Staða og þróun jafnréttismála - Háskóli Íslands

FRÆÐSLA UM JAFNRÉTTISMÁL
Í þessum kafla verður fjallað annarsvegar um fræðslu til nemenda um jafnréttismál og hinsvegar um
fræðslu til starfsfólks. Stærstu viðburðirnir hafa verið haldnir í tengslum við jafnréttisdaga á
haustmánuðum 2009, 2010 og 2011. Dagarnir vekja mikla athygli og setja svip sinn á háskólasamfélagið
þá daga sem þeir standa yfir. Þeir eru samstarfsverkefni fjölmargra aðila, meðal annars
jafnréttisnefndar Háskólaráðs og ráðs um málefni fatlaðs fólks. Að auki má nefna málþingið Forskot
með fjölbreytileika sem haldið var í apríl 2009 í samvinnu jafnréttisnefndar Háskólaráðs,
jafnréttisnefndar Kennaraháskólans og Rannsóknastofu í kvenna- og kynjafræðum.
Árið 2012 kom út bæklingurinn „Klámvæðing er kynferðisleg áreitni“ á vegum MARK – Miðstöðvar
margbreytileika- og kynjarannsókna við Háskóla Íslands og Mannréttindaskrifstofu
Reykjavíkurborgar. Bæklingurinn er á ensku og íslensku og á heimasíðu háskólans segir að hann
varpi ljósi á það hvernig konur upplifa klám á vinnustöðum og umræðu um útlit sitt í stað
frammistöðu. Thomas Brorsen Smidt (2012) MA-nemi í kynjafræði við Háskóla Íslands er höfundur
bæklingsins.
Fræðsla til nemenda um jafnréttismál
Í 23. grein laga nr. 10/2008 um jafna stöðu og jafnan rétt kvenna og karla kemur fram að fræða skuli
nemendur um jafnréttismál á öllum skólastigum.
Jafnréttisdagar hafa verið haldnir á haustmánuðum undanfarin ár og vaxið að umfangi og vinsældum
í hvert sinn. Almennt má segja að þeir hafi verið vel heppnaðir með uppákomum og fyrirlestrum um
jafnréttismál sem opnir eru öllum nemendum og starfsfólki. Hættan er þó sú að aðeins þeir
nemendur og það starfsfólk sem fyrir hefur áhuga og einhverja þekkingu á jafnréttismálum taki þátt í
slíkum viðburðum.
Í gæðakönnun sem Félagsvísindastofnun gerði fyrir skrifstofu rektors á vormisseri 2012 voru
nemendur meðal annars spurðir hvort námið hefði aukið vitund þeirra um jafnréttismál. Könnunin fór
fram á netinu og í síma í janúar og febrúar 2012.
14