Galdandi stýrisskipan í Føroyum - Løgtingið

helmingurin av tingmonnunum er á fundi og luttekur í atkvøðugreiðsluni.“
Hesa orðing hevði hann helst úr løgtingslógini 75 § 16, stk. 6, sum var
samsvarandi tá galdandi grundlóg § 60, sum er endurtikin við núverandi
grundlóg § 50. 7-mannanevndin, sum hevði stýrisskipanarlógina til
viðgerðar, strikaði hesa orðing, men vildi broyta orðingina soleiðis, at
fyri at samtykkja mál krevst, at meiri enn helmingurin av løgtingslimunum
er á fundi og fyri málinum. Hetta uppskot nevndarinnar var
endaliga samtykt. Nevndin broytti sostatt ikki atkvøðuskipanina frá tí,
hon hevði verið frammanundan sbr. løgtingslógini, við tað at § 16, stk.
6, í løgtingslógini var tulkað soleiðis, at teir, sum ikki atkvøddu, ikki
vóru roknaðir við í atkvøðugreiðsluna. 76 Rættarstandurin frammanundan
1948 var bert gjørdur eitt sindur greiðari. Á fólkatingi verða
harafturímóti teir, sum eru til staðar, men ikki atkvøða, roknaðir við í
atkvøðugreiðsluna.
Eftir § 18 kann løgtingið skipa nevndir at kanna almenn týðandi mál.
Tílíkar nevndir hava rætt at krevja skrivligar ella munnligar frágreiðingar
frá privatum borgarum eins og almennum embætismonnum. Følsk
frágreiðing fyri nevndini kann revsast eftir borgaraligu revsilógini §
162. Einki er sagt um, hvussu farast skal fram, um onkur dregur seg
undan at geva nevndini frágreiðing. Helst kann tá ikki verða kravd
vitnisførsla fyri sorinskrivaraembætinum eftir reglunum í rættargangslógini
§ 343, stk. 1, og § 747, men vanligt mál kann byrja við sorinskrivaraembætið
við kravi um, at viðkomandi verður dømdur at geva
frágreiðing. 77
Tá løgtingið velur nevndarmenn og umboð, fer valið fram við lutfalsvali
sbr. stýrisskipanarlógini § 18, stk. 2. Hetta merkir, at fyrst valda
mannin fær tann bólkur, sum hevur flestar atkvøður. Hereftir verður
helmingurin av atkvøðunum til listan hjá fyrstvalda manninum skarvaður
av, og tann bólkurin, sum tá hevur flestar atkvøður, fær næstvalda
mannin. Hereftir verður so skarvaður helmingurin av atkvøðunum hjá
næst valda bólkinum, og tann bólkurin, sum tá hevur flestar atkvøður,
88
75 . Lov nr. 124 af 28.03.1923 om Færøernes Lagting við seinni broytingum.
76 . Sí t.d. løgtingstíðindi 1931, bls. 69. Á løgtingi sótu tá 23 løgtingsmenn, og var
til viðgerðar uppskot um at veita Jákupi Danielsen ferðastudning at læra jarðarbrúk.
Uppskotið fekk 11 atkvøður fyri, eingin ímóti, hinir atkvøddu ikki. –
Hetta uppskotið var roknað sum fallið.
77 . Um spurningin sí Ross: Dansk Statsforfatningsret (III udg. 1980 ved Ole
Espersen) pp 254 f.