Ligji për të Drejtat e Autorit dhe të Drejtat e Përafërta

1. Shfrytëzuesit e lëndëve të mbrojtura si dhe detyruesit e pagesës së kompensimit të veçantë janë të
detyruar t’i mundësojnë Shoqatës për administrimin kolektiv të të drejtave dhe të kontrollojë
përmbushjen e përpiktë dhe me kohë të kontratave të lidhura për administrim kolektiv.
2. Shfrytëzuesit e lëndëve të mbrojtura janë të detyruar ta njoftojnë Shoqatën për administrim kolektiv
të të drejtave për titullin e lëndës së mbrojtur, shpeshtësinë dhe vëllimin e shfrytëzimit të saj si dhe për
rrethanat tjera ndikuese në llogaritjen e detyrimit të kompensimit që paguhet sipas tarifës, pavarësisht
se lënda e mbrojtur shfrytëzohet në bazë të lejes së marrë apo në bazë të këtij ligji.
3. Në rastet kur nevojitet leja sipas këtij ligji, organizatorët e shfaqjeve publike, kulturore, artistike apo
zbavitëse si dhe shfrytëzuesit e tjerë të lëndëve të mbrojtura, detyrohen të marrin leje paraprake nga
Shoqata për administrim kolektiv të të drejtave.
4. Nëse organizatori i shfaqjeve publike, kulturore, artistike apo zbavitëse si dhe shfrytëzuesit e tjerë
të lëndëve të mbrojtura nuk posedon leje në kuptimin e paragrafit 3. të këtij neni organi kompetent i
policisë së Republikës së Kosovës, me kërkesë të bartësit të së drejtës ose Shoqatës për administrim
kolektiv të të drejtave, do të ndalojë shfaqjen publike, respektivisht shfrytëzimin e lëndës së mbrojtur.
5. Shfrytëzuesit e lëndëve të mbrojtura, kur ato mund të shfrytëzohen pa qenë e nevojshme të bëhet
kalimi i të drejtës, janë të detyruar që një herë në muaj t’i dërgojnë Shoqatës për administrim kolektiv të
të drejtave të dhënat për çdo formë dhe për çdo shpeshtësi të shfrytëzimit.
6. Shërbyesit medial audiovizuel janë të detyruara t’i dërgojnë Shoqatës për administrim kolektiv të të
drejtave, një herë në muaj, raporte lidhur me emetimin e lëndëve të mbrojtura gjatë muajit të
mëparshëm, duke paraqitur njëkohësisht listën e autorëve, të interpretuesve dhe të prodhuesve, titujt e
lëndëve të mbrojtura si dhe shpeshtësinë e shfrytëzimit të tyre.
7. Nëse organizatori i shfaqjeve publike, kulturore, artistike apo zbavitëse si dhe shfrytëzuesit tjerë të
lëndëve të mbrojtura, përkatësisht shërbyesve medial audiovizuel, nuk i dorëzon informacionet në
kuptim të paragrafit 5. dhe 6. të këtij neni, konsiderohet se ka shkelur të drejtat të cilat i administron
Shoqata për administrim kolektiv të të drejtave.
8. Pronari i veprës origjinale të arteve figurative, shtëpia aksionare, galeria ose agjenti tjetër detyrohet
t’ia dërgojë Shoqatës për administrim kolektiv të të drejtave të dhënat për origjinalin e tjetërsuar,
autorin e veprës, shitësin dhe pronarin e ri të veprës si dhe çmimin e shitjes së origjinalit, brenda
tridhjetë (30) ditëve që nga dita e rishitjes.
Neni 175
Mbikëqyrja administrative e punës së Shoqatës për administrim kolektiv të të drejtave
1. Zyra do të mbikëqyrë nëse Shoqata kolektive kryen funksionet e veta në pajtim me dispozitat e ligjit.
2. Zyra në çdo kohë mund të kërkojë nga Shoqata kolektive çfarëdo lloj informatash ose dokumentesh
lidhur me Shoqatën kolektive apo administrimin kolektiv të të drejtave, në përgjithësi apo në lidhje me
një autor të caktuar, një vepër të caktuar ose përdorues, dhe mund të inspektojë librat ose çfarëdo
dokumenti tjetër lidhur me Shoqatën kolektive ose administrimin kolektiv të të drejtave, përfshirë
funksionimin dhe shpenzimin e fondeve speciale nëse ekzistojnë.
3. Zyra mund të urdhërojë Shoqatën kolektive të sigurojë raportin e kompanisë së auditimit lidhur me
ndonjë çështje specifike dhe brenda një fushëveprimi të përcaktuar nga Zyra, por jo më shumë se një
herë në vit, me shpenzime të Shoqatës kolektive.
4. Zyra mund të emërojë një ose më shumë përfaqësues të vet, të cilët marrin pjesë në takimet e
asamblesë dhe organeve tjera të shoqatave kolektive me të drejtën për të folur, por pa pasur të drejtë
të votojnë.
47