Staða og þróun jafnréttismála - Háskóli Íslands

Svarendur voru beðnir um að nefna dæmi um hvernig kynjasjónarmið væru samþætt í kennslu
þeirra. Tilgangur þeirrar spurningar var hvoru tveggja að fá skýrari sýn á skilning fólks á
samþættingarhugtakinu og að fá dæmi sem aðrir kennarar gætu mögulega nýtt við sína kennslu.
Talsvert margir tóku dæmi um að skipulag kennslunnar væri með þeim hætti að það tæki tillit til
ólíkra þarfa kynjanna. Þá er um atriði að ræða sem ekki koma að inntaki kennslunnar en skipta engu
að síður máli þegar samþætta á kynjasjónarmið við skipulagningu hennar. Þannig geta verkefni sem
sett eru á með stuttum fyrirvara komið illa við þau sem bera meginábyrgð á uppeldi barna (svo sem
einstæðar mæður) sem skipuleggja vinnu sína í stuttum skorpum hvern dag fremur en löngum
vinnutörnum staka daga.
Í mínu fagi er 95 % kvenna og ég sé oft ástæðu til að taka tillit til barna þegar
verkefni eru lögð fyrir, legg þau fyrir fyrst á misseri þannig að hægt sé að vinna
með þau yfir lengri tíma þegar aðstaða býðst. Töluverður hluti nemenda á lítil
börn sem þarf að sækja og ég hef tekið eftir því að þar eru það helst konurnar
sem færa slíkar aðstæður í orð. Það getur vel verið að karlnemendurnir séu
einnig í sömu aðstöðu en þeir nefna það ekki. Framvindukröfur eiga ekki að vera
persónubundnar en mér finnst í lagi að hliðra til á ýmsum sviðum í kennslunni
svo sameina megi fjölskyldulíf og nám betur.
Með því að koma til móts við þarfir hvers nemanda varðandi skipulag, s.s. val á
tímasetningum við verkefnaskil og mætingar
Einn kennari nefndi að karlmenn væru í minnihluta í sinni grein og hann gætti þess að þeir fáu
karlmenn sem þar væru fengju tækifæri til að vinna með öðrum körlum. Ætla mætti að þetta
fyrirkomulag sé til góða fyrir karlana sem þá geta deilt sínum reynsluheimi með öðrum auk þess sem
þeir fá stuðning hvor frá öðrum og eru ekki „einir á báti“.
Þar sem hlutfall karla er lítið í minni grein þá gætum við þess sérstaklega að þeir
fái tækifæri til að vinna með öðrum körlum þegar við á og þeir óska þess.
Þriðja atriðið sem nefnt var og viðkemur skipulagningu kennslu var að kennarar gera tilraun til að
stýra hegðun nemendanna þegar kemur að náminu á þann hátt að hún brjóti upp hefðbundnar
staðalmyndir. Einnig að annað kynið verði ekki ráðandi í umræðum og reynsluheimur hins kynsins fá
því ef til vill ekki jafn mikið vægi og nemendur af því kyni veigri sér við að segja sína skoðun:
40