volumes xlix. - Archive ouverte UNIGE

685 SUR L'EPITRE AUX CORINTHIENS. 686
et que cela nous suffise: car il est assez sage pour
nous deolarer ce qui est bon et iuste: et n'imaginons
point une perfection plus haute que celle qui est
contenue en la Loy; car c'est un blaspheme diabolique:
et neantmoins nous voyons comme le
monde y a procédé, et encores auiourd'huy on en
verra plusieurs endurcis en ceste fantasie infernale,
qui veulent avoir leurs devotions, et s'y tenir. Tant
y a que Dieu reiette tout cela, et nous monstre
qu'il s'est réservé l'authorité de monstrer ce qui
estoit bon. Ainsi tenons nous simplement à la Loy,
et notons bien que sainct Paul non sans cause dit
ici qu'il ne veut point mettre les consciences en
servitude, et faire des scrupules, comme si une
chose n'estoit point licite. Notons donc que l'usage
des viandes, puis qu'il nous est permis de Dieu ne
peut estre condamné des hommes.
Or combien que ceste doctrine ait son estendue
plus au long et au large, tant y a que l'espèce que
touche ici S. Paul, mérite bien d'estre notée: car
nous voyons quelle superstition il y a eue quant
aux viandes comme elle demeure encores en la
Papauté. On cuidera servir Dieu en s'abstenant
de manger chair au vendredi, gardant une veille de
feste, faisant caresme. Cependant si on regarde,
qui a inventé cela, ce sont les hommes, voire avec
une audace diabolique, quand sur peine de péché mortel
ils ont défendu qu'on ne mangeast point de chair
en un tel iour. Et qui leur a donné ceste licence?
car ils ne sQauroyent pas créer une mousche. Comment
donc défendront ils de manger d'un boeuf?
Ainsi donc notons ceste doctrine de S. Paul, quand
il nous monstre qu'il nous est licite selon Dieu
de manger de toutes viandes qu'on nous présente.
Et pourquoy? Car la terre est au Seigneur (dit-il)
et la plenitude d'icelle. Il prend ce tesmoignage du
Pseaume vingt quatrième, là où le Prophète n'a point
voulu parler de chair, ne de poisson : mais distinguer
simplement entre l'Eglise de Dieu et le reste des
hommes, et les fils d'Adam : et par comparaison il
veut magnifier la grace que Dieu a fait à tous
fidèles, quand il les a adoptez et recueillis pour
estre de sa maison. Voyla (dit-il) toute la terre
appartient au Seigneur, il a créé en general tous
hommes. Pourquoy maintenant ha il sa montagne
en Sion? Pourquoy est ce qu'il y a un peuple
séparé qui l'adore, reclame son Nom, et luy est
sanctifié? Nous voyons que cela ne vient point de
nature, mais qu'il le faut attribuer à une bonté
gratuite de Dieu: car autrement nous serions semblables
à tout le genre humain, et nostre condition
seroit du tout pareille: veu que nous sommes tous
de nature maudits et prophanes. Dieu donc nous
pourroit à bon drôict tous reietter: Et ainsi cognoissons
une bonne admiration de Dieu, de ce qu'il
luy a pieu nous choisir à soy. Yoyla l'intention
du Prophète. Maintenant sainct Paul applicque ce
tesmoignage à son propos : et non sans cause. Car
le Prophète a usé de ce mot de Plenitude, pour
monstrer et signifier, que tant les hommes que tout
le reste des biens dont le monde est rempli, est à Dieu.
Or on peut recueillir de ceste sentence que puis que le
tout est à Dieu, il n'y a rien donc de poilu. Et ainsi les
hommes pourront user des viandes, voire sçachans à
quelle fin et usage Dieu les a ordonnées: c'est que
nous en soyons nourris et sustentez. Par ce moyen
nous voyons que sainct Paul n'a point abusé des
mots du Prophète, mais a monstre que vrayement
il nous est licite de recevoir ce qui nous est offert
de Dieu, et dédié à nostre nourriture. Et pourquoy?
Car l'autheur sanctifie le tout: c'est àsçavoir
Dieu, de la main duquel tout bien procède, et lequel
nous monstre qu'il n'y a nulle de ses creatures
qui ne nous soit bonne. Si on allègue là dessus
que nous sommes maudits en Adam: la response
est facile: car sainct Paul adresse son propos aux
enfans de Dieu qui sont remis en la possession de
laquelle nous tous, entant qne nous sommes enfans
d'Adam, avons esté déboutez. Il est dit au Pseaume
huitième, que Dieu avoit tout assubieti à l'homme.
Tant y a neantmoins que maintenant nous ne
méritons pas de manger une seule miette de pain,
ne boire une goutte d'eau. Car il dit que c'est
l'héritage des enfans de Dieu, que de iouir de tous
les biens qu'il a créez : et nous sommes bannis de
sa maison, nous sommes désavouez de luy, tellement
qu'il ne repute pas que nous soyons dignes
d'estre nourris entre les creatures. Il faudroit donc
que nous fussions privez de tous biens. Et de faict,
il est vray que telle est nostre condition à cause
de la corruption qui est en nous par le péché
d'Adam : mais ce tesmoignage là est applicque à la
personne de nostre Seigneur Iesus Christ, d'autant
qu'il nous a restituez en la iouissance dont il est
là parlé. Ainsi en ce passage, non sans cause
sainct Paul dit que tout est licite aux fidèles, pour
ce qu'ils sont restablis par le moyen et par la grace
de nostre Seigneur Iesus Christ, à ce qu'ils puissent
boire et manger pour leur nourriture, cognoissans
qu'en cela Dieu se monstre leur Père, et qu'il
ratifie l'adoption qu'il a faite d'eux, c'est ce que
nous avons à noter en ce passage.
Maintenant donc nous voyons que quand il est
question de boire et de manger, il ne faut point
s'amuser à ce que les hommes ont déterminé ou
iugé: car il n'est pas en eux de nous imposer aucune
loy, ne de nous mettre ioug ou fardeau sur
le col: contentons nous d'obéir à nostre Dieu, et
de ne rien usurper outre son vouloir et congé.
Mais quand il nous permet ceci et cela, cognoissons
que le tout nous est licite. Et pourquoy? Nous
avons bon guarant, puis que la liberté que nous
46*