Geisli 1A - Námsgagnastofnun

Bls. 32
Gaman gæti verið að lesa Söguhornið úr kennsluleiðbeiningunum upp fyrir nemendur og
ræða inntak þess. Oft eru einhverjir í nemendahópnum sem þekkja eitthvað af inntakinu
eða hafa til dæms áhuga á egypsku píramídunum. Það geta því sprottið skemmtilegar
samræður um hvernig mannkynið hefur byggt upp þekkingu og hvernig hún berst mann
frá manni. Sniðið af teningnum á bls. 32 er að finna í eyðublöðum miðstigs. Hugtakið
teningur er reglulegur þrívíður hlutur sem hefur sex ferningslaga hliðar. Orðið teningur er oft
notað um alla verpla og jafnvel talað um tíu hliða tening. Hér er því hentugt tækifæri til að
ræða um skilgreiningar á hugtökum. Einnig er gaman að skoða fleiri hluti frá mismunandi
sjónarhorni. Gagnlegt væri að stilla upp á borð nokkrum hlutum og biðja nemendur að
teikna fjögur sjónarhorn eða velta fyrir sér hvernig hús eru ólík eftir því hvaðan horft
er á þau. Á vinnuspjaldi 21 er að finna teningaverkefni þar sem nemendur vinna með
teningasnið. Það hentar vel til að leggja áherslu á sjónarhorn og form.
Bls. 33
Á bls. 33 er að finna teikniverkefni. Þar fást nemendur við að teikna teninga í þríhyrninganet.
Gott er að þeir fái stærri blöð sem finna má í eyðublöðum. Þeir þurfa að fá tíma til að
prófa sig áfram og ná valdi á að teikna í þrívídd með hjálparpunktum. Fyrir marga er þetta
mikil upplifun að sjá teningana rísa út úr myndinni. Áherslu ætti að leggja á teikningarnar
og nemendur geta líka teiknað fyrst og byggt svo. Vinnuspjöld 23 og 24 hafa að geyma
teningaverkefni þar sem skoðaðar eru kubbabyggingar. Þar eru skoðaðar myndir og
nemendur eiga að lesa úr þeim.
Bls. 34
Kjörið er að skipta nemendum í hópa þegar vinna á verkefnin á bls. 34. Gaman er að búa
til stangir með því að rúlla upp dagblöðum. Hver hópur fær það verkefni að búa til tvö ólík
þrívíð form með nokkrum jafnlöngum stöngum. Það skiptir miklu að ítreka að stangirnar
eigi að vera jafnlangar til að fá fram reglulegu formin píramída og tening. Nemendur geta
síðan skrifað lýsingar á formum sínum og þá má halda sýningu á formum allra hópanna.
Einnig má nota sogrör í stað dagblaðastanga þá tekur verkið mun styttri tíma. Nemendur
geta síðan svarað spurningum á bls. 34 eða líta má svo á að þeir hafi þegar svarað þeim
í verklegu vinnunni.
Bls. 35
Það breytir miklu að hafa þrívíð form til að skoða þegar vinna á verkefnin á bls. 35. Ef
þau eru ekki til í skólanum má finna viðeigandi pakkningar/kassa. Jafnvel þó ekki sé hægt
að finna allt er gott að hafa nokkur þrívíð form til athugunar. Verkefnin gæti verið gott að
nemendur ynnu tveir saman.
Bls. 36
Verkefnin á bls. 36 getur verið gaman að nemendur og kennari vinni saman. Þarna er verið
að skerpa á ýmsum hugtökum og greiningu á eiginleikum tvívíðra og þrívíðra forma. Gott
er að ræða bæði hvað formin eiga sameiginlegt og hvað skilur þau að.
Geisli 1A – Lausnir – © Námsgagnastofnun 2011 – 09072
..... Rúmfræði og þrívídd
31