Scarica e-book 05 - in pensiero

Alessandro Guasoni (Genova, 1958)
A villa di scignöi
quande son inta villa e monto adaxo,
e vaggo à passaggio in scî mæ bricchi,
donde gh’é scilensio e tanta paxe,
m’accàpita d’arrivâ in çimma a-o monte
donde gh’é o castello che ghe viveiva
i vegi patroin do paise.
No gh’é nisciun in gïo, gh’é de feugge mòrte
in tæra, e de ätre creuan in sciô castello,
in scî stucchi do castello mòrto e rosso mon
ch’o ven creuvïo de giano e de marròn.
E vegne seia, tanto che piggio a stradda
ch’a va torna in zù:
e gh’é i ciù ærti ærboi inta vallâ,
e ghe n’é un ch’o l’à un grande tumô,
un tumô lasciù in ærto, into verde
sporzùo verso l’ærto contra o sô;
o l’é un tumô stramesuòu
e mi me diggo da pe mi: “No l’é vëa,
o l’é söo che un nïo d’öxellin,
o l’é tròppo ærto, o no se vé ben”.
Dappeu, m’appenso che quande piccin
gh’aiva poïa che lazzù, da-o rastello, serréssan
e che mi arrestesse serròu drent’a-a villa
à cianze despiòu, à giâ pe-i monti
donde a-a neutte gh’é e ànime
di vegi patroin do paise,
che stan lì, tra i sò zeughi e e sò demöe
che usàvan lô ch’ëan ricchi,
e zugàvan con l’ægua, co-e giòstre, co-o bäsigo,
demöe setteçentesche da scignöi.
Dappeu m’appensava peò che lazzù in fondo, in cangio,
a çittæ a no serrava mai, nì dì e nì neutte,
e a l’ëa averta de longo pe mi
e me sentiva à sosto, feliçe e bravo,
paxe, sensa sagrinâme,
119