OPVOEDING

34 E.G.White - Opvoeding
Die Profeteskole
35
van die Olyfberg, regoor die tempel van Jehova, is reusebeelde en -altare
vir die diens van heidense gode opgerig. Namate hy sy trou aan God opsy
gewerp het, het Salomo oor homself beheer verloor. Sy tere gevoeligheid is
verstomp. Die pligsgetroue, bedagsame gesindheid van die vroeë deel van
sy bewind is verander. Hoogmoed, ambisie, kwistigheid en selfverwenning
het die vrugte van wreedheid en afpersing voortgebring. Hy wat ’n regverdige,
barmhartige en godvresende heerser was, het ’n tiran en onderdrukker
geword. Hy wat met die tempelwyding vir sy volk gebid het, dat hulle harte
onverdeeld aan die Here oorgegee mag word, het hulle verleier geword. Salomo
het homself onteer, Israel onteer en God onteer.
Die volk, waarvan hy die trots was, het sy leiding gevolg. Hoewel hy later
berou gehad het, het sy bekering nie die bose vrugte voorkom van die
kwaad wat hy gesaai het nie. Die dissipline en opleiding wat God vir Israel
bepaal het, sou hulle in al hulle lewenswandel van die mense van die ander
nasies laat verskil het. Hierdie andersoortigheid, wat as ’n spesiale voorreg
en seën beskou moes word, was nou vir hulle onwelkom. Die eenvoud en
selfbeheersing wat vir die hoogste ontwikkeling noodsaaklik
- 50 -
was, het hulle vir die praal en selfverwenning van heidense volke probeer
verruil. Om te wees “soos ... al die nasies” (1 Samuel 8:5) was hulle ambisie.
Gods onderwysplan is afgeskaf. Sy gesag is geweier.
Met die verwerping van Gods weë in ruil vir die weë van die mense, het Israel
se val begin. So het dit ook voortgegaan, totdat die Joodse volk ’n prooi
geword het vir die einste nasies wie se gewoontes hulle gekies het om na te
volg.
As volk het die kinders van Israel nie daarin geslaag om die voordele te
ontvang wat God graag aan hulle wou skenk nie. Hulle het nie Sy doel waardeer
of met die verwesenliking daarvan saamgewerk nie. Maar hoewel indiwidue
en volkere hulle so van Hom afskei, is Sy doel onveranderd vir diegene
wat op Hom vertrou. “Ek het ingesien dat alles wat God doen, vir ewig sal
bestaan.” Prediker 3:14.
Hoewel daar verskillende ontwikkelingsgrade is en verskillende openbarings
van Sy mag om in die behoeftes van mense in die verskillende tydperke
te voorsien, is Gods werk te alle tye dieselfde. Die Leermeester is dieselfde.
Gods karakter en Sy plan is dieselfde. By Hom is “daar geen verandering of
skaduwee van omkering” nie. Jakobus 1:17.
Die ondervindings van Israel is vir ons onderwysing opgeteken. “Maar
al hierdie dinge het hulle oorgekom as voorbeelde en is opgeskrywe as ’n
waarskuwing aan ons op wie die eindes van die eeue gekom het.” 1 Korinthiërs
10:11. Wat ons betref, soos ook met Israel van ouds, hang sukses in die
opvoeding af van getrouheid om die Skepper se plan ten uitvoer te bring.
Verkleefdheid aan die beginsels van Gods Woord sal vir ons net sulke groot
seëninge meebring as wat dit vir die Hebreeuse volk sou meegebring het.