Aves_da_cidade_de_Pontevedra_baja

GUÍA DAS AVES DE PONTEVEDRA
Introdución
Índice xeral - Índice (nomes cientificos) - Índice (nomes galegos)
III
No planeta existen arredor de 9400 especies de aves, das cales unha décima
parte se ten rexistrado en Europa, norte de África e Oriente Próximo (área
denominada Paleártico Occidental) (Snow & Perrins, 1998a, 1998b; Gill et
al., 2006). En Galicia son 448 as especies de aves vistas nalgunha ocasión
no seu territorio continental e zona marítima próxima (Penas et al., 2004).
As aves son uns excelentes indicadores ambientais; isto significa que unha
elevada diversidade deste grupo de animais nun territorio está correlacionada
cun contorno san e sustentable ambientalmente (BirdLife International,
2004; SEO/BirdLife, 2007). Por exemplo, o indicador poboacións
de aves silvestres vén sendo usado a nivel local, rexional e incluso estatal
nalgúns países para avaliar a calidade de vida e a sustentabilidade das
actividades humanas (McMahon, 2002).
A cidade de Pontevedra ten unha situación excelente para acoller variadas comunidades
de aves, grazas á proximidade ao mar e a zonas húmidas continentais
como a Xunqueira de Alba, con alta diversidade ornítica (Cabaleiro, 2008a).
O presente estudo, realizado durante os anos 2008 e 2010 na área urbana
e arredores da cidade de Pontevedra, tivo como propósito coñecer a
diversidade de abundancia de aves silvestres como elementos indicadores
da calidade de vida en Pontevedra, ademais de servir de documento básico
para a súa correcta xestión e conservación. Outros obxectivos foron:
• Cuantificar detallamente a poboación reprodutora dalgunhas aves coloniais
en áreas fortemente humanizadas, como a gaivota patiamarela
(Larus michahellis).
• Estimar o volume de efectivos nos durmidoiros dalgunhas aves gregarias,
coma os estorniños pinto (Sturnus vulgaris) e negro (Sturnus
unicolor) e a pega (Pica pica).
• Identificar as áreas de conservación prioritaria para as aves na cidade
e arredores.
Vista parcial do ensanche da cidade de Pontevedra. © C. D. Romay Cousido.
Páxina anterior - Páxina seguinte