Bethany CS Studim - Milika Dhamo

SHËRBIMET SOCIALE TË BETHANY
Si pasojë e dhunës, shumë shtatëzana fillojnë duhanin. Krahasuar me shtatzënat që nuk
pinë duhan, ato janë më të rrezikuara ndaj aborteve spontane, plasjeve para kohe të
membranave, hemoragjive gjatë tremujorit të dytë dhe të tretë të shtatzënisë. Zhvillimi
intrauterin i fetusit është më i rrezikuar tek ato që marrin duhan. Në programin për
shtatzëninë në krizë, është vënë re se foshnjat e nënave duhanpirëse lindin me peshë më të
vogël krahasuar me fëmijët e tjerë.
Edhe konsumi i kafesë shtohet paralelisht me rritjen e stresit nga shtatzënia e padëshiruar.
Klientet raportojnë dëshirë për të pirë kafe edhe pse më parë nuk e kanë pirë. Si efekti i
kafeinës ashtu edhe aspekti social i pirjes së kafesë bëhen nxitës të varësisë së re.
Zgjatja e dorës drejt qetësuesve fillimisht duket shpërblyese: disa orë gjumi më shumë,
më pak dhimbje koke, frymemarrje më e rregullt. Kërkimi i qetësuesve rritet. Shtatëzënat në
krizë insistojnë të kenë «sikur edhe një paracetamol !», pavarësisht shpjegimit se medikamentet
e kalojnë barrierën placentare dhe ngacmojnë mjedisin e fetusit.
Dhuna seksuale
Abuzimi seksual është shpeshherë zanafilla e krizës. Shumë shtatzëni janë produkt i
dhunës. Me sa duket, “derisa pushteti shoqëror të shpërndahet në mënyrë më të barabartë, derisa roli
gjinor mashkullor të ndahet nga dominimi mbi gratë, derisa të zhvillohen norma që vërtetë e mbështesin
barazinë, mungesën e dhunës, pak gjasa ka të shohim ndryshimin në statistikat e abuzimeve fizike,
emocionale, apo seksuale”. (Stereotipat dhe rolet gjinore, përkthim)
Shpesh shtatzënia ndodh pikërisht për shkak të marrëdhënieve të përdhunshme seksuale.
17.4% e partnerëve zhduken nga marrëdhënia pas shtatzënisë.
Të dhënat e tab. 7 mjaftueshëm tregojnë se shtatzënia ndodh në marrëdhëniet e dhunshme,
në bashkëjetesë të brishtë, martesë pa kurorë, mardhëniet jashtëmartesore, lidhjet dashurore,
etj. Në të gjitha rastet, marrja e përgjegjësisë së shtatzënisë nga partneri është problematike.
8.7% e partnerëve që bashkëjetojnë zhduken kur mësojnë për shtatzëninë. 4.3% këshillojnë
abortin. 1/6 i rezistojnë pranimit të atësisë. Vetëm 6.5 % e partnerëve pa kurorë e pranojnë
shtatzëninë duke ndihmuar që fëmija të vijë i qetë në jetë. Të tjerët janë agresivë kërcënojnë,
nuk pranojnë, ose inkurajojnë abortin.
28