santiago de compostela, febreiro 2009 - Museo do Pobo Galego

O turismo en Galicia ten de contribuír á promoción
doutros sectores produtivos, en especial do sector
primario (agricultura, gandería, pesca, viticultura,
etc.) que, ao tempo, constitúen sinais de identidade.
Ademais, debe xogar un papel relevante na redución
dos desequilibrios territoriais e demográficos internos,
evitando a súa excesiva concentración en
determinados espazos, o que pode producir unha
carga insoportable para os mesmos.
A valorización dos recursos do país, a súa
utilización e a súa promoción deben perseguir o
obxectivo de seren compartidos tanto pola
poboación galega como polos visitantes, de tal xeito
que se xeren mecanismos de coñecemento mutuo
e de diálogo intercultural.
Os límites xurídico-políticos non deben ser
obstáculo para impulsar os necesarios procesos de
cooperación entre comunidades veciñas que
posibiliten levar a cabo proxectos complementarios
ou mesmo compartidos para contribuír de xeito
decidido a afondar nos seus valores e a aproveitar
mellor os recursos. Especificamente consideramos
tanto Asturias e Castela e León como a rexión
Norte de Portugal. Neste último caso, unha acción
coordinada na promoción do turismo podería ser un
medio, entre outros, de reforzar a condición de
eurorrexión que a UE lle ten outorgado a Galicia e
ao Portugal norduriense.
O desenvolvemento turístico de Galicia esixe un
espazo de acción concertada tanto entre as
distintas Administracións públicas como entre estas
e o sector privado, sendo necesario impulsar
estratexias e plataformas específicas que posibiliten
a procura de grandes consensos entre todos os
axentes que interveñen.
Consonte o manifestado no parágrafo cuarto, punto
terceiro, das conclusións xerais, recoméndase que
se reforce a formación profesional e universitaria de
técnicos e diplomados en turismo en cuestións que
se refiren ao noso patrimonio identitario, natural,
social, cultural e lingüístico. Grazas a esta mellora
na súa formación eses axentes do turismo poderán
actuar como eficaces intérpretes da nosa identidade
diante de quen nos veñan visitar.
FORO TURISMO E IDENTIDADE 11