OPVOEDING

30 E.G.White - Opvoeding
VOORBEELDE
31
Die Profeteskole
“HULLE WAS GELAER
BY U VOET; ELKEEN
ONTVANG IETS VAN U
UITSPRAKE.”
- 45 -
WAAR Gods opvoedkundige plan ook al in Israel uitgevoer is, het die gevolge
daarvan van sy Skepper getuig. Maar in so baie huisgesinne was die opleiding
wat deur die Hemel voorgeskryf en die karakters wat sodoende ontwikkel is,
ewe skaars. Gods plan is maar gedeeltelik en onvolmaak vervul. Deur ongeloof
en deur die Here se bevele in die wind te slaan, het die Israeliete hulle
met versoekings omring wat min die krag gehad het om te weerstaan. Toe
hulle hul in Kanaän gevestig het, het hulle “die volke nie verdelg soos die
Here aan hulle gesê het nie, maar hul met die heidene vermeng en hulle werke
geIeer. En hulle het hulle afgode gedien en dit het vir hulle ’n strik geword.”
Hulle hart het nie aan God vasgehou nie, “en hulle was nie trou in sy verbond
nie. Maar Hy is barmhartig, Hy versoen die ongeregtigheid en verdelg nie
en dikwels wend Hy sy toorn af. ... En Hy het daaraan gedink dat hulle vlees
was, ’n wind wat weggaan en nie terugkom nie.” Psalm 106:34-36; 78:37-39.
Vaders en moeders in Israel het onverskillig geword oor hul verpligting aan
God, onverskillig oor hul verpligting aan hul kinders. Deur ontrouheid tuis
en afgodiese invloede daarbuite, het baie van die Hebreeuse jongmense ’n
opvoeding ontvang wat grootliks verskil het van wat God vir hulle
- 46 -
beplan het. Hulle het die gewoontes van die heidene aangeleer.
Om hierdie toenemende kwaad die hoof te bied, het God ander werkinge
as ’n hulpmiddel aan die ouers in die opvoedingswerk voorsien. Van die
vroegste tye af is profete erken as leermeesters wat deur God aangestel is.
In die hoogste sin van die woord was die profeet iemand wat onder direkte
ingewing gespreek en aan die volk die boodskappe oorgedra het wat hy van
God ontvang het. Maar die benaming is ook gebruik vir diegene wat, hoewel
nie so direk geïnspireer nie, deur God geroep is om die volk oor die werke en
weë van God te onderrig. Vir die opleiding van so ’n klas leermeesters, het
Samuel, onder die Here se leiding, die profeteskole in die lewe geroep.
Hierdie skole is bedoel om as ’n skans teen die wydverspreide bedorwenheid
te dien, om vir die verstandelike en geestelike welvaart van die jongmense
voorsiening te maak en om die voorspoed van die volk te bevorder