ud#19 (25829)

№19 (25829)
2020-тӥ ар 21-тӥ куартолэзь 15
Сэрттон-пертчон
Кылбуръёс но
«чурулникъёс»
Леонид Ившин кылбурчилэн
но тодосчилэн
«Визыласа бызе Лозо»
(6+) кылбур бичетэз
потӥз. Отын удмурт но
ӟуч кылъёсын кылбуръёс
люкамын.
Книгалэн нырысетӥ
люкетаз пыремын вордскем
палъёсын, Лозо шур
котырысь инкуазен данъяськон
мылкыдын тырмем,
пи нал дырысь дартъёсын
пӧлэстэм, егит
пилэн син маськон вакытысьтыз
лушкем малпанъёсыныз
герӟаськем чуръёс.
Котькудӥз гожъяськыны
йӧн дырись мурт та бордысен
кутске кадь. Вӧжогес
луэмезъя (быдэ вуэмезъя)
солэн дуннеез паськыта,
вордскем палъёсысьтыз
дышетскыны яке ужаны
палэнэ вамыштыса, выль
эшъёсын пумиськыса, солэн
тунсыкъяськонъёсыз но
тросгес, пӧртэмгес луыса
кошко. Ваньмыз со Леонид
Ившинлэн кылбур чуръёсаз
но шӧдӥське. Отысь
адӟиськомы гуртысь востэм
удмурт пияшлэсь нылъёсын
дӥсьтӥсьтэмгес луэмзэ
но, кусыпъёсты герӟаны
быгатымтэез пумысен ас
понназгес куректэмзэ-ӧпкелемзэ
но. Но со оске, солэн
но сюлэмызлы вазиськись
гажано нылмурт одно
ик шедёз шуыса.
Автор вала кылбуретлэсь
кабъёссэ-катъёссэ. Но
егит дыръяз гожъямъёсаз
волятон-тупатон интыосыз
вань на шуыса, шӧдӥське.
Малы ке но мон книгаысь ӧй
шедьты берло вакытэ кылдытэм
чуръёссэ. Быдэ вуэм
Марӟан лысву
Леонид ИВШИН
Ӝужась шундылэн тылсиез
Марӟан лысвуэз чильдытӥз —
Сизьым буёлэн кисьтаське,
Чебер но ворпо адӟиське.
Тазьы учкиськод ке — азвесь,
Мукет учкиськод ке — чигвесь...
Вамыш ке лэсьтӥд со пӧлтӥ,
Васькоз турын-куар мугортӥ...
Дораз матэгес лыктӥсько,
Асме со пушкысь адӟисько.
Мыным лушкемен кырмыштэ:
Я, учкы, пе, адӟы астэ.
муртлэн соос кужмогес но
яркытгес луыны кулэ.
Мон авторез егитгес
дыръяз гожтэм кылбуръёссэ
тупатъяны, выль сямен
учкыны уг косӥськы, но
бичетэз поттон азьын вань
кылбуръёсты эшшо сӥс пыр
лэзёно ик вал, оло.
«Визыласа бызе Лозо»
бичетлэн 2-тӥ люкетэз ӟуч
кылын кылбуръёс шуыса нимамын.
Ӟуч кылбуръёс — авторлэн
кӧняезлы ке удмурт
кылбуръёсызлы ик подстрочникъёс
шуыса учки.
Мукетаз люкетын Владимир
Семакинлэн, Александр
Ворончихинлэн но
Владислав Кирилловлэн ӟуч
кылысь берыктэм кылбуръёссы
печатламын. Кылысь
кылэ берыктонын пӧртэм
школаос вань. Кин ке оригиналысь
котькуд кылзэ берыктэ,
кылбур мукет кылын
но оригиналлы туж матын
мед луоз шуыса. Соку кылбурлэн
рифмаез-ритмез
но палэнэгес кыле ини, но
образной системаез туж
матын луэ. Сыӵе подстрочникъёс
(яке кызьы вералоз
вал Владимир Романов
кылбурчи — «чурулникъёс»)
оригиналлэсь кылзэ
тодӥсь тэм кылбурчиослы
юрт тэт луо ини. Тазьы берыктэмъёсты
туала аръёсы
тросэн пумитаськом эстон,
фин кылъёсысь удмуртомытэм
чуръёсысь.
Нош классической школалэн
куронъёсызъя кылбур,
выль кылэ выжыса но, рифмаё,
ритмо кыльыны кулэ,
образъёсыз но мед выжозы,
анай кылын лыдӟись мурт
сое капчиен мед лыдӟоз,
аслаз мед кароз. Мон ачим
классической берыктон
амал лы матынгес луисько
бере, Леонид Ившинлэсь
«меӵак» берыктэмъёссэ
Владимир Семакин но
Александр Ворончихин ӟуч
писательёслэн творчествоенызы
тодматскон вылысь
учки. Нош удмурт кылбурчилэн
Владислав Кирилловлэн
кылбуръёсыз 2 полэс берыктэмъёслы
пӧрмиллям:
Владислав Кирилловлэсь
удмурт кылбуръёссэ ӟуче берыктэм
Удмуртиысь калык
писатель Анатолий Демьянов,
бӧрысь ӟучысь удмуртэ
«меӵак» берыктэм Леонид
Ившин.
Котьма ке но, авторлэн
«Визыласа бызе Лозо» книгаез
тунсыко луэ нимаз кылбурчилэн
ки бервылыныз,
аспӧртэмлыко уженыз. Но,
кызьы шуи ини, книгаысь
адӟем потэ на вылэм Леонид
Ившинлэсь берло аръёсы
гожтэм оригинальной,
тунсыко чуръёссэ но.
________
Владимир МИХАЙЛОВ,
Россиысь но Удмуртиысь
Писательёслэн огазеяськонъёссылэн
ёзчизы
Лозо шуре
Ӵукна ик вазь туннэ вамышъясько
Яратоно шуре — Лозо — доры,
Векчи чорыгъёслы мон паймисько…
Шумпотонэн тырме сюлэм дары.
Шыпыт гинэ гылӟись интыетӥз,
Турын-куарен узыр ярдуръёстӥз
Лэзиськыса будо вож бадьпуос,
Лопыръяло азвесь вукарнанъёс.
Чагыр инмез чылкыт возьматыса,
Воринъяса бызе Лозо шуре.
Лул-сюлэмме пумен буйгатыса,
Йырам лысву кадь дун малпан пыре.
Ярдур кусыпъёстӥ визыласа,
Азвесь вузэ Лозо азьлань нуоз.
Кузь сюресэз капчи ортчылыса,
Чебер шаеръёсы со вуылоз.
Визь-кенеш
Куаӵак гожтӥсько,
вузэ ӵушисько
Толшорысен «Кенеш» журналын «Зорнамер но Занна»
романысьтым люкетъёсты печатлало. Кузь гожъямъёсме
солэсь азьвыл выльысь но выльысь учконо,
эскероно, тупатъяно луисько. Аслэсьтым гожъяськон
амалъёсме шараяме потӥз.
1. Удмурт кылын глагол гань-гань пуке веранлэн пумаз.
Но глагол бӧрсьысь бӧрсе предложениосын пумаз сылэ ке,
текст укыр огсыр, умме усьытӥсь луэ. Иське, лыдӟисез сайкатоно.
Глагол мед пуксёз азяз. Одӥг-ог мед пукоз шораз но.
Куддыр глаголэз пуктоно отчы, кытын со пуштросэз уг сура.
Ӵошатэ: 1) Утыр вал гидысь эшъёсыныз кузё потӥз. 2) Утыр
эшъёсыныз вал гидысь кузё потӥз. 3) Утыр эшъёсыныз вал
гидысь потӥз кузё. Вал гидысь эшъёс — пудоос, лэся? Нош гидысь
кузё — гидмурт? Стиль ласянь верано ке, ӟучомем гожъямъёсын
глагол олокытчы но пуксе. Куддыр озьы гожъяськем
потэ: суро кылын, суро улонэз возьматыса...
2. Синтаксисъя эшшо одӥгез чаклан: предложениос
пӧртэм быдӟалаё мед луозы. Куддыр веран, венгер постмодерн
романын кадь, нуйтӥськыса мед ӧръяськоз (укыр
кузёмытыны уг яра: удмурт кыл «пуштоз»). Куддыр — куаӵак
медло. Вакчи. Та быдӟа. Пӧртэмлык кулэ! Текст лыдӟисьлэн
йырсазяз зарезь кадь, тулкымен-тулкымен вордӥське. Эшшо
мон туж яратӥсько двоеточиез, кеськон пусэз, тиреез... Куд-ог
редакторъёс нош уг ярато, жаль.
3. Глаголъёслэсь дырзэс вошъяны луэ. «Мынӥз, лэсьтӥз,
пыриз...» — ваньмыз ортчем дырын, акыльтыны кутсконо
(урод рифмаен кылбурлэсь кадь). Фин берыктӥсь Эса-Юсси
Салминен вера: удмурт веросъёсты берыкъякуз, со чаклаз,
глагол ӵемысь ортчем дырысь туала дыре тэтча шуыса.
Фин кылын озьы гожъяны уг яра. Действие ортчем дырын
суредаське ке, озьы ик гожтоно. Нош удмурт кылын вошъяны
луэ, эскере: «Анна корка пыриз, дӥсьсэ куштӥз. Сюлмыз
тэтча, нылаш аслыз инты уг шедьты. Утыр коӵышсэ маялтэ,
соин вераське...» Татын ортчем дырез воштэ али дыр.
4. Удмурт кыллэн узыр луэмез пӧртэм куараосты
возьматӥсь, наречно-изобразительной кылъёс бордын.
Соос туж меӵкытэсь, яркытэсь. Тыршоно соосты тросгес
пыртылыны. Шуом, «аляк» интые — «эли-кеби», «жадьыса
выдыны» интые — «сучи-бечи выдыны», «секыт» — «латьлать»,
«кырсь» — «супыр-сап». Сыӵе кылъёсты мукет кылъёсы
берыкъяны секытгес. Удмурт кылмы кескич сямзэ озьы возьматэ.
5. Синонимъёсты ӵем кутӥсько. Кузь диалогъёсын «вера»
но «шуэ» кылъёс интые мае но уг гожъяськы: вазе, косэ, индылэ,
сюлворе, куре, маде, шарая, ивортэ, меӵкытэ, палькке, кольккетэ,
пырсъе, бӧтьыртэ, лабыртэ, серектэ, черектэ, кеське, юа,
берен вазе, шыпыртэ...
6. Улэп вераськонысь кылъёс, ӟуч кылъёс («ӟучизмъёс»),
выль кылъёс но пӧртэм «измъёс» юртто мылкыдэз, атмосфераез
суреданы. «Мынӥз, поди» гожтэме потэ ке, иське,
огшорыгес, дышетскымтэ муртэз суредаме потэ. «Мынӥз,
дыр» гожтыны быгатысал. Мон тодӥсько та кылэз. Эн тупатэ
монэ, редакторъёс. Мукетыз пример: «нылзы зӧкъяське» —
«бадӟымъяське» пуштросэн. Малы мон уйпал диалектысь
кылэз кутӥ? Малы ке шуоно мынам потэ возьматэме, син
азе тоӵ-тоӵ, таза мугоро мурт мед пуксёз шуыса. Лымшоръёс
понна «зӧк» возьматэ уго кӧй но паськыт луэмез. Кыӵе
героиня син азе пуксе? Бадӟымъяськыса кылле, зӧкмет!
Ярам, уг кылльы со, сылэ. Нош кылле ке, азьтэмгес, дыр.
Нош тӥ мар малпады?
7. Ӟуч кылэз пыртон — стилез висъян. Чылк-чылк удмурт
кыл — со классической произведениосысь литературной
кыл. Суро кыл — туала, вераськон кыл. Туала сериалъёсты
удмурт кылэ берыкъясалмы ке, одно ик ӟуч но англи, интернациональной
кылъёсты пырталлясалмы. Сотэк диалогъёс
искусственной, серемес потозы. Куд-огезлы таӵе «кыл кырсёмытон»
уг кельшы. Мон пумит ӧвӧл. Котькинлэн правоез вань
аслэсьтыз прозазэ, аслэсьтыз литературазэ кылдытыны.
8. Ӟеч гожъяськись — ӟеч редактор. Гожтэмез кӧня ке пол
лыдӟоно. Вань-а пӧлаз интыосыз, кудъёсыз номыр выльзэ
уг верало? Соосты ӵушоно, со ву. Газет вуэз уг яраты. Нош
куддыр ву — со ӵапак литература ик вань. Ческыт ву.
________
ДАРАЛИ ЛЕЛИ