KULTURAREN EUSKAL PLANA - Euskara - Euskadi.net

KULTURAREN EUSKAL PLANA
34
ARTEEN AZPISISTEMA INDARGUNEAK
• Artearen aurrean garai batean baino sentsibilizazio handiagoa dago, eta horrek prestakuntza
mailako eskari handiagoa ekarri du: prestakuntza artistiko ez arautua (arte eszenikoen zentro
pribatuak, musika eskolak), arautua (kontserbatorioak, batxilergo artistikoa), birziklatzekoak
(dantza ikastaro edo lantegiak EAEn edo kanpoan) eta goi mailako lanbide espezializazioa (Musikene
zentroa; matrikulazioa beste erkidego batzuetako Goi Mailako Antzezpen Eskoletan) edo
ezagutzakoak (Musikako Euskal Artxiboa -ERESBIL).
• Sorkuntza maila ona da hainbat alorretan: ikusmenezko artista itzaltsuak; egile ugari literaturan;
musika tradizio bat eta musika klasikoko kalitatezko bakarlari ospetsuak; askotariko eta kalitatezko
abesbatzak; izen handiko antzerki taldeak; dantza konpainiak eta talde amateur ugari.
• Arte sorkuntza sustatzeko eta ekoizpenerako baldintzak hobetzeko balia daitezkeen arte azpiegitura
eta zerbitzu garrantzitsuak daude: akuilu funtzioa betetzen duten museoak (Guggenheim,
Bilboko Arte Ederren Museoa, Artium…); arte plastikoak bultzatzeko egitura arinak —Arteleku,
Bilboarte, Montehermoso eta abar—; grabazio estudio funtzionalak; Bilborock moduko musika
zentroak; euskarara itzulitako atzerriko lanak; ARTEZ aldizkaria, euskal antzerkia hedatzeko
tresna bezala...
• Zabalkunde eta banaketako eskaintza nahiko handia da.
• Eragile gisa, bi orkestra sinfoniko profesional egonkorrak nabarmentzen dira —Bilbao Orkestra
Sinfonikoa (BOS) eta Euskadiko Orkestra Sinfonikoa (EOS)—; eta maila handiko egitura artistiko
batzuk, pribatuak, Erkidegotik kanpo eskari handia dutenak (Donostiako Orfeoia, Bilboko Koral
Elkartea...); talde eta produkzioen presentzia antzerki erakustoki garrantzitsuetan (Leioa, Donostia,
Gasteiz edo Tarrega); udal musika banda batzuk berreskuratzea; musika moderno edo
gazte taldeen ugalketa.
• Jende askorentzako lokal handietan (Euskalduna, Kursaal...) aurkeztutako programazio erregularrak
gero eta onartuago daude; lokal horiei Sarea antzoki egitura eta antzoki txikiak gaineratu
behar zaizkie. Elkarte pribatuak badira operan (OLBE) edo kontzertuen alorrean (Bilboko Elkarte
Filarmonikoa), publikoak (Araba Kulturala), eta erakusketa areto zein arte galeria asko,
gehienak Bilbo aldean badaude ere... Berebat, denboraldiko ekitaldi garrantzitsuak badira, hala
nola jaialdiak (Donostia, Gasteiz eta Getxoko Jazzekoak, Donostiako Musika Hamabostaldia,
Errenteriako Musikaste, Bilboko Musika Garaikidea...), musika garaikideko zikloak edo Gasteizko
musika elektroakustikoko jardunaldiak.
• Horrek guztiak fruituak eman ditu: abesbatza, artista eta orkestra itzaltsuak; izen handiko ikusmenezko
arteak; arte eszenikoetako konpainia eta produkzio etxeen egitura profesionala, eta
enpleguak sortzen dituen barne eta kanpo merkatua.