scola en moviment», settember 2010
demissiunau suenter otg onns sco gerau dil scolaresser.
Siu grond engaschi e sia profunda enconuschien -
tscha han formau marcantamein il svilup dalla scola
populara.
Novaziuns
Dapi igl onn da scola 2010/11 entscheiva l’instrucziun
da tudestg gia ella tiarza classa (pli baul quarta classa).
Sco emprem vegnan ils scolars instrui en in lungatg
cantunal (romontsch). Plinavon eis ei vegniu decidiu
d’introducir engles naven dalla tschunavla classa (per
l’emprema gada igl onn da scola 2012/13). Ils dus
scolasts primars Michel Andriuet e Gion Tenner ein
vidlunder da far la scolaziun d’engles.
Suenter l’evaluaziun digl inspectorat da scola il matg
2009 havein nus decidiu d’introducir la hospitaziun
vicendeivla. Igl atun 2010 han ils scolasts entschiet a
visitar singulas lecziuns da collegas. Quella collaboraziun
en gruppas da treis possibilitescha sin basa dallas
observaziuns e las interpretaziuns da talas da far ina
reflexiun professiunala digl agen instruir, da tschentar
finamiras e da controllar la realisaziun da quellas.
La primavera havein nus astgau empruar ora pults
da differents fabricants per il scalem superiur. Suenter
quella evaluaziun havein nus cumprau 20 novs pults
singuls che adempleschan tuttas pretensiuns che ve -
gnan dumandadas da mobilias da scola modernas.
Plinavon havein nus midau tier ils restonts 100 pults il
plat-meisa. Igl onn vegnent lessen nus far semegliontas
midadas ella scola primara.
Dapi igl october 2010 dat ei ella Cadi in project
«sustegn da far pensums» per scolaras e scolars dalla
scola primara. Quei project vegn purtaus dalla fundaziun
«Tür auf – mo vinavon». Ei dat duas sorts da
sustegn da far pensums: 1. Survigilonza d’ina gruppa
da scolars entras ina seniora ni in senior gest suenter
scola en ina stanza da scola. 2. In sustegn singul
entras ina seniora ni in senior che ha liug a casa tiel
scolar ni tier la scolara. Pil mument fan mo paucs
scolars da Mustér diever da quella purschida. Igl ei
previu d’extender il sustegn da far pensums era sil
scalem superiur.
Rapport da gestiun e quen 2010
Excursiuns
Ils 9 da mars ha giu liug in di da skis cun treis differents
cuors pils scolars. In cuors da skis/aissa (trics...),
in cuors da lavinas ed in cuors davart l’infrastructura
dallas pendicularas da Mustér. Il matg/zercladur 2010
ha giu liug in’excursiun, nua ch’ils scolars dil scalem
superiur han visitau igl implont atomar da Beznau.
Empau pli tard han els visitau la centrala per la producziun
d’electricitad a Sedrun.
Ils 8 da settember ha giu liug il secund di da formaziun
grischun cun 1800 scolastas e scolasts digl entir
Cantun. Era ils scolasts dil scalem superiur ein separ -
ticipai. Tgei ston ils affons e giuvenils dalla scola populara
emprender per pli tard haver success en nossa
societad? Representants dall’economia, dalla baselgia,
dil sport, dalla scienzia, dalla politica, digl art
e dalla famiglia han a moda interessanta presentau
lur pretensiuns. Il suentermiezdi ha il psicolog Jens
Corsen explicau ina metoda fundada per saver
motivar glieud era en situaziuns difficilas. Success
permanent sebasa en emprema lingia sin la midada
necessaria digl agen patertgar che ha directa influenza
sin igl agir en atgna responsabladad.
Ils 28 d’october 2010 ei il cerchel scolastic serendius
a Basilea per visitar la Worlddidac. Quella excursiun ei
era stada ina buna occasiun per rinforzar il spert da
team ed era per emprender d’enconuscher ils pli novs
mieds d’instrucziun.
Viadis
Il viadi da treis dis dall’emprema reala e secundara
ha menau uonn ella Svizra franzosa. L’intenziun ei da
nezegiar quella occurrenza per enfirmir ils ligioms
denter ils scolars e crear ina buna basa sociala per ils
treis onns ch’ils affons passentan communablamein el
scalem superiur. Ensemen cun lur scolasts da classa
han els denter auter visitau la grotta a Réclère ed
il «Préhisto-Parc». Il punct culminont ei segir stau
la spassegiada culs huskies. Visitond il museum
d’Omega a Biel essan nus vegni confruntai culla vart
urbana dalla Romandia e sia industria dad uras.
Naturalmein han ils scolars era empriu entgins plaids
franzos sco «bonjour, Madame/Monsieur, merci beaucoup,
de rien, bonne nuit...».
Viadi d’atun ella Svizra franzosa, settember 2010
13