Veileder for sikkerhet ved store arrangementer - Direktoratet for ...

Når sanitærområda skal utformast, må vi ta omsyn til dårleg
vêr og fare for skliulykker. Golv, rampar og trapper må ha
sklisikkert underlag.
12.1.3 Plassering
På større arrangement kan det vere lurt å ha fleire sanitærområde.
Dette er spesielt viktig på område med lange avstandar.
Enkelte toalett må tømmast med jamne mellomrom. Det bør
difor aldri vere meir enn 20 meter mellom toalettområdet og
køyreveg.
På grunn av lukt bør vi ikkje plassere sanitærområdet i nærleiken
av område med høg publikumstettleik eller i nærleiken av
matsal, helst minst 50 meter unna. God skilting er viktig slik at
publikum lett finn fram til sanitærområdet.
12.1.4 Reingjering
Toaletta bør vaskast og ryddast, og det må fyllast på papir og
såpe, gjerne etter eit fastlagt tidsskjema. Hugs at toalettilhøva
fortel publikum mykje om kor profesjonell arrangøren er.
På eindagsarrangement er det oftast ikkje trong for å tømme
toaletta undervegs. På arrangement som varer meir enn éin
dag, bør toaletta tømmast om morgonen, og eventuelt ein gong
på dagtid i tillegg. Prøv å berekne kva behovet blir. Av omsyn
til tømmebil er det lurt å tidfeste planlagd tømming. Ha beredskap
for ekstratømming i tilfelle det skulle vise seg at de har
undervurdert behovet.
12.2 Avfallshandtering
Personell
Dersom arrangøren sjølv eller andre som ikkje er profesjonelle,
skal handtere avfallet, er det viktig å utruste desse med solide
arbeidshanskar og anna verneutstyr etter behov. Det kan vere
vernesko, gripeklo og vernebriller. Dei som handterer avfall,
skal ha tilgang til varmt vatn eller dusj og antiseptiske kremmar.
Hugs at avfallshandtering også krev at personellet er medvitne
om val av arbeidsstilling, lyfteteknikk osv. Arrangøren
bør gå gjennom tryggleiksrutinane i lag med personellet.
Transport
Tenk gjennom transportløysing og tryggleik ved lasting av
tunge avfallskøyretøy. Lasting bør overvakast. Om mogleg bør
køyretøy kunne kome heilt fram til avfallsstasjonane.
Gjenvinning
Arrangøren bør få til eit samarbeid med deltakarane om størst
mogleg grad av kjeldesortering av avfall. Separate avfallsbehaldarar
for ulike formål, og eventuelt ein sorteringssentral og
lokale innsamlingsstasjonar kan vere fornuftig dersom området
er stort. Sorteringsprinsippa kan gjerne samsvare med ordninga
i kommunen arrangementet går føre seg i.
Avfallsbehaldarar
Avfallsbehaldarar bør tømmast ofte for å unngå påtende brannar.
Brannar er den vanlegaste årsaka til ulykker ved større
arrangement, særleg i tilknyting til campingplassar. Bransjen,
eventuelt den entreprenøren som blir vald, kan gi råd om val
av behaldarar til lokal utplassering og sentral innsamlingsstasjon.
Det bør vere vakthald ved ein slik sentralstasjon, eller
han bør vere låst for uvedkomande.
Arrangement fører som regel til store mengder avfall. God
avfallshandtering er viktig for tryggleiken og trivselen. Som
arrangør bør vi føre dialog med kommunen om handtering av
avfallet. Normalt vil vi kunne avtale at kommunen samlar inn
hushaldsavfall, medan arrangøren må sørgje for at nokon tek
seg av glas, papir og metall. Kommunen kan gi råd om aktuelle
aktørar som kan ta på seg dette.
89