news

Snippet
05-February-2018
Lasosiasyon Banker Sesel ( Seychelles Bankers Association ) in dir ki i en bon lide sa
diskisyon ant minister finans ek bann labank komersyal lo ki fason bann labank i kapab ed
plis dan devlopman lekonomi pei.
Me pour annan pli bon rannman, fodre ki Labank Santral i osi partisipe.
Sa se akoz sa labank ki regilater sa bann labank komersyal e se li ki sirvey e kontrol polisi
moneter dan pei pour fer sir ki okenn desizyon finansyel ki ganny pran pa an kontradiksyon
avek polisi sa labank.
Sa deklarasyon ti fer par Msye Norman Weber, tyermenn Lasosiasyon Banker Sesel letan i
ti pe donn pwenn vi sa lasosiasyon lo sa rankont ki ti fer Vandredi dan lasal konferans
minister finans ki ti annan pour bi ganny bann labank Sesel pour fer plis zefor pour kontribye
anver lekonomi e osi dan konstriksyon ouswa loan lakaz.
Miting ti dirize par Minis pour Finans, Komers ek Planifikasyon Ekonomik, Peter Larose,
akonpannyen par son sekreter prensipal Patrick Payet dan prezans Minis pour Lenfrastriktir,
Lakaz ek Transpor lo Later Charles Bastienne, ek bann reprezantan labank tel ki Barclays
Bank, Nouvobanq, Baroda, Labank Devlopman Sesel, Mauritius Commercial Bank (MCB),
parmi lezot.
Minis Larose ti dir ki bann rankont koumsa i en keksoz ki ‘ongoing’ e alor i plis ki ler ki tou
lede parti i met lide ansanm pour fer sir ki zot travay an partenarya.
Msye Weber ti donn pwennvi labank lo en tel rankont konm swivan:
“An prensip i en bon lide pour labank konnen ki mannyer zot pou reponn bann demann ki
gouvernman i anvi fer. Minister Finans son rol se polisi finansyel ki pou ed lekonomi devlop
dan en serten direksyon. Labank komersyal zot rol i anba Labank Santral pour esey atenn
sa bann lobzektif ki sa labank i mete. Labank Santral i sa regilater prensipal e en
lenstitisyon moneter. Savedir son lentere se polisi moneter. Lobzektif prensipal Labank
Santral se stabilite dan pri. Savedir zot pou servi tou bann aksyon ek lenstriman moneter
neseser pour atenn sa lobzektif. Alor zot kontrol sa bann labank pour fer sir zot kontribye
anver sa lobzektif,” Msye Weber ti eksplike.
I ti dir ki si minister finans Ii i ‘set’ en ‘path’ pour bann labank, i pa kapab an konfli avek sa
‘over-riding policy’ ki Labank Santral i annan.
“E minister finans pa kontrole labank. Se Labank Santral ki kontrol labank. Si minister i dir
bann labank fer serten keksoz ki kont sa ‘ over-riding policy’ ki Labank Santral in met lo zot,
bann labank pa kapab fer. Zot bezwen premyerman ganny en pwennvi Labank Santral e si
sa labank i dakor avek, la nou ava al dan sa direksyon, ki anliny avek polisi stabilite pri. Alor
i en bon lide me selman fodre fer li dan konteks ki Labank Santral i demande,” Msye Weber
ti dir.
Msye Weber i krwar ki Labank Santral ti’n devret ganny envite dan sa miting akoz i dir par
egzanp si bann labank i ganny demande pour servi sa larzan ki’n ganny depoze avek zot
pour pret gouvernman oubyen pour pret en serten sekter, dizon lakaz ou swa pti biznes,
fodre Labank Santral i kapab dir ki son lefe i pou annan lo son polisi moneter.
“Par egzanp si atraver minister finans bann labank pe met plis larzan dan lekonomi, i kapab
fer en devaliasyon dan le sans ki i annan tro bokou roupi an sirkilasyon. Savedir Labank
Santral fodre i annan en pwennvi lo la. I kapab dir avek minister finans pour pa pret tro
bokou larzan ouswa pa ‘issue’ tro bokou ‘currency’ ki pe kre lenflasyon, ki kont lobzektif
Labank Santral vi ki i pa oule lenflasyon. Se sa ki mon pe dir ti a bon Labank Santral ti
prezan,” Msye Weber ti azoute.
I ti kontinyen an dizan ki laplipar labank i pret larzan ki kliyan i depoz avek zot e non pa zot
prop larzan.
“Savedir i napa swa pour li pret sa larzan avek nenport dimoun ki fer li plezir. Fodre i protez
sa ‘ depositor’ e fer en serten kantite larzan pour li kapab prete. Prezan si minister finans i
dir i ti a kontan pret sa larzan pour sekter prodiktiv ouswa sa bann pti biznes ouswa sekter
lagrikiltir, fodre swa zot met en plan ouswa en polisi pour ankouraz sa bann pti lendistri servi
son polisi ekonomik tel ki taks par egzanp. Si Labank Santral i dir in fer lentere desann e sa
i annan pour fer avek tou keksoz, konsonmasyon pou osi ogmante e pa zis prodiktivite.
Definitivman Labank Santral pa oule konsonmasyon ogmante akoz problenm deviz etranzer
par egzanp, ouswa pei pe enport marsandiz ki ti kapab prodwi Sesel, savedir ou pa pe fer
en polisi pour ankouraz prodiktivite me enn pour keksoz vin meyer marse. Alor i pa pou
‘achieve’ sa prodiktivite ki minister finans i anvi fer,” i ti eksplike.
Alor Msye Weber i krwar ki i en bon lide ki toultan i annan kominikasyon ant Labank Santral
ek Minister Finans.