Veileder for sikkerhet ved store arrangementer - Direktoratet for ...

Ein køordnar fungerer når publikum oppfattar det som lønnsamt
å stå i kø framfor å prøve alternative ruter. Synleg rørsle
i køen er difor viktig for at publikum skal oppfatte vegen via
køordnaren som den mest effektive. Eit stilleståande køsystem
blir sannsynlegvis ikkje brukt. Då prøver publikum å finne
alternative inngangar, og vi kan oppleve mogleg ukontrollert
oppbygging av køar.
Dersom innsleppsområdet blir brukt som rømmingsveg, kan
køordnarar hindre effektiv rømming. Sørg difor for at innsleppsveg
med køsystem ikkje blir brukt som rømmingsveg,
med mindre det er ein beredskap for å hurtig kunne fjerne
køordnaren i tilfelle evakuering.
9.3.3 Sluser
Ei sluse er i utgangspunktet ein innsleppskanal som er smalare
enn 1,2 meter, av og til så smal som 60 cm. Eitt av
formåla med sluser er å kunne sleppe personar gjennom eit
kontrollpunkt éin etter éin. Slike sluser kan ikkje brukast som
rømmingsvegar, og det må etablerast andre ordningar for rømmingsvegar
og utgangsvegar. Tenk på at det er behov for ein
mykje større utsleppskapasitet enn innsleppskapasitet, sidan
publikum ønskjer å forlate arenaen kort tid etter at arrangementet
er slutt, medan dei oftast kjem i god tid før det startar.
Sluser som er tilgjengelege for rullestolbrukarar, bør vere 1,3
meter breie med plant underlag og utan fysiske hindringar.
9.3.4 Dimensjonering av utgang
Publikum har ein tendens til å velje den næraste utgangen,
eller den utgangen som fører dei i den retninga dei ønskjer
etter at arrangementet er slutt. Utgangar mot buss, bane, tog og
parkeringsplass blir mykje brukte. Vurder kva utgangar som
blir dei mest belasta, og dimensjoner dei etter venta maksimal
publikumsmengd.
Utgangar når arrangementet er slutt
Ved dei fleste arrangement forlét publikum området samtidig,
noko som skaper eit høgt persontrykk på utgangane. Om
mogleg bør vi difor bruke særskilde utgangar når arrangementet
er slutt. Slike ekstrautgangar blir berre nytta når heile
området skal tømmast, og ikkje når arrangementet blir avvikla.
Då kan dei ordinære utgangane brukast. I tillegg bør vi leggje
til rette for å kunne opne dei ordinære utgangane i full breidd
når arrangementet er slutt.
9.4 Informasjon ved
passeringspunkt
Ein inngang er ein veleigna stad for å gi informasjon til
publikum. Alle skal passere, og ofte gir litt tid i kø høve til
å ta til seg informasjon. Tydeleg informasjon gjer at publikum
kan bu seg på åtferdsreglar, til dømes kva visitering
inneber, eller reglar for kva det er lov å ta med seg inn på
arrangementsområdet.
Ved inngangane bør vi informere via høgtalaranlegg eller
megafon for å sikre at vi når ut med relevant informasjon til
flest mogleg. Høgtalarar og megafonar er også nyttige hjelpemiddel
dersom det oppstår kø eller uro i kø, eller når vi ønskjer
å formidle andre viktige meldingar.
Ved inngangen bør vi blant anna informere publikum om:
• kvar utgangane finst (særleg dersom inngangane ikkje skal
brukast som utgangar)
• kva det er lov å ha med inn på området av til dømes innspelingsutstyr
for lyd og bilete, alkoholhaldig drikke eller
farlege gjenstandar
• visitering ved inngangen
• kva som ikkje er lov å gjere på arrangementet, til dømes å
grille eller publikumssurfe
• nyttige tips, som til dømes å drikke mykje vatn (kvar finst
det vatn?) og passe på verdisaker
• opningstider
• eventuelle endringar i programmet
• andre avgjerder for arrangementet
Sørg for at dei gjestene forstår informasjonen ved å gjere han
tydeleg, oversiktleg og lett å lese. Dersom vi ventar at det kjem
personar med særlege behov, bør vi også vurdere alternative
meldingar som publikum kan høyre eller lese. Ordninga med
informasjon via følgjeperson kan brukast aktivt i slike tilfelle.
Inngangar, utgangar og rømmingsvegar bør markerast med
signalfargar med høg kontrast. Då blir det lettare for folk med
nedsett syn å orientere seg. Prøv å standardisere fargebruken,
og hugs at ein del fargar allereie er nytta som standardfargar
for symbolbruk. Blant anna er det vanleg at grøn farge viser
rømmingsvegar, gul farge viser fareskilt, blå farge opplysningar
osv.
Pass på at ikkje informasjon til publikum stansar personflyten
gjennom flaskehalsområde. Til dømes må informasjonsskilt
eller storskjermar ikkje plasserast slik at publikum stansar opp
på uønskte stader. Plasser informasjon utanfor inngangen slik
at folk i køen kan sjå han.
74