volumes xlix. - Archive ouverte UNIGE

771 SERMONS 772
faut monter pins haut. Nous prendrons une goutte
de vin: ce n'est point pour la vie présente, ce n'est
rien qui conoerne le monde. Voyla donc comme
ce qui se fait entre les Chrestiens, les doit tellement
attirer en haut, qu'ils oublient tout ce qui est du
corps et de ceste vie caduque. C'est ce que nous
avons à retenir,^ afin que quand nous venons à recevoir
la saincte Cène, nous soyons tellement disposez
que nous sçachions que Dieu nous apelle à
soy, et veut que nous soyons compagnons des Anges.
Car par ce Sacrement nous sommes associez avec
eux, pour estre nourris de noStre Seigneur Iesus
Christ, qui est leur vie comme la nostre. C'est
donc le profit qui nous revient de ce passage quand
S. Paul dit que nous avons les maisons pour boire
et pour manger, et qu'il faut que le Sacrement nous
retire hors de ces choses basses et corruptibles: car
si nous y demeurons il -y aura une trop longue
distance entre Dieu et nous.
Or s'il n'est point licite de mesler son repas en
quelque sobriété qu'on le prene, parmi la Cène de
nostre Seigneur Iesus Christ; quand on y apportera
d'autres vanitez, qui seront plus enormes beaucoup,
cela sera-il supportable? Comme quelquefois on
verra des pompes au Baptesme en la Papauté, que
là il n'est question que d'ambition et orgueil pour
se faire valoir: il semble qu'on vueille mettre ces
pompes là en avant pour anéantir ce qui estoit de
Dieu. Et cela doit bien estre poisé de nous: car
il n'a pas tenu à des galans, qu'ici nous n'ayons eu
parmi le Baptesme de Iesus Christ les tabourins et
halebardiers. Et de faict, on les a veu venir ici
profaner le temple de Dieu, et ceste confusion là
a duré iusques à ce que ce bon Dieu ait purgé la
ville de ceste ordure, de ces diables là qui taschoyent
de tout pervertir, et qui meritoyent, non point de
retourner aux superstitions des Papistes, mais d'estre
comme chiens et pourceaux sans nulle Chrestienté
ne religion. Comme aussi il ont voulu mettre ici
une Turquie, voire, et des choses encores plus
enormes. Car quand cela seroit, ne seroit-ce point
une chose beaucoup pire et plus detestable que le
boire et le manger que met ici S. Paul : mesmement
quand on le prendroit en sobriété et temperance?
Qu'est-il donc question de faire ? Que nous soyons
despouillez des choses de ce monde, afin d'estre
amenez à Dieu. Et de faict, quand on nous presche
l'Evangile de nostre Seigneur Iesus Christ, et qu'il
nous a laissé un thresor si inestimable, comme est
la sainct Cène, nous devons bien regarder d'en
faire nostre profit. Et quand nous penserions bien
à cela, nous ne prendrions pas le loisir d'y mesler
les affaires du monde.
Or au reste, quand il adiouste que les uns sont
yvres, et que les autres meurent de faim, veu que
pour le moins ils sont là à demi-affamez: par cela
nous voyons comme un abus attire l'autre, et Dieu
condamne tout ce qui est ainsi inventé des hommes :
et à la fin on voit qu'il ne peut apporter que mal
avec soy. Il est vray que ceste cérémonie du commencement
avoit esté mise sus, sous ombre que
les aumosnes se faisoyent là: mais cependant les
riches ont voulu là se nourrir à leur aise, et gourmander
tout leur soul, et les poures ont esté là
destituez. Or puis qu'ainsi est, cognoissons que
quand nous venons en l'Eglise (comme S. Paul
conclud) il nous faut prendre des affections toutes
nouvelles : car quand nous sommes là unis ensemble,
cela nous doit monstrer pour tout le temps de
nostre vie, qu'il faut qu'un chacun secoure à ses
prochains, comme une main du corps sera preste
de secourir le pied. Voyla donc à quelle condition
nous sommes assemblez. Car aussi ce que nous
faisons une fois, et pour quelque temps, nous doit
servir pour tous les iours de nostre vie, et nous
doit inciter à nous tenir en telle union, qu'un chacun
s'employe pour ses prochains. Car que sera-ce
quand nous protesterons que nostre Seigneur Iesus
preside au milieu de nous, que nous sommes ici en
son Nom pour ouir sa Parole: si cependant nous
ne sommes esmeus nullement d'affection d'amitié
et d'humanité les uns envers les autres? Que serace
quand nous apporterons ici nos haines, et nos
rancunes, et que nous serons envenimez les uns
contre les autres? Que l'un pensera comme il pourra
tromper les simples: l'autre regardera comme il
pourra attraper le bien d'autruy. Et neantmoins
cela se fait ordinairement. Quand nous venons au
temple, y venons nous estans purgez de toutes
haines, et de toutes choses qui sont contraires à
ceste union de laquelle parle ici sainct Paul?
Hélas, il s'en faut beaucoup. Mais, (comme i'ay dit)
il y en a, cependant qu'on presche, qui pensent à
leurs rapines, à leurs tromperies, comment ils pourront
circonvenir quelques simples, attraper à leurs
filets et ceci et cela. Or voyans que tels vices
sont enracinez en la nature humaine, et que les
hommes n'en sçauroyent estre purs, sinon en bataillant,
que devons nous faire, sinon de bien observer
ce qui nous est ici monstre par S. Paul?
Quand donc nous venons ici, que nous apprenions
que nostre Seigneur nous assemble, afin
que nul ne mesprise ses prochains: mais qu'en toute
humilité nous communiquions les uns avec les autres,
comme enfans de Dieu. Il est certain que la pasture
que nous recevons au temple est beaucoup plus
précieuse que tous les banquets de ce monde. Et si
en un banquet on est assis à une mesme table : on
dira, Et bien, encores que cestuy - là soit plus
honorable que moy, tant y a qu'il n'a pas desdaigné
de me recevoir à sa table: i'ay esté assis à la
premiere table, et nul n'a esté honoré plus que moy.