Norsk kritikerlag 10 år - Kritikerlaget

4. forsøk: Gutane i åttande
Du er litt som ein av dei store gutane i åttande. De er store,
litt truande, nokre av dykk pene, andre meir rå og nokre
verkar til og med dumme, men de er alltid størst og de er
alltid på avstand. Og de har makta i korridorane.
Eg set nasa oppover og prøver å sjå tøff ut. Eg er usikker
på om de er ekle eller berre morsomme når de slenger
kommentarar etter meg i korridoren. Nokre av dykk er eg
forelska i, nokre direkte redd for, nokre av dykk ser ut til å
vita alt her i verda – men uansett rettar eg nasa oppover
og prøver å verka usårleg.
Eg held for øyre og auge og latar som at de ikkje finst. Det
er min strategi.
5. forsøk: Skilsmisse
Eg merkar det. Du har ein annan. Du elskar meg ikkje lenger.
Nei, ikkje sei meg imot! Trur du ikkje eg er dramatikar? Trur
du ikkje eg kan lesa mellom linjene?
Eg merkar at du er kynisk, opportunistisk og blodtørst – du
vil ha blodet mitt. Ja, eg innrømmer det, det med «blodtørst»
seier eg berre for å vera på den sikre sida, men likevel. Eg
treng tryggleik.