Actes et documents anciens intéressant la Belgique conservés aux ...

— 42 —
nos tairons tant k'à ore et ke nous arons veu comment
vous nous en adrecerés.
Sire, tout au commenchement, loys et coustume
est vostre usée par toute Flandres que la u li sires
et eschevin metent leur assens, que c'est loys.
Sire, quant aucliun malfaiteur font en ceste ville
chose ki face à amender, par l'assens de vous et de
celui qui en vo liu est, et par l'assens d'eschevins,
on le banist tant de tans que au meffait apartient, de
Lille et de le castellerie, et adont disons nous kil
est banis par loy tant que ses termes dure.
Sire, vous et vo baillieu leur rendent le, castellerie
et le ville juskes as portes, le quel chose on ne puet
mie faire kil puissent ne soient demorant en le castellerie.
Sire, pluisseurs fies, le vous avons monstre ke vous
commandiés à vos baillis ke il leur renonçasent, et
ke il widaissent le castellerie, et wardaissent leur
banison; et après ces commandemens, on nos tenoit
mauvaisement, ne savons par cui çou est, mais il
nous sanle que li sièremens que vous avés mis à le
loy de le ville warder, et li sièremens de eschevins
ni sunt mie bien wardet.
Sire, bien est voirs et che savés vous, que les
bourgois, les bourghoises, les enfans de bourgois, ne
leur meules ne leur cateus, on ne puet prendre ne
arriester pour fourfet kil facent dedens le castellerie,
se chou n'est par enseignement d'eschevins de
Lille; et meesmement bien a esté jugier en le court
de chaiens par les plus grans hommes de Flandre,
ke li bourgois ne leur meule ne leur cateil ne sunt
mie à jugier à eaus.
Sire, pour lequel chose nous vous monstrons que
vo bailli ens es cas deseure dis, nous voellent faire
plaidier ailleurs que par devant eschevins; pour coy