Geisli 1A - Námsgagnastofnun

meta þær og finna fleiri leiðir. Ef búin hefur verið til veggmynd fyrir samlagningardæmi er
nú gott tækifæri til að búa til sambærilega mynd fyrir frádrátt. Dæmin á blaðsíðu 43 eru
æfingadæmi í frádrætti. Hvetja ætti nemendur til að búa til fleiri myndadæmi eins og dæmi
22 og leggja hver fyrir annan.
Oft er rætt um að leggja ætti meiri áherslu á að nemendur noti myndir og teikni við
lausn verkefna. Margir nemendur eiga auðvelt með að hugsa í myndum. Í verkefni 21 er
nemendum ætlað að tengja saman mismunandi tjáningarmáta. Þeir gætu teiknað peninga
til að sjá betur fyrir sér.
Bls. 45
Verkefni 23–30 er hentugt að vinna í töflureikni. Nemendur geta unnið tveir saman við
tölvu eða kennari og hópur nemenda vinna saman þar sem kennari stjórnar tölvunni
en nemendahópurinn tekur ákvarðanir og metur niðurstöður. Ætla má að þessi nálgun
krefjist þess að kennari hafi aðeins hálfan nemendahópinn. Markmiðið er að nemendur
sjái hvernig nota má töflureikni við samsetta útreikninga og hvernig það að vél reikni gefur
tækifæri til að skoða marga möguleika léttilega. Á vinnuspjaldi 31 eru líka dæmi sem gott
er að leysa með því að nota töflureikni. Margir Íslendingar nota töflureikni oft við vinnu
sína. Nemendur gætu hugsanlega gert könnun á því hvernig og hvort fólk notar töflureikni.
Bls. 46–47
Á blaðsíðu 46 er athygli beint að stærðfræði í íþróttum. Áhugavert gæti verið að skoða
hvernig nemendur nota sjálfir stærðfræði í íþróttaiðkun sinni eða við að fylgjast með
íþróttum. Eins gæti verið gaman að skoða áhugaverð met frá síðustu Ólympíuleikum. Einnig
er kjörið að fara út að hlaupa þekkta vegalengd og finna út hve langt nemendahópurinn
hefur hlaupið. Í spilum og þrautum er líka oft reiknað. Dæmi um slík viðfangsefni er að
finna á vinnuspjaldi 30.
Margföldun og deiling eru andhverfar aðgerðir. Dæmi 36, 37 og 38 tengjast því í töflunni
í dæmi 36 má finna svörin við dæmum 37 og 38. Sama hugsun er í dæmum 39 og 40
og hvetja ætti nemendur til að hugsa um þessi tengsl og nýta sér þau.
Gagnlegt er að taka eina kennslustund í að nemendur vinni í fjórum hópum sem sérhæfi
sig í samlagningu, frádrátt, margföldun og deilingu. Nota má verkefnin hér að framan
og hver hópur segir frá lausnum sínum. Þannig má draga saman áherslur kaflans á að
nemendur meti, áður en þeir leysa dæmi, hvaða leið þeir telji góða til að leysa dæmin og
að þeir hafi nokkrar leiðir á valdi sínu.
Bls. 48
Á síðustu blaðsíðu kaflans er annars vegar unnið með hugareikning og hins vegar vasareikni.
Gaman getur verið að setja upp keppni þar sem nemendahópnum er skipt í tvennt eða
tveir nemendur fengnir til að keppa. Kennari les síðan upp dæmi sem ýmist er fljótlegra
að reikna í huganum eða á vasareikni. Dæmin gætu verið: 4 + 10, 10 · 2, 100 + 3000,
125 : 25, 5 · 7. Svona keppni er góður undanfari umræðna um notkun vasareikna
og hvernig nemendur kunna ýmsar staðreyndir utan að án þess að hafa nokkurn tíma
meðvitað lært þær þannig. Flestir vita að 3 + 2 = 5 og að 7 + 3 = 10. Hvernig stendur á
því Leiðir við hugareikning eru margar en oft er gott að skrá hjá sér milliniðurstöður. Það
einfaldar oft útreikninga að búta tölur niður.
Geisli 1A – Lausnir – © Námsgagnastofnun 2011 – 09072
..... Reikniaðgerðir
37