Veileder for sikkerhet ved store arrangementer - Direktoratet for ...

akseptabelt. I somme tilfelle kan slitasjen gi varige skadar.
Her må vi verne terrenget.
• Lyng og mose kan ha sein tilveksthastigheit. Gangvegar,
scener, salsområde, portar osv. bør leggjast slik at det ikkje
blir stor slitasje på lyng og mose.
• Forureina grunn: Dersom grunnen er forureina, kan
støv eller gjørme spreie skadelege substansar. Dette gjeld
både kjemikal frå gamle deponi og bakteriar frå til dømes
avføring frå husdyr.
• Kontroller at ikkje arrangementet kan skade, forstyrre eller
øydeleggje sjeldne biotopar med plantar, insekt, amfibium
osv.
For å forsterke og verne terrengunderlaget i område med stor
slitasje kan det vere lurt å bruke ein fiberduk med eit lag maskingrus
over. Det kan relativt enkelt leggjast ut før og fjernast
etter arrangementet. Kontakt ein maskin- eller hageentreprenør
for forslag og kostnadsoverslag. Eksisterande plen og mark
toler i dei fleste tilfelle slik behandling, og graset kjem seg att
etter at vi har fjerna fiberduken.
6.1.3 Geografisk risiko
Mange menneske samla på ein stad gjer det meir sannsynleg
at uønskte hendingar – som vi elles ser på som kvardagsrisikoar
– skal skje. Vi bør difor vere særleg tryggleiksorienterte
og forsiktige når vi planlegg eit arrangement: Det kan vere
fornuftig å leggje lista for akseptert risiko lågare enn vi ville ha
gjort i ein normalsituasjon.
Døme på slike risikoar kan vere:
• Vassdrag: Ver særleg merksam på regulerte elvar som kan
få raske variasjonar i vassføringa. Dersom arrangementet
går føre seg i nærleiken av slike regulerte elvar, bør vi
tenkje på kva faremoment som kan oppstå når folk slår seg
ned ved elvebreidda eller leikar i vatnet.
• Unngå terrengformasjonar med stup, svaberg, ur
og anna som kan føre til fallskadar, og sikre desse med
gjerde. Det er ikkje nok å setje opp merkeband. Ingen skal
ferdast i ur med stein som kan losne og treffe publikum.
• Myrområde er ikkje eigna.
• Sterkt trafikkerte vegar og jernbane er ikkje ønskte
naboar til eit arrangement. Vurder faren ved trafikkuhell
og farleg gods. Arrangementet kan gjere bilførarar uoppmerksame,
og det igjen gjer det meir sannsynleg at det
skal skje ei ulykke.
• Infrastruktur som høgspenttrasear, avløpssystem og
kloakkreinseanlegg eller gassleidningar er ikkje ønskte
element i nabolaget til eit arrangement med mange
deltakarar.
• Glatt underlag og underlag som kan bli glatt når det
regnar, snør eller blir frost.
Dette er ikkje meint å vere ei sjekkliste, men døme på risikoar
ved somme stader. Kvart arrangement må gjere slike risikovurderingar,
og risikovurderinga må innehalde ei vurdering av
korleis vi ventar at publikum oppfører seg i arrangementsområdet,
slik at vi får identifisert og handtert lokale geografiske
risikoar.
Dersom risikoreduserande tiltak ikkje gir ønskt tryggleiksnivå,
må vi innsjå at arrangementsstaden ikkje er eigna til bruken
han var tenkt til.
6.1.4 Bereevna til
bygningskonstruksjonar
Ved innandørsarrangement må vi som arrangør kunne dokumentere
kva belastningar som skal takast inn i bygningen
(utstyr og rigg, plassering, publikumsbelastning osv.), og kontrollere
at bygningskonstruksjonen toler tilleggsbelastninga.
Utleigar (eigar) må kunne dokumentere kor mykje bygningen
er dimensjonert for å tole, både når det gjeld tal på personar,
føresetningar og avgrensingar for bruk av bygningen.
For faste scenar kan vi forvente at eigaren har gode rutinar på
til dømes tillatne belastningar og straumuttak, og at vi får vite
om kva som er mogleg, og kva avgrensingar som gjeld, når vi
skriv leigekontrakt.
Når det gjeld tilfeldige bygningar, kan vi ikkje forvente at eigaren
kjenner til arrangementet og dei behova og belastningane
som det kan føre med seg. I slike tilfelle må leigetakar vere
proaktiv i forhandlingane og be om nødvendige opplysningar
om kva som er mogleg å gjere, og kva avgrensingar som gjeld.
Vi må som arrangør informere eigaren om kva bygningen skal
brukast til, altså kva type arrangement som er planlagt, og
kor mange menneske vi ventar skal kome. Vi må forsikre oss
om at bygningen tryggleiksmessig er tilrettelagd for dette, og
at bruksløyvet eller ferdigattesten for bygningen dekkjer det
arrangementet er tenkt til.
For å kunne kontrollere belastninga for bygningen kan vi lage
eit såkalla riggplott, der vi skisserer kvar lastene skal plasserast,
på ei teikning av lokalet. Skissa må vise kor store enkeltlaster
som skal inn i bygningen, slik at vi kan sjekke om heis,
korridorar, rampar osv. har stor nok kapasitet. Det må også
kome tydeleg fram om lastene skal stå på golvet eller hengjast
opp i takkonstruksjonar.
Pass på at følgjande er i orden med tanke på tryggleiken
for bygningen:
• Avklar om det er tillate å hengje opp gjenstandar i taket
eller andre konstruksjonar.
50