Bethany CS Studim - Milika Dhamo

SHTATËZANIA NË KRIZË
METODOLOGJIA E STUDIMIT
Studimi “Udha e të braktisurit” është kryer përmes një sërë metodash e teknikash të
kërkimit shkencor dhe ka disa veçori metodologjike. Ai është kryer nga vetë ekipi i punonjësve
sociale dhe psikologëve të qendrës së Shërbimeve Sociale dhe Psikologjike për Nënën
dhe Fëmijën në nevojë pranë Klinikës Bethany, Tiranë. Për realizimin e tij janë përdorur një
sërë metodash dhe teknikash.
I. MBLEDHJA E TË DHËNAVE
Intervista
Metoda e preferuar në këtë studim është intervista, pasi ajo i sjell të gjalla përvojat e të
intervistuarave. Intervista është përdorur në tri trajta klinike: si intervistë e strukturuar, e
pastrukturuar dhe e hapur. Artit të të pyeturit dhe të të dëgjuarit i është kushtuar kujdes.
Për të evituar dëmin, metoda e intervistës nuk është përdorur për qëllime feministe në këtë
studim. Intervistimi i grave është ndikuar nga ajo që kanë ditur paraprakisht intervistueset
apo vetë shtatzënat, nga ndikimet tipike maskuliniste të mjedisit apo edhe padija femërore.
Intervistat në këtë studim nuk i kanë shpëtuar ndikimit nga karakteristikat personale të të
intervistuarave apo historia e marrëdhënieve mes palëve. Ato janë influencuar nga realiteti
“tani këtu!”.
Në studim jepen të dhënat e përpunuara të pyetësorëve të zhvilluar me 46 nëna pjesëmarrëse
kohët e fundit në projektin “Strehë për shtatzëninë në krizë”. Të intervistuarat kanë
nivele të ndryshme arsimimi. Përqindjen më të lartë e zënë të intervistuarat me arsim tetëvjeçar
(rreth 34.8%), përkundrejt të intervistuarave me arsim të mesëm (19.6%), të intervistuarave
me arsim të lartë (10.9%), dhe atyre me arsim fillor (2.2%). Numri i të intervistuarave pa
arsim është po aq i lartë (32.6%). Mosha e të intervistuarave varion nga 13-45 vjeç. Pyetësori
përmban 26 pyetje gjysmë të strukturuara.
13