Veileder for sikkerhet ved store arrangementer - Direktoratet for ...

Gjer informasjon om arbeidsvilkåra for media tilgjengeleg
• på ei internettside
• når de behandlar akkrediteringane
• når media kjem til staden
• ved oppslag i pressesenteret
18.5 Arbeidet til media på området
Pressefolk har behov for å kome nær artistane, og det vil seie
at dei bør få tilgang til område der publikum ikkje kjem. Dette
er til dømes området nærast scenen (scene- og fotograva) og
eit eige område backstage (såkalla mediebackstage). Det er
vanleg at journalistar blir utstyrte med eigne pressekort som
gir dei tilgang til avgrensa område.
18.5.1 Pressesenter
Det kan vere tenleg å etablere eit lukka pressesenter der
journalistar kan gjere intervju og ha tilgang til ein arbeidsplass
med internettoppkopling. Slik legg vi til rette for at akkrediterte
media kan vere først ute med riktig informasjon.
18.5.2 Fotografering
Grunnprinsippet bør vere at fotografering er lov overalt.
Restriksjonar må vere grunngitte og gå fram av mediestrategien
(sjå avsnitt 18.2). Det bør ikkje leggjast restriksjonar på
val av utstyr.
Mange artistar krev at det skal vere fotorestriksjonar på framføringa.
Dette blir regulert i kontrakten mellom arrangør og
artist. Det er arrangøren som har ansvar for å sørgje for at journalistane
som dekkjer arrangementet, får denne informasjonen.
Fotografering ved scenen
Mellom publikum og scenen bør det av tryggingsgrunnar vere
eit område som blir kalla scenegrava. I dette området kan vi
med fordel setje av ein eigen plass for fotografar, ei såkalla
fotograv. Les meir om utforming av scenen i kapittel 8.
Tryggingsarbeidet er prioritert høgast i scenegrava.
Fotografane må ikkje forstyrre tryggingspersonellet, men dei
må også få jobbe uforstyrra så lenge dei følgjer reglane. Det
kan vere fornuftig å bestemme på førehand når dei kan jobbe
uforstyrra, til dømes under dei tre første låtane, jf. dei avgrensingane
artistane har sett i kontrakten.
Følgjande praksis blir ofte følgd ved fotografering frå
scenegrava:
• Gravsjefen har alltid siste ord i scenegrava.
• Presseansvarleg eskorterer eit samla fotografkorps inn i
scenegrava.
• Tilgangen som fotografane har til scenegrava, gjeld berre
for ein avgrensa del av framføringa.
• Gravsjefen kan avbryte arbeidet til fotografane av omsyn
til tryggleiken.
• Alle fotografar bør ha gyldige inngangsbevis.
• Utstyr må ikkje plasserast slik at det hindrar
tryggingsarbeidet.
• Gravsjefen bør informere fotografane dersom det skal nyttast
pyrotekniske varer under fotoseansen.
Dersom artisten krev spesielle tiltak eller restriksjonar, må den
presseansvarlege sørgje for å informere media om dette.
Tv-produksjon
Dette blir vanlegvis styrt av arrangøren, som gjer ein avtale
med tv-produsenten. Her må tryggleiken stå sentralt, og vi må
sikre at ingen skader seg på utstyr eller på grunn av utstyret.
Ofte blir det montert utstyr blant og over publikum. Det kan
vere ein god idé å setje av eigne plassar eller podium for
tv-produksjon.
18.6 Arbeidet til media i ein
krisesituasjon
Interessa til media aukar dersom det skjer ei alvorleg hending.
Då kan det fort dukke opp pressefolk som ikkje er akkrediterte,
samtidig som akkrediterte journalistar går over til å vere
nyhendereporterar. Då er det viktig at pressa får god informasjon,
samtidig som vi prøver å kontrollere journalistane i den
grad det er mogleg. I ein krisesituasjon er det særleg viktig at
media får riktig informasjon, og at vi som arrangør gir tydeleg
melding om kven som uttaler seg på vegner av arrangøren.
Dersom vi kjem i ei krise som vi veit at media vil interessere
seg for, kan det lønne seg å vere i forkant og skrive ei pressemelding
som inneheld den informasjonen vi ønskjer å gi. Slik
kan vi til ein viss grad kunne setje premissane for pressedekninga
som kjem. Les meir om handtering av krisesituasjonar
i kapittel 20.
113