ud#19 (25829)

Литературалы
сӥзем газет
№19 (25829)
2020-тӥ ар 21-тӥ куартолэзь 13
Куартолэзе вордскизы
16-тӥ куартолэзе 110
ар талэсь азьло Санкт-
Петербургын вордскиз
Ольга Фёдоровна Берггольц
(1910-1975) — ӟуч
кылбурчи, драматург,
журналист. Фашистъёсын
котыртэм Ленинградын
О. Берггольц
самой тодмо произведениоссэ
— «Февральский
дневник»,
«Ленинградская поэма»
— гожтӥз. Калыке
вӧлмиз кылбурысьтыз
«Никто не забыт, ничто
не забыто» чурез.
________
Туала искусство
Пыроно суред пушкы
Куартолэзьлэн пумаз
755 ар талэсь азьло
Италиысь Флоренциын
вордскиз Данте
Алигьери (1265-1321)
— кылбурчи, богослов,
«Божественная комедия»
поэмалэн авторез,
дуннеысь литератураысь
огез быдӟымез
мурт.
Библиотека
Национальной библиотекалэн
«Фейсбукысь»
вотэс бамаз
азьланьтӥське «Писатель
в шоке» проект. Шаерысьтымы
гожъяськисьёс
мадё, кыӵе книгаос
соосты абдратӥзы,
дунне шоры учконзэс
воштӥзы. Проектэ
пыриськизы ни писатель
но китай кылысь
берыктӥсь Вячеслав Малых,
кылбурчиос Даниил
Клепов, Татьяна Репина
но Максим Сентяков,
ВГИК-ысь студентка
Мария Чернавина.
«Паймем» писательёсын
онлайн пумиськыны луэ
котькуд средае 18 часын.
Премия
«Большая книга» премилэн
кузь списокез
ялэмын. Соин тодматскыны
луэ bigbook.
ru вотэс бамын. Туэ
премиез 15-тӥ ползэ
сётозы. 39 номинантъёс
пӧлын — Евгений
Чижов, Ксения Букша,
Дина Рубина, Захар
Прилепин, Михаил
Елизаров, Тимур Кибиров,
Валерия Пустовая
но мукет прозаикъёс.
Вормисьёс тодмо луозы
туэ июнь толэзе, 1-тӥ
инты понна 3 миллион
манет сётозы.
Арлы быдэ 18-тӥ мае
дуннеын пусъё Музейёслэсь
нуналзэс, ортче
«Музейёслэн уйзы»
акция. Туэ, вань мукет
бадӟым ужрадъёс выллем,
со вотэсын радъяськиз.
Музейын ужасьёс онлайн
амалэн экскурсиос ортчытъяло,
фондъёсысьтызы тунсыко
но шер пумиськись арбериосын
калыкез тодмато. Озьы ке
но калык, самоизоляциын пукыса,
музейёсы ветлэмлэсь,
искусстволэсь мӧзме ик. Соин
но, дыр, апреле мытэм «Изоизоляция»
флешмоб сокем
паськыт вӧлмиз.
Адямиос, дорысь котырзэс
уже кутыса, тодмо суредъёслы
тупась туспуктэмъёс
лэсьтыны ӧдъязы.
Кин ке огназ пуксе, кин ке
кузпалзэ, пиналъёссэ туспуксьыны
чортэ, тросэз
коӵышсэс я пунызэс суредэ
пырто. Та дырлы трос тодмо
художникъёслэн ужъёссылы
«копиос» лэсьтэмын
ини, пӧлазы Иероним
Босх, Фрида Кало, Эдвард
Мунк, Густав Климт, Рене
Магритт, Пабло Пикассо,
Ян Вермеер, Энди Уорхол,
Виктор Васнецов но мукетъёсыз.
Куд-огез туспуктэмъёссэс
серемес карыны
тыршо, вашкала улонысь
арбериосты туала югдуръя
тупато. Вашкала суредъёс
вылысь дуно пильыс занавес
интые вуж шобретэз ошо,
ӝужыт шляпа интые йыразы
ведра поно, горностай интые
гадь бордазы коӵышез
ӝипто. Мар дорын вань —
ваньмыз яра.
«Изоизоляция» проектэ
пыриськисьёс ужъёссэс соцсетьёсысь
огинъёсы люкало.
«Фейсбукысь» огинын, кылсярысь,
ог 600 сюрс адями пуке.
М. Гариповлэн «Гуртын гужем» суредэз.
«Изоизоляциез» синйылтӥз
Москваысь А. Пушкин нимо
музей но. Музей флешмобез
радъясьёсын валче ялӥз вожвылъяськон
— фондысьтызы
суредъёсты улӟытыны
ӵектӥз. Вормисьлэсь фотозэ
музейлэн юрт вылаз ошозы.
Дорын кема пукисьёслы
флешмоб эмъюм выллем луэ.
Керӟегъяськисьёс буйгало, серекъяса
но эшъёссэс шумпоттыса.
Флешмоб эшшо огпол
возьматӥз: искусство лулэз
бурмытэ.
Ми но ӵектӥськом та
флешмобе пыриськыны. Яратоно
удмурт художниктылэсь
суредзэ бырйыса, солы
тупась туспуктэм лэсьтэ но
#изоингож хештеген соцсетьёсады
пуктэлэ. Устооссэ ужъёсты
газетамы печатлалом.
________
Анастасия ШУМИЛОВА
Туспуктӥз ЧУДЬЯ ЖЕНИ