RAPPORT DA GESTIUN 2010

Rapport da gestiun e quen 2010
client pertucca buca mo la purschida da medias. Nus
lein era esser in liug da sentupada. Per che quei gartegi,
stuein nus adina puspei far attents la populaziun
sin nossa instituziun.
Per quei motiv havein nus lantschau il matg 2010
l’acziun Mustér legia. Mintga meins schein nus plidar
respectivamein leger ina ni pliras persunas. Ils placats
vegnan exponi publicamein e fan aschia ina buna propaganda
per ina buna caussa e quei senza piarder la
fatscha. In grond engraziament a tut quels ch’ein stai a
disposiziun.
Dapi igl october ha liug meinsilmein ina ura da raquintar
Mats. Nossas collaboraturas Rosmarie ed Elvira
arranschan cun ils affons pigns e lur accumpognament
in viadi historic cun la miur Mats. La participaziun
ei gronda ed ils pignets ein incantai.
Ils 12 da november eis ei vegniu raquintau historias,
quei per occasiun digl arranschament Schweizerische
Erzählnacht 2010 cul tema: Igl uaul e sias historias. Ils
affons dalla tiarza e tschunavla classa primara ein serendi
cun lur scolast Michel Andriuet a Sontga Gada,
ina notg cun bia plievgia, denton cun ina buna glisch
dallas candeilas e cun la calira d’in bi fiug.
Ina caussa unica ei l’acziun Panini gest avon l’en -
tschatta dil campiunadi mundial da ballapei stada.
Tons umens e babs ein aunc mai stai sin viseta! Tier
nus san ins pia buca mo empristar medias, mobein
era brattar en quei cass maletgs da Panini. Quella
acziun ha denter auter gidau ad alzar la frequenza dils
emprests da medias. Igl onn 2010 eis ei stau 14 273
visavi 12 774 digl onn precedent, pia in plus da 1499
medias empristadas.
Administraziun
Tut quellas acziuns ed igl entir menaschi quotidian
ein buca pusseivlas senza ina buna administraziun
ed organisaziun. Sut la direcziun dalla menadra,
Christine Bischof, ei il team era uonn s’engaschaus da
camifo. Dapi il matg fa Elvira Deplazes da Sedrun
part dall’equipa. Hans Huonder ha remess per la fin
digl onn 2010 il presidi dalla cumissiun da biblioteca.
Nus engraziein ad el per siu bien sustegn duront
ils dus davos onns. In cordial engraziament va era
allas autoritads communalas per il sustegn finanzial.
Nus cumprein onn per onn medias per rodund
9000 francs. Cheutras ei nossa purschida adina
actuala.
In sguard egl avegnir
Entras la dislocaziun dil legat Condrau egl archiv communal
dat ei dapi plaz. Quel savein nus duvrar fetg
bein. Nus ponderein e calculein co nus savein porscher
a nossa clientella il meglier survetsch pusseivel e
presentar nossas purschidas sin ina moda beinsurveseivla
ed atttractiva. Plinavon lessen nus nezegiar las
novas tecnologias, che tschaffan era las bibliotecas.
Nus essan attentas e selegrein da mintga novaziun ed
oravontut da mintga viseta.
18
Avertura dalla Fortezia Stalusa, december 2010
Activitad culturala
Numerusas uniuns culturalas e sportivas prestan
gronda e buna lavur. Cun lur activitad enriheschan
ellas la veta da mintgadi. Igl onn vargau ei l’Uniun fallun
e cascharia Disla cun ses varga 90 commembers
stada fetg activa. Cun restaurar e reactivar differents
objects sestenta ella da schar reviver in patrimoni
d’usits ed isonzas dil vargau. Ei setracta en special
dalla veglia cascharia, dil fallun, dalla roda mulin e
novissimamein era dil vegl mulin ella casa sut il vitg.
Quels objects fuorman ina biala purschida, p. ex. la
tecnica da smaccar il sem dil glin. L’aua dil dutg da
sogn Leci tonscha strusch per metter la roda mulin ed
il fallun en funcziun. Cun bia lavur cumina mantegnan
ils vischins quels scazis e dattan era la pusseivladad
d’emprender d’enconuscher quei art.
In object che catta gronda attenziun ei la scarsinaria a
Gonda. Ella ei la pli veglia en Svizra, ch’ei aunc en
funcziun.
Menziun speciala mereta era la Ludoteca cun sia vasta
purschida. Ina gruppa da dunnas presta excellenta
lavur e porscha bia deletg a nos affons.
Ina ulteriura attracziun ei l’exposiziun da cristallas el
sutterran dalla halla Cons.
Fortezia Stalusa – in museum militar
L’entschatta december 2010 ei il museum Fortezia
Stalusa vegnius aviarts. La fortezia, erigida igl onn
1967, ei in relict dall’uiara freida. Ussa ha ella piars sia
impurtonza strategica ed ei vegnida serrada avon
diesch onns. La vischnaunca ha acquistau quei stabiliment
per ina summa simbolica ed affittau el alla Uniun
Fortezia Stalusa. Quella ha cun grond anim restaurau
igl object ed endrizzau in museum militar, accessibels
alla publicitad. Ina attracziun speciala ei la collecziun
d’armas ella valeta da rodund in milliun francs. El
decuors dils davos dus onns han ils commembers
e simpatisants dall’uniun prestau da quei da 3600
uras lavur cumina. Cun agid da numerus sponsurs
eis ei stau pusseivel d’acquistar armas che valan sco
ina raritad. A caschun dall’avertura ufficiala han ils
dus exponents, Thomas Hänggi ed Aluis Flepp, pre-