Vettvangsnám í kennaramenntun og samstarf við starfsvettvang

9. Að lokum
Hér hefur verið lýst tillögum starfshóps um vettvangsnám sem brautarstjórn
kennarabrautar skipaði í byrjun september 2007. Tilefnið var breytt skipan vettvangsnáms
samfara breyttri skipan kennaranáms í KHÍ. Þegar hópurinn tók til starfa höfðu fyrstu
skrefin verið stigin þar sem búið var að gera samninga við um 80 leik- og grunnskóla um
að vera heimaskólar ákveðins hóps kennaranema. Starfshópurinn einsetti sér að fjalla
heildrænt um vettvangsnám og ná utanum sem flesta þætti. Það kann að hafa orðið til
þess að sumir sakni nánari útfærslu á framkvæmd ýmissa þeirra tillagna sem settar eru
fram í þessari greinargerð. Sumar tillagnanna þurfa að fá tíma til að þróast eftir því sem
reynsla verður til en aðrar þarfnast frekari ígrundunar og vinnu og er þá lagt til að
stofnaðir verði starfshópar til að vinna nánari tillögur.
Yfirlit yfir helstu tillögur er að finna fremst í þessari skýrslu, en um þær er fjallað í
meginmáli skýrslunnar. Þær beinast einkum að því að styrkja samstarf KHÍ og
starfsvettvangs um kennaramenntun með gagnkvæman ávinning og ábyrgð að leiðarljósi.
En tillögunum er jafnframt ætlað að skýra boðleiðir og verkferla um eitt og annað sem
tengist vettvangsnámi og samskiptum við heimaskóla.
Starfshópurinn var stór og skipaður fólki með ólíkan bakgrunn og sjónarmið sem
endurspeglaðist í frjórri umræðu og virkri þátttöku allra í störfum hópsins. Hann skilar
tillögum sínum til brautarstjórnar kennarabrautar sem ákveður næstu skref í vinnunni.
Það er von fulltrúa starfshópsins að þessi vinna nýtist sem framlag í áframhaldandi þróun
kennaramenntunar.
54