OPVOEDING

10 E.G.White - Opvoeding
GRONDBEGINSELS
11
Aan Adam en Eva is die sorg van die tuin toevertrou, “om dit te bewerk en
te bewaak.” Genesis 2:15. Hoewel hulle ryk was aan alles wat die Eienaar van
die heelal kon voorsien, moes hulle nie ledig wees nie. Nuttige arbeid is as
seën aan hulle opgedra, om die liggaam sterk te maak, die verstand te laat
uitdy en die karakter te ontwikkel.
Die boek van die natuur, wat sy lewende lesse voor hulle uitgesprei het,
was ’n onuitputlike bron van lering en lus. Op elke blaar van die bos en klip
van die berge, in elke skynende ster, in aarde en see en lug was die Naam
van God geskrywe. Met sowel die lewende, as die lewenslose skepping - met
blaar en blom en boom en met elke besielde wese, vanaf die leviatan van die
waters tot die stofdeeltjie in die sonstraal - het die Edenbewoners omgegaan
en van elkeen sy lewensgeheime opgediep. Gods heerlikheid in die hemele,
die ontelbare wêrelde in hul ordelike omwentelinge, “die gesweef van die
wolke” (Job 37:16), die geheimenisse van lig en klank, van dag en nag - was
alles studieonderwerpe vir die leerlinge van die aarde se eerste skool.
- 22 -
Die wette en werkinge van die natuur en die groot waarheidsbeginsels
wat die geestelike heelal beheer, is deur die oneindige Bewerker van alles
vir hul verstande oopgestel. In “die verligting ... van die kennis van die heerlikheid
van God” (2 Korinthiërs 4:6), het hul verstandelike en geestelike kragte
ontwikkel en hulle het die uitnemendste vreugde van hul heilige bestaan
gesmaak.
Soos dit uit die Skepper se hand voortgekom het, was nie net die tuin van
Eden nie, maar die ganse aarde wonderskoon. Geen sondesmet, of doodskaduwee,
het die lieflike skepping geskend nie. Gods majesteit het die hemel
bedek en die aarde was vol van Sy lof (Habakuk 3:3), “toe die môresterre
saam gejubel en al die seuns van God gejuig het.” Job 38:7. So was die aarde
dan ’n paslike sinnebeeld van Hom wat “lankmoedig en groot van goeder
tierenheid en trou” (Exodus 34:6) is; ’n paslike studie vir diegene wat na Sy
beeld geskape is. Die tuin van Eden was ’n voorstelling van wat God verlang
het die hele aarde moes word en dit was Sy doel dat, namate die menslike
geslag in getalle toeneem, hulle ander huisgesinne en skole sou stig soos
die een wat Hy gegee het. So kon die hele aarde met verloop van tyd in besit
geneem word deur huisgesinne en skole waar die woorde en werke van God
bestudeer word en waar die studente op dié manier toegerus sou word om
steeds meer en meer volkome, deur die eindelose eeue heen, die lig van die
kennis van Sy heerlikheid te weerkaats.
Die Kennis van Goed en Kwaad
“OMDAT HULLE DIT NIE DIE MOEITE
WERD GEAG HET OM GOD IN ERKEN-
TENIS TE HOU,” IS “HUL ONVERSTAN-
DIGE HART ... VERDUISTER,”
- 23 -
HOEWEL hulle onskuldig en heilig geskape is, is dit nie vir ons oerouers onmoontlik
gemaak om verkeerd te handel nie. God kon hulle geskape het
sonder die mag om Sy vereistes te oortree; maar in so ’n geval sou daar geen
karakterontwikkeling kon plaasvind nie; hulle diens sou nie vrywillig gewees
het nie, maar gedwonge. Daarom het Hy aan hulle die mag gegee om te kan
kies - die vermoë om gehoorsaamheid te bewys of te weerhou. En alvorens
hulle ten volle die seëninge kon ontvang wat Hy graag wou skenk, moes hul
liefde en lojaliteit getoets word.
In die tuin van Eden was “die boom van die kennis van goed en kwaad... En
die Here God het aan die mens bevel gegee en gesê: Van al die bome van die
tuin mag jy vry eet, maar van die boom van die kennis van goed en kwaad,
daarvan mag jy nie eet nie.” Genesis 2:9-17. Dit was Gods wil dat Adam en
Eva nie die kwaad sou ken nie. Die kennis van die goeie is vrylik aan hulle
verleen; maar die kennis van die kwaad - van sonde en die gevolge daarvan,
van moeisame arbeid, van kommer en angs, van teleurstelling en verdriet,
van pyn en die dood - dit is in liefde weerhou.
Terwyl God die mens se welvaart beoog het, het Satan na sy ondergang
gestreef. Toe Eva die Here se waarskuwing
- 24 -
oor die verbode boom in die wind geslaan het en gewaag het om dit te nader,
het sy met haar vyand in aanraking gekom. Nadat haar belangstelling en
nuuskierigheid ge wek is, het Satan daartoe oorgegaan om Gods woord in
twyfel te trek en wantroue in Sy wysheid en goedheid te saai. In reaksie op
die vrou se verklaring oor die boom van kennis, dat God gesê het: “Julle mag
daarvan nie eet nie en dit nie aanroer nie, anders sal julle sterwe,” het die
bedrieër geantwoord: “Julle sal gewis nie sterwe nie; maar God weet dat as
julle daarvan eet, julle oë sal oopgaan, sodat julle soos God sal wees deur
goed en kwaad te ken.” Genesis 3:3-5.
Satan wou graag die skyn wek dat hierdie kennis van goed, met die kwade
vermeng, ’n seën sou wees en dat God, deur hulle te verbied om van die
boom se vrugte te eet, groot voordele van hulle weerhou. Hy het nadruklik