Inhoud

Voorts is ’n assessering van die Departement se vlootbydrae oor koolstofemissies ontleed. Dit is egter deel van ’n
groter assessering wat die Departement sal help met die vermindering van sy koolstofvoetspoor.
Die Program: Landbou-ekonomie huisves sowat 20 databasisse wat op ’n gereelde basis in stand gehou word.
Een van die hoogtepunte hiervan is ’n opname van swart boere (Swartboeropname) waardeur die opname wat in
2005 uitgevoer is, bygewerk is.
Die ekonomiese modelleringsnavorsing deur samewerking met die Buro vir Voedsel- en Landboubeleid (BVLB) en
die Universiteite van Stellenbosch en Pretoria het geblyk ’n waardevolle hulpbron te wees, nie alleen vir die regering
nie maar ook vir landboubesigheid en boere. As gevolg daarvan is ’n jaarlikse inligtingsdisseminasiebyeenkoms
vir die eerste keer in die Wes-Kaap gehou.
’n Webgebaseerde Micro Combud 3-program is nasionaal bekend gestel vir gebruik deur alle landbou-ekonome
in al nege provinsies om ondernemingsbegrotings te ontwikkel en by te werk.
Uit die Marktoegangsprogram sluit van die hoogtepunte in ’n uitvoerkontrak wat met een van die wyninvoerders in
Nederland onderteken is. Daarby is ’n transaksie met ASDA, ’n kleinhandelaar in die Verenigde Koninkryk, beding
met die oog op die verkryging van produkte van swart kleinboere en kommersiële boere. As gevolg hiervan is vyf
boere op die Marktoegangsprogram as uitvoerders geregistreer ten einde hierdie transaksie gestand te doen.
Die Program: Gestruktureerde Landbou-opleiding het op ’n baie besondere manier bygedra tot mensekapitaal-
en vaardigheidsontwikkeling in die landbousektor. In Desember 2010 het vier en vyftig (54) studente vanuit die
B. Agric.-program gegradueer, 34 studente het ’n hoërsertifikaatkwalifikasie behaal, 5 studente het ’n Diploma in
Landbou behaal en 10 studente het die Diploma in Keldertegnologie behaal. Daarbenewens het 81 leerders die
leerderskapopleidingsprogram geslaag.
Die B. Agric.-program is in hierdie tydperk herbelyn ooreenkomstig die Hoëronderwys-kwalifikasieraamwerk. Die
Kollege was een van ’n paar Landbou-opleidingsinrigtings wat betyds die spertyd gehaal het vir die voltooiing
van die aansoek om herakkreditering van hul kurrikulêre aanbiedings vir Hoër Onderwys. ’n Nuwe kort kursus oor
Plantinspeksie is in samewerking met Plant SA aangebied.
Twee van die B. Agric.-gegradueerdes (Z. Msimango en J. Links) het hul Honneursprogram as Jong Professionele
Persone voltooi met doserende personeellede van die Kollege as hul mentors.
Die program “Wurms aan die Werk” is in 2010 bekend gestel. Onderrig in wurmboerdery is nou deel van die
onderrigprogram en word as deel van ’n gemeenskapsuitreikprogram aangewend.
Die Subprogram: Verdere Onderwys & Opleiding het ’n slaagsyfer van 84% aangeteken onder sy leerderskapstudente
wat vir die verslagtydperk ingeskryf het. Voorts het ’n onafhanklike eksterne kwaliteitversekeringsdiensverskaffer
’n moniterings- en evalueringsoorsig oor interne leerderskapprosesse uitgevoer en die subprogram het geblyk
binne al die tersaaklike kriteria aanpasbaar te wees; dit het ook ’n positiewe aanslag vir algehele goeie praktyk
van sy leerderskapimplementeringsraamwerk ontvang.
Met betrekking tot vaardigheidsontwikkeling en die bou van vermoë binne die aangewese nodale sones in die landbou
het altesaam 1 694 begunstigdes opleiding ontvang, waarby ingesluit was begunstigdes van verskillende OPLO/
HGLO-projekte in die Provinsie. Die ontwikkeling en bywerking van interne operasionele direktiewe is ook onderneem.
Verdere noemenswaardige prestasies sluit in die suksesvolle oorplasing van 7 leerders na die tersiêre stroom,
terwyl 5 leerders vir die Hoër Sertifikaat aanvaar is en 2 leerders vir die B. Agric.-program ingeskryf het.
’n Eksterne beurs verskaf deur die beleggingsmaatskappy NOVARE is aan die beste leerderskapstudent toegeken,
terwyl ’n bykomende vier departementele beurse aan sommige studente wat na die Hoëronderwysbaan oorgeplaas
is, toegeken is.
Die Wes-Kaap-Boergondië-wynuitruilprogram het sy 10de bestaansjaar in Boergondië gevier toe ’n
hoëvlakafvaardiging van die Wes-Kaap Boergondië in Oktober 2010 besoek het. Deur hierdie program het 30
studente en voorligtingspersoneellede in 2010 opleiding in Boergondië ontvang. Onder hulle was 7 studente in
wingerdbou en die maak van wyn, 8 studente in vatbestuur en -instandhouding, 4 studente in wyn- en voedselparing,
4 studente in die maak van kaas, en 7 landbouvoorligtingsbeamptes. Die program het ook uitgeloop op die
graduering van 7 wingerdbouleerders in die NKR 2-leerderskapprogram, met ’n spesifieke fokus op Wingerdbou.
10