Vettvangsnám í kennaramenntun og samstarf við starfsvettvang

3. Vettvangsnám í kennaranámi
Vettvangsnám er sá hluti í námi kennaranema sem fer fram á vettvangi, í leik-, grunn- eða
í framhaldsskólum. Í vettvangsnámi fá nemar tækifæri til að tengja saman fræði og
framkvæmd. Þar gefst færi á að prófa þá þekkingu og kunnáttu sem kennaranemar hafa
aflað sér í háskólanáminu. Gert er ráð fyrir að kennaranemar nýti sér reynslu sína á
vettvangi til að öðlast verklega sem og fræðilega þekkingu, efla faglega sjálfsmynd og
þróa starfskenningu sína. Í vettvangsnámi er að því stefnt að kennaranemar kynnist
skólastarfi þar sem bókvit, verksvit og siðvit eru ein samofin heild.
Samkvæmt mati starfshópsins eru meginmarkmiðin með vettvangsnámi í kennaranámi
eftirfarandi:
• Að nemendur fái sem bestan skilning á öllum hliðum skólastarfsins, tækifæri til
að læra í starfi og reyna í verki þá fræðilegu þekkingu er þeir öðlast í bóklega
hluta námsins, með því að flétta saman fræði og starf og skilja hvernig þetta
tvennt þarf að fléttast saman í órjúfanlega heild. Að nemendum séu tryggðir
möguleikar til að ná þeirri verkleikni sem nauðsynleg er til þess að geta uppfyllt
þær kröfur sem kennarastarfið útheimtir og þar með framfylgt af fagmennsku
þeim lögum sem þeim er ætlað að vinna samkvæmt.
• Að nemendur öðlist það persónulega öryggi sem fagmanni er nauðsynlegt til þess
að ná árangri sem er forsenda starfsánægju.
• Að nemendur öðlist færni í samvinnu og samstarfi, temji sér umburðarlyndi og
fordómalaus viðhorf og hafi manngildis- og jafnréttissjónarmið ávallt að
leiðarljósi.
Menntun kennara er, að mati starfshópsins, samstarfsverkefni kennaraháskóla annars
vegar og leik-, grunn- og framhaldsskóla hins vegar. Á vettvangi skólans öðlast
kennaraneminn reynslu og innsýn í skólastarfið og í kennaraháskólanum fær hann
tækifæri til að vinna úr reynslu sinni og skoða hana í fræðilegu ljósi. Reynsla
kennaranema á vettvangi hefur áhrif á það hvernig hann túlkar fræðin og byggir upp
skilning sinn. Neminn nýtir sér jafnframt fræðilega þekkingu til að móta starfshugmyndir
sínar. Þannig verður fagþekking til með gagnkvæmu samspili háskóla og starfsvettvangs.
23