santiago de compostela, febreiro 2009 - Museo do Pobo Galego

No ano 2005 o Padroado do Museo do Pobo Galego creaba o
Instituto de Estudos das Identidades, concibido como un medio
axeitado para levar a cabo unha función recoñecida, legal e
tecnicamente, aos museos etnolóxicos, e que os Estatutos da
institución recollen así: investigar, conservar, divulgar, defender
e promover a cultura galega en todos os seus ámbitos. Isto implica
a participación activa na vida pública que lle corresponde como
entidade cultural socialmente comprometida.
En función daquel obxectivo xeral, o Instituto de Estudos das
Identidades decidiu activar unha liña de actuación encamiñada
a someter a debate público unha serie de asuntos de actualidade
que teñen singular relevancia para o desenvolvemento da sociedade
galega. Así, en xaneiro de 2007 organizouse un primeiro Foro sobre
Paisaxe, Territorio e Identidade, seguido en decembro do mesmo
ano por outro dedicado a Inmigración e Identidade. Nesta terceira
convocatoria escolleuse o tema do Turismo, entendendo que a
incidencia deste feito de alcance global merecía un espazo de
reflexión, para contribuír desde o Museo á posta en común de
opinións autorizadas e inquietudes xerais acerca dun fenómeno que,
en maior ou menor medida, nos atinxe a todos, ademais de ter unha
evidente transcendencia económica e un impacto innegable en
cuestións que afectan directamente a nosa identidade como pobo.
Os textos que estamos a presentar estiveron a disposición dos
interesados no tema nunha primeira fase virtual que se prolongou
durante os meses de decembro de 2008 e xaneiro de 2009, e que
foi seguida por unha xornada presencial celebrada o 6 de febreiro,
na que coordinadores, relatores e público puideron debater e facer