Staða og þróun jafnréttismála - Háskóli Íslands

Þau gögn sem aflað hefur verið nú, fjórum árum síðar, benda ekki til þess að þetta hafi tekist. Óljóst
er hvort tilraunir til að brúa þetta bil hafi verið gerðar en fyrirliggjandi gögn benda til þess að það hafi
ekki verið gert með formlegum hætti. Því er ef til vill ekki að undra að þær raddir sem segja skilning
og áhuga yfirstjórnar háskólans á jafnréttismálum takmarkaðan hafa styrkst á þeim árum sem liðin
eru sem og þær raddir sem segja samræður við þau sem starfa að jafnréttismálum erfiðar.
Þannig komst einn aðili sem starfar að jafnréttismálum að orði:
Mér finnst bara mjög lítill skilningur á þessum málaflokki hreint út sagt. það er lítill
stuðningur í yfirstjórn háskólans og hjá æðstu stjórnendum stofnunarinnar. Þar
finnst mér bara mjög lítill skilningur.
Viðkomandi sagði að skilnings- og stuðningsleysið birtist með „þögn og fálæti“. Sami aðili benti á að
sín tilfinning væri að áhugi á jafnréttismálum væri að aukast meðal nemenda og fólks sem starfar á
þessu sviði en bætti við:
Ég held bara hreinlega að það sé hægt að segja það að eftir því sem það er
meiri virkni og meiri áhugi þá kemur andstaðan betur í ljós og þetta fálæti og
afskiptaleysi.
Hinir viðmælendurnir tóku í sama streng:
Samskiptin [við yfirstjórn skólans] eru kannski ekkert rosalega mikil sko […] þau
eru ekki reglubundin. Tengslin hafa dofnað verulega
Stjórnendur hafa kannski ekki lagt sig fram um að tengjast þessum hópi og taka
þátt, þú veist, setja þetta á dagskrá. Þeir vilja að einhver annar sjá um þetta.
Þegar viðmælendur sem starfa að jafnréttismálum voru beðnir um að skýra þetta nánar nefndu
nokkrir að almennt væri velvilji til málaflokksins en að þeim velvilja fylgdi ekki fjármagn, frumkvæði
eða aðgerðir. Vilji væri til að hafa jafnréttisáætlun og jafnréttisfulltrúa og „formlegu atriðin í lagi“ en
ekki væri vilji til að vinna að „efnislegu og raunverulegu jafnrétti“. Hér á eftir fara tilvitnanir í fjóra ólíka
viðmælendur:
Ég myndi segja að það væri svona almenn velvild út í þennan málaflokk kannski
hjá yfirstjórninni en yfirstjórnin hefur ekki tekið nokkurt einasta frumkvæði, ekkert.
48