ud#51 (25861)

№51 (25861)
26 2020-тӥ ар 30-тӥ толсур ЛЫДӞИСЬКОН СИГ
Роман
Кизили ныл
Фёдор Пукроков
Кыкетӥ люкет
(Кутсконэз 46-тӥ номерын.)
Чай юыса-мараса, шур дуре
визнаны потӥ. Бакча берамы
вуи но — куажые куаразэ сётӥз.
Сюлмам выльысь шунытак
луиз. Нош кытын ай та? Кенер
дурысь турын со виын вырӟиз.
Собере турын пӧлысь йырзэ
ӝутӥз но чульк! учкыса сылэ.
— Уроме, — вазисько солы,
— чаль дорам, мон тонэ вешало,
мусояло.
Нош ик уг лыкты. Дасо вамышлы
сяна, дораз но уг лэзь,
шумприч пегӟе. Мар-о, мыным
но уг оскы-а, мар-а. Вӧсь каро
кожа?..
Зэмзэ ик, ваньзэ тае кинлы
ке мадь вылэм. Но уз, уз
оске, уз валалэ... Ма, школаын
но монэ уг валало — ушъяськон
понна «витьёс» басьясько
кожало, лэся. Куд-огез нош со
валлин шорам воксё кырыж
учкылэ. Но ведь мон ушъяськон
я вылтӥяськон понна «витьёс»
уг октӥськы — котьмае
тодэме потэмен. Ӵапак соин
ик яратонтэм дышетӥсьёслэсь
но вань верамъёссэс пелям тырисько.
Иське, вань юанъёссылы
но валэктыны быгатӥсько.
Котьмае тодыны тыршысалзы
ке, эшъёсы но отличникъёс луысалзы.
Куддыръя мынэсьтым юало,
туж-а, пе, умой быдэс школаын
«нырысетӥ дышетскись» луыны?
Урод ӧвӧл, но соин ӵош ик
мар-о пӧртэм умоез? Нокинэн
ӵошатскыны. Аслэсьтыд малпанъёстэ
ӵошатыны нокинэн.
Минутлы быдэ кенжись юанъёсын
вазиськыны нокинлы.
Ялан дышетӥсьёслэсь гинэ
юалляськод-а? Ма, соос но
кытӥяз уг валэкто. Оло уг тодо,
оло... валамтэ улэ карисько.
Ӵемгес озьы луылэ, улонысь
шуг-секытъёс, «лэчыт» ужпумъёс
сярысь юалляськыкум.
Куддыр юамме ик уг кыло кадь.
Зэмзэ вераса, монэ гуртын
но кытӥ-кытӥ уг валало. Пичи
дыръям (соку ай уг дышетскиськы
на вал) дунне быронлэсь
кышкаса курадӟыкум ик,
шуом. Со сярысь пыр-почгес
мадьытэк ӧвӧл.
Мон туж яратылӥ урокъёссэ
лэсьтӥсь апае вӧзын
пукыны. Книгаосысьтыз суредъёссэ
учкылӥсько, букваосты
йӧндырисько, оломар но
юалляськисько. Сюлэм вылаз
усьыса, лэся, кытӥяз «эн мерскы,
эн люкеты» шуэ ке но, со
тодэмзэ валэктыны тырше.
Озьы мон школае мынэмелэсь
азьло ик, лыдӟиськыны,
гожъяськыны, лыдъяськыны
быгатэм гинэ ӧвӧл, мае ке-мае
ке йӧн-йӧн тодӥсько ни вал.
Одӥг пол, озьы пукыкумы,
апаелэсь географизэ кутӥ.
Лисъян сяменым сыӵе суредзэ
адӟи: адями музъем пуме вуэм
но, инбам сьӧры йырзэ поттыса,
кытчы ке учке. Мынэсьтым
малпанме тодыса кадь суредаллям.
— Map меда отын? — вази
апаелы. — Мынам но, Музъем
пуме вуыса, озьы учкеме потэ.
Но апае монэ копак
абдратӥз: Музъем, пе, чик но
тэркы кадь ӧвӧл, со, пе, бадӟым
туп кадь. Мон нырысь ӧй оскы.
Угось песяе шуылӥз, Музъем,
пе, тэркы кадь, со бадӟым ошлэн
сюр йылаз мертчиськемын,
ош, пе, куинь бадӟым чорыгъёс
вылын сылэ, нош соосыз
бадӟым ву вылын уяло. Музъемез
возись ошлы сӥзьыса, пе,
ньыль арлы огпол, секыт аре,
ошез вӧсяло. Ошлэн марлы ке
вожез потэ ке, со, пе, сюрыныз
сэзъялтэ но вань Музъемез зуркатэ.
Мынам тодэме потылӥз,
нош мар вылын возиське со
бадӟым ву? Песяй азьчиньызэ
ым ваменаз понэ, кӧня ке отын
возе но, берен басьтыса, шуэ:
— Со сярысь юалляськыны
уг яра, Инмэрлэн вожез потоз.
Мон тӧр шор сэргы пуксисько
но малпаськисько,
малпаськисько. Тазьы ик син
азям пуктӥсько: бадӟым ошлэн
сюр йылаз тэркы кадь
Музъем, ош азь пыдъёсыныз
бадӟымлэсь бадӟым чорыглэн
тыбыр вылаз сылэ, нош
бер пыдъёсыз — нимаз-нимаз
кык мукет чорыгъёс вылын. Та
чорыгъёс вуэтӥ уяло. Нош со
ву кудмурда меда? Map солэн
пыдэсаз — пумтэм-йылтэм
бадӟым Музъем-а? Нош соиз,
бадӟымез, Музъем ма вылын
возиське? Нош ачиз возись ма
вылын? Эх, пумаз-йылаз уд ву,
йырыд поромоз...
Нош табере тани апае шуэ,
со, пе, чик но тэркы кадь ӧвӧл
— туп кадь питырес. Ай ӧвӧл
— быгылес! Питырес — со эгес.
Кор пуклё — погылес, ӝӧк —
котырес, нош шар — быгылес.
— Бон Музъем быгылес
ке, солэн улӥ палаз кемдэм
адямиос отысь тюалозы ук! —
серектӥ мон.
— Эн серекъя, — шуиз апае.
— Кызьы магнит кортэз ас бордаз
кыске, озьы ик Музъем но
вань арбериосыз бордаз кыскыса
возе. Соин ик нокин нокытчы
уг усь.
Уг, талы нокызьы оскем уг
пот. Магнитэз укыр кужмо ке
шат...
— Ярам, нош мар бордын со
возиське? Ошлэн сюраз ик-а
мертчемын?
Суредаз Менсадык ГАРИПОВ
Ӧвӧл, пе. Музъем Шунды
котыртӥ берга. Нокыӵе думеттэк-мартэк.
Шундылэн, пе,
Музъемлэн кадь ик, магнитэз
вань. Ӵапак со магнит ик Музъемез
ас палаз кыскыса возе.
Огкемын.
— Нош ачиз Шунды ма бордын
возиське?
Номыр бордын, пе, уг — огшоры
лоба но лоба.
— Кызьы озьы... уг? — пайми
мон. — Уг ке, озьыен, со
кытчы ке усе...
Соку ик син азям пуксиз
Сирпошур тыметэ (ма, ошмесэ
но) кымаськем инбам. Отчы
учкыны ик шурдыт — усид ке,
со дунне пыдсысь нокызьы потыны
уд быгаты ни кадь. Собере
— мукет суред: Музъемен,
Толэзен, Шундыен валче отчы,
Дунне пыдсы, усиськом. Кин
тодэ, кудмында кылиз на, со
пурты пыдэскы вуытозь. Оло
кӧня ке ар, оло кӧня ке нунал,
оло нош, тани-тани шуккиськом
ини?..
Мынам ымпушкы ик
кӧсэктӥз. Нош апае нокызьы
уг вала, малы мон пӧсекъяны
кутски.
— Кызьы тон уд валаськы,
оло, асьмеос пазьгиськиськом
ини?! — мон копак бӧрдон калэ
вуи.
Со ке... уг, уг вала. Озьы
ик бадӟым апае но ӧз вала,
серекъяз гинэ. Нош анаелэн
вожез ик потӥз:
— Кыӵе, мар дунне бырон?
Ма токма супыльтӥськод?..
Песяй гинэ кылиз на.
Но солы поттылыны мон
ӧй дӥсьты ни. Уйзэ изьыны
выдӥм но, синме кыньыса гинэ
вуттӥ — азям пуксиз яркыт кизилиё
инбам. Соку ик шӧдыны
кутски: усисько. Кизилиос
вылӥе кылё, нош мон валесэным,
коркаенымы, Музъемен
валче кытчы ке уллань васькисько.
Кышкаса синме усьтӥ
но, инбам суред ышиз, ачим
но усемысь дугдӥ кадь. Умме
чиптэм-чаптэм тӧлӟиз. Анаен
апайёс чыс-чыс шокало, песяй
соргетэ — ваньзы изё. Нокинлы
номыр нокыӵе уг йӧт. Педлон
пуныос уто, ӟазегъёс гагакто,
атасъёс чоръяло, ӟозъёс чиргето...
А ведь шуккиським ке,
ваньмыз со пыраклы чалмоз,
нош изисьёс уз но сайкалэ,
мар луэмзэ но валаса уз вуттэ...
Изьытэк мон огнам вань Музъемез
быремлэсь утисько кадь…
Но... котьмар ке но, кӧня ке
улыса, нош ик изем потыны
ӧдьяз. Выдӥ но синме кыньыны
кышкаса кыллисько. Нош
котькӧня пыкиськы, синъёсы
асьсэос кынисько ни. Синкабакъёсы
ваче вуизы но, мон
выльысь усемме шӧдыны кутски...
Ӵукна сайкакум пайми,
кызьы умме усиськем. Собере
котыр учки но шумпотӥ:
Музъемлы уй куспын номыр
луымтэ. Бакчаысь тыпыосы но,
льӧмпумы но — ваньмыз озьы
ик интыязы сыло. Озьы ке но...
сёровно кытчы ке усиськом
ведь. Кин тодэ, кӧня кылиз на
пазьгиськытозямы. Мыным
нош ик кезьырес луиз...
Табере лумбытэн-лумбытэн
озьы: я, шудон куспын
кайгуме вунэтыса, сюлмам
шумпотон кенже, я витёнтэм
шорысь со тёпак кысэ но шундыё
куазен пильмаське кадь.
Соку котырысьтым котькин,
котьма шоры мукет синмын
учкыны кутскисько:
ӝоген ваньмыныз соосын люкиськом
кадь йӧтэ, оло нош,
берпуметӥзэ адӟиськиськом
ини.
Та кайгуме эшъёсылы но
вераны турттӥ. Монэ кин ке ик
валалоз, дыр, малпасько вал.
Соку ми ваньмы ӵош куректысалмы.
Нош дэмен куректыны
каньылгес, шуо.
Но... ӧз, монэ нокин ӧз
вала — ваньмыз серем каризы,
йырад, пе, оломар кулэтэмез
вуэ. Ӧйтӧд, оло, валэктыны уг
быгатӥськы?..