ud#19 (25829)

udmdunne.ru
+7 951 195 37 65
Люкиськон кыл
ТОДМО АДЯМИОС
№19 (25829)
2020-тӥ ар 21-тӥ куартолэзь 5
Адӟон шудэн артэ ветлэ...
Улонысь кошкиз удмурт кизили Виктор Шудегов
«Удмурт дуннелы» 100 ар тырмон дыръя В. Шудегов
Ижысь Шор площадьын перепеч пыжиз. 2015-тӥ ар.
Туспуктӥз Александр ГОРБУНОВ
Россиысь парламентаризмлы 110 ар тырмонлы сӥзем
котырес ӝӧк ортчиз газетлэн редакцияз. 2016-тӥ ар.
Туспуктӥз Владимир БЕЛОМОРСКИХ
Адӟон тодмоосыд вылэ
вуытозь, кайгулы уд
оскиськы. Но тани зэмос
учыр — кыӵе ке китай
чер басьтӥз яркыт удмурт
кизилиез Виктор
Шудеговез. Москваын
одӥгаз тужгес ӟеч больницаын
кылльыкуз.
Зэм, вӧсь пичигес ӧй луысал,
дыр, кыӵе ке мукет муген
кошкемезлэсь но. Укыр ӧжыт
асьмелэн сыӵе адямиосмы...
Виктор Евграфович мон
понна сузёнтэм кизили вал,
вожъяськыса учкылӥ соин
эшъяськыны быгатӥсь адямиос
шоры. Но Инмар мыным
но сыӵе шудзэ ыстӥз. Одӥг пол
кызьы ке сюри Федерация Кенешын
ортчись ужрадэ. Соку
Виктор Шудегов кивалтэ вал
парламентлэн вылӥ палатаысьтыз
дышетонъя, наукая,
культурая, тазалыкез утёнъя
но экологияя комитетэн. Удмуртиысь
адямиосты со ужан
кабинетаз ӧтиз. Вераськыны
ӝамдэ но дырыз ӧвӧл, ялан
жингыръяло, кытчы ке ӧтё.
Гань-гань кенешыны ӧз кылды,
но уг ваньмиськы ӧз шуы,
выльысь но пыралэ, пе, Удмуртиысь
адямиослы ӧсэ котьку
пась.
2008-тӥ арын Ижысь Эшъяськон
юртын «Удмурт кизилиос»
книгамылы презентация
радъямы, отчы ӧтим вань
геройёсмес. Конешно, мон ӧй
но оскылы, сыӵе йӧно адямиос
лыктозы шуыса. Но бадӟым
кивалтӥсьёс вуизы, пӧлазы
— Кун Думаысь депутат Виктор
Шудегов но. Со огназ соку
кузьымен лыктӥз. Редакция
сярысь трос шуныт кылъёс вераз
но маке быдӟа суред кузьмаз.
Лемлет пионъёсыз али но
тани борддорам, син азям...
Печатья но ивор вӧлмытонъя
агентстволэн соку кивалтӥсез
монэ соку зол миськиз: малы
ӧд вера, сыӵе адямиос лыктозы
шуыса, нимаз кылиськон,
утялтон инты дасяно вал. Мон,
зэм, ӧй малпа соку, геройёсмес
випъёслы но огшорыослы
висъяно шуыса, Виктор
Евграфович ассэ ноку но вылтӥ
ӧз карылы, котьку туж капчи
вазиськылӥз, юрттылӥз.
2015-тӥ арын газетмылы
удалтӥз 100 аръем юбилейзэ
паськыт пусйыны — февральысен
июнёзь. Ужрадъёсмес
мытӥм, Ижысь Шор площадьын
шулдыръяськыса,
перепеч пыжыса. Вылӥ куноос
пӧлын вал Виктор Евграфович
но — со но мыло-кыдо перепеч
пыжиз. Нош гужем милемын
ӵош нош ик юбилеймес пусйиз
Удмурт театрын — сӥё-дано
ужрадын. Шуныт кылъёссэ но,
коньдон кузьымзэ но ӧз жаля.
Но кузьым бордын ужпум ӧвӧл
— ми шӧдылӥм солэсь зэмос
гажамзэ, ужмес дунъямзэ.
Со бӧрсьы пумиськылӥм на
редакциын, кенешылӥм Интернет
пыр. Москваын улыса,
со ӧз вунэты Удмурт шаерзэ,
удмурт луэмзэ. Пыриськылӥз
отысь землячестволэн ужаз.
Гужембыт улылӥз Каракулино
ёросысь юртаз. Туэ, газетмылэн
вордскем нуналэныз
ӟечкылакуз, гожтӥз: «Туж
гажасько коллективдэс,
апрель пумын вуо Удмуртие,
лыктэлэ Кам дуре куное, аслам
рецептэя дасям чорыген
утялто...»
Мон уг тодӥськы кыӵе ке
политиклэн кулэмез понна
бӧрдылэмме. Виктор Евграфовичлэн
кошкемез туж шуккиз.
Малы ке шуоно мон сое укыр
гажасько вал. Визьмыз но лачмыт
сямыз понна гинэ ӧвӧл.
Солэн вал юн принципъёсыз.
Куке куд-огез, тӧл пельтэмъя
музэн пайда утчаса, партиысь
партие тэтчазы, со ялан вал
одӥг партилэн — «Зэмлыко
Россилэн» — адямиез. Озьыен,
оппозиционер. Тодӥсько на,
Виктор Евграфовичез одӥгеныз
юбилееныз ӟечкыласа,
газетэ ивор поттӥм. Мыным,
конешно, йӧттӥзы, но туннэ
но шумпотӥсько, шонер лэсьтӥ
шуыса. Соку со ӟечкыланэз
ачиз Виктор Евграфович ӧз но
адӟы, дыр, но адӟизы-лыдӟизы
сюрс лыдӟисьёсмы — малпасько,
асьме калыклэн ӧжыт
ке но данъяськон мылкыдыз
кылдӥз, сыӵе яркыт удмурт
адямимы вань шуыса!
Виктор Евграфович берло
аръёссэ ӧз ужа ке но, улонлэсь
бере ӧз кыльылы. Аслаз «Фейсбукысь»
бамаз со пуктылӥз
политикаысь, дышетонысь
сюлэмшугъяськытӥсь учыръёсъя
материалъёсты. Тулыс трос
саклык висъяз коронавируслы.
Возьматӥз самоизоляция дыръя
яратоно кузпалэныз ӵош пужъятэм
арысланзэ (лев). Висён, пе,
ортчоз, нош киуж синпельлы
кылёз. Тодмоосыз ӵектӥзы тодэ
ваёнъёсын книга гожтон борды
кутскыны. Вазь на, шуиз...
Эшшо Виктор Евграфовичлы
туж кельшылӥз аслаз фамилиез.
Со «шуд» кыллэсь кылдэмын,
шуылӥз. Со зэмзэ но туж
шудо вал: ужаз но, семьяяз но.
Жаль, 67 ар гинэ.
Мон туж ӧжыт тодыса вуттӥ
тӥ сярысь, Виктор Евграфович...
Туж гажасько. Тау ваньмыз
понна.
________
Зинаида РЯБИНИНА
Виктор Евграфович ШУДЕГОВ
(05.12.1952-16.05.2020)
Вордскемын Кез ёросысь Тортым гуртын. Тодмо политик, общественной деятель, Кун Думалэн
5-тӥ, 6-тӥ отчамъёсызлэн депутатэз, «Справедливая Россия» партилэн улосвыл ёзэзлэн
кивалтӥсез вал.
1980-тӥ арысен ужаз Удмурт кун университетын, ассистентысен кутскыса, профессорозь
будӥз.
1999-тӥ-2000-тӥ аръёсы — Удмуртиысь Правительстволэн Тӧроезлэн воштӥсез.
2001-тӥ арысен — Федерация Кенешын Удмуртилэн адямиез. 2002-тӥ-2007-тӥ аръёсы —
Федерация Кенешысь наукая, дышетонъя, культурая, тазалыкез утёнъя но экологияя комитетэн
кивалтӥсь.
2007-тӥ арын декабрьысен — Кун Думаысь дышетонъя комитетлэн кивалтӥсезлэн
воштӥсез.
Дасяз 100-лэсь трос законодательной кичӧлтонъёс.
Физика но математика наукаосъя доктор. Профессор. Россиысь Наукая академилэн академикез.
380 научной ужъёслэн авторзы. Россия Федерациысь вылӥ образованиысь дано ужась,
пусъемын «За заслуги перед Отечеством» орденлэн медаленыз но трос мукет данъетъёсын.
Улонысь кошкиз, коронавирусэн черласа, Москваын.
Кайгырон
Виктор Евграфович Шудегов тодмо политик, тодосчи
но туж ӟеч адями вал. Со туж яратӥз аслэсьтыз вордскем
шаерзэ, гажаса вералляз со сярысь мукетъёслы. Мыло-кыдо
пыриськылӥз землячествоямы ортчылӥсь ужрадъёсы, пумиськонъёсы.
Ми туж куректӥськом бӧлякмылэн улонысь
кошкемез пумысен, матысь адямиосызлы, семьяезлы чидан
но кужым сӥзиськом. Жаляса верано, сое асьмелэсь талаз лек
чер — коронавирус, соин йырин ӧз луы адями рад люкиськыны
но. Простить кар, Виктор Евграфович. Ми котьку тӥледыз
тодамы возёмы. Югдур тупатскиз ке, одно нош ик дэмен люкаськыса,
буре ваён ӝыт ортчытом.
________
Москваысь «Удмурт землячество»
огазеяськонысь бӧлякъёсыз