ud#51 (25861)

№51 (25861)
6 2020-тӥ ар 30-тӥ толсур НУНАЛ БӦРСЬЫ НУНАЛ
Ивор куды
АЛНАШ
________
Интернатын
эскерон ортче
Алнашысь арлыдоослэн но инвалидъёслэн
интернатазы эскерон
ортче — та сярысь ивортэ Удмуртиысь
прокуратура.
Эскеронъёс радъясько отын урод сюдэмзылы,
утялтэмзылы ӝожтӥськонъёс Интернет пыр
вӧлмем бере. Ваньмыз пыр-поч чаклаське: кызьы,
маин сюдо адямиосты, кыӵе интыын соос
уло, сётӥсько-а майтал, ӵушконъёс, валес котыр.
Законэз тӥян учыръёс шараяськизы ке, кивалтӥсьёс
кыл кутон улэ шедьыны быгатозы.
БАЛЕЗИНО
________
Вормон вуиз
Балезино посёлокысь 2 номеро
школаысь 11-тӥ классысь
Алина Мусалимова 1-тӥ инты
басьтӥз Россиысь олимпиадалэн
Удмуртиысь люкетаз. Дышетскисьёс
кужымзэс мертазы быръён праволы
но куара сётонлы сӥзем олимпиадаын.
Отчы Удмуртиысь 70 пала пиналъёс пыриськизы.
Вормисьёс пӧлын Ижысь, Воткинскысь но Камбаркаысь
пиналъёс но. Пандемиен йырин соосты
шоркаре люканы ӧз быгатэ. Алина Мусалимоваез
вормонэныз ӟечкыланы вуылӥз Удмуртиысь
Быръёнъя валтӥсь комиссилэн секретарез Олег
Пырегов.
ВАВОЖ
________
Ваньмыз луоз
одӥг интыын
Итчи-Дӧкъя гуртысь пиналъёс но
дышетӥсьёс чидатэк витё выль
школалэсь усьтӥськемзэ.
1970-тӥ арын пуктэм школа
куашкан калэ вуиз но, кивалтӥсьёс шуизы: тупатъятозь
выльзэ пуктод. Вазен пиналъёс дышетскизы
4 юртын. Туэ, вуж школаез сэрттыса,
выльзэ пуктӥзы. Школалэн кивалтӥсез Валентина
Матвеева ивортэмъя, та вакытэ 3 гуртысь
(Итчи-Дӧкъя, Березек но Макарово) 180 нылпиос
тодон-валан люкало клубын, нош сиськыны
ветло колхоз столовое. Соин ик нылпиос 2 сменаен
дышетсконо луо, пиналъёс но дышетӥсьёс
жадё, кружокъёс но секциос бер ӝытъёсы ортчыло.
Выль школа 160 пиналлы чакламын, кылиз
на юрт пушкысь куд-ог ужъёсты йылазпумаз
вуттыны. Одӥг липет улын табере луоз
столовоез но, спортзалэз но.
ГЛАЗОВ
________
Вуылӥзы купечъёс
Глазове люкаськылӥзы Ижысь,
Казаньысь но Глазовлы артэ
ёросъёсысь «купечъёс» — ортчиз
Никольской ярмарка.
Вуз карон радъяськиз ӵапак со интыын, кытчы
вашкала дыръёсы пӧртэм интыосысь вуз карыны
вуылӥзы купечъёс. Со вакытъёсы сямен ик,
та рад но ма гинэ ярмаркае поттэмын ӧй вал
— чечы, шудонъёс, киужъёс... Озьы ик веръяны
луиз пыжем сӥль, кынмем вылэ — пӧсь чай.
Вуз карон дыръя ик ӝуатэмын вал Выль ар кыз,
вуылӥз Тол бабай, ортчизы пӧртэм шудонъёс, вожвылъяськонъёс,
адӟытонъёс. Озьы кин ке Выль ар
ӝӧк пуктыны басьяськиз, кин ке кӧттырмон шутэтскиз.
ДЭРИ
________
Кунооссы трос вал
2020-тӥ ар куспын ёросэ 76 сюрслэсь
ятыр туристъёс вуылӥзы.
Шаерысьтымы мукет районъёсын
сярысь, та лыдпус шӧдскымон тросгес луэ.
Угось Дэри котырын берло дыре гинэ калыклы
шутэтскыны пӧртэм интыос усьтӥськизы, кылсярысь,
Хаски гурт, пужей ферма. Ужало мӧйыослы
но, нылпиослы но чаклам туристической комплексъёс.
Ёрослэн йырыз Константин Русинов лыдъямъя,
таӵе вормон соос басьтыны быгатӥзы,
ёросысь экономикаез азинтонъя управление
ӟеч ужамен но туризмен вырись ужбергатӥсьёс
мыло-кыдо луэмен. Туристъёсты доразы
озьы ик кыскыны юрттӥз элькунамы ортчем
«ДаУР!» квест.
ИЖ
________
Кызъёслэн
фестивальзы
Киров нимо паркын усьтӥськиз
Выль ар кызъёсын адӟытонфестиваль.
16 чебер апайёс-кызъёс ӟеч мылкыд кузьмало.
Ваемын соос пӧртэм ёросъёсысь. Огезлэсь
пӧртэм мукетыз. Тужгес ӝужытэз — Эгра ёросысь,
ческытэз — Кизнер палъёсысь. Пыдъёсаз
гын сапегъёсын вуэм Шаркан палъёсысь. Сарапулысь
кызлэн йылаз 5 сэрего кизили интые
— стерлядь чорыг, городлэн валтӥсь пусэз. Нош
Вотка ёросысь вуэм кыз куасъёслы укша. Малы
куасъёслы? Малы ке шуоно Вотка ёрос — олимпийской
чемпионкалэн Галина Кулаковалэн
вордскем интыез.
ПИЧИ ПУРГА
________
Тылпу уз поты
Ёросын азинтӥське «Тылпу уз
поты» акция.
МЧС-ын ужасьёс адямиослэн тодазы
вайыто, ма кароно, тылпу
медаз поты шуыса. Валэкто, мар
кароно, горд атас пурӟиз ик ке.
Соос рейдъёсын потало гуртъёсы. Пожарнойёс,
кылсярысь, пумиськылӥзы Яган черкогуртын
улӥсьёсын. Ортчизы на куд-ог семьяостӥ, нимысьтыз
саклык висъязы оген улӥсь арлыдоослы,
трос нылпиё, секыт югдуре шедем семьяослы. Чаклазы
электроезъёссэс, мунчо гуръёссэс — ӧвӧл-а
лябӟем, пильылӥськем интыоссы. Куд-огезлы
дэмлазы тылпу потонэз шӧдӥсь извещательёс
пуктыны.
СЬӦЛТА
________
Егитъёслэн
кабинетсы
Выль Мӧнья гуртын егитъёслэн
люкаськон интызы кылдӥз, та
нуналъёсы со усьтэмын вал.
Гуртысь мыло-кыдоослы школаысь нимаз кабинет
висъямын вал. Сое егитъёс асьсэос буязы,
выльдӥзы. «Атмосфера» конкурсын вормем
уксёенызы отчы монитор, небыт пуконъёс,
ӝӧкъёс пуктылӥзы, ӝӧк выл шудонъёс вуттӥзы,
Интернет кыскизы.
Егитъёс азьвыл клубын пумиськыло вал, но
отын туала техникаез ӧвӧл, пе. Табере кытын
дырзэс ортчытыны уз ёрме ни. Татчы люкалляны
чакламын егит семьяосты но, соос понна,
кылсярысь, школаысь психологен пумиськонъёс
радъяськозы.
УВА
________
Йӧ вылысь уз пыралэ
Красное черкогуртын хоккеен шудон
коробка усьтӥзы. Проект быдэсмиз
Тимченкоослэн фондзылэн
«Добрый лёд» конкурсэзлы луыса.
Хоккеен шудон инты школа котыре
пуктэмын. Озьы ик татын конькиен нискыланы
быгатозы вань мылкыд карисьёс. Хоккей коробкаез
лэсьтыны грант чотын 998 сюрс манет вуиз.
Со пӧлысь 220 сюрс манет шыръяськиз, торгъёс
ортчытыку. Со коньдон мынӥз трибунаос басьтыны.
Табере хоккеез учкисьёс пыд вылазы уз сылэ
— липет улысь пластик пуконъёс вылэ интыяськозы.
Выль йӧ вылын кужымзэс мертазы ни пичи
хоккеистъёс — Красное черкогуртысь пиосын
ӵошатскизы Уваысь но Рябово гуртысь пиналъёс.
ЭГРА
________
Шумпотонэз сӥятӥзы
укылтэмъёс
2-тӥ ползэ ёросын ортчиз йӧ
скульптураослы сӥзем фестиваль.
4 нунал куспын мастеръёс йӧлэсь
ужъёс вӧлӥзы. Вань скульптураос
«Конёк-горбунок» выжыкылысь
геройёслы сӥземын. Соос вылэ яра тубыны, нискыланы,
шудыны.
Йӧ вандылӥсь воргоронъёс нимысьтыз мастерклассъёс
ортчытъязы пиналъёслы но. Озьы огъя кужымен
йӧлэсь кызъёс пӧрмытӥзы. Со сяна, Кибашлыослэн
юртазы ужасьёс пулэсь но кортлэсь кызъёс
пуктылӥзы, соосты гирляндаосын чеберъязы.
Кылем арняе йӧ городокез сӥё-дано усьтӥзы, табань
пыжизы, шулдыръяськизы. Нош 2 нунал ортчыса,
куд-ог йӧ скульптураосты изъянтӥсьёс шедизы
ни.
ЯКШУР-БӦДЬЯ
________
Эктон-степ
Черкогуртын улӥсьёс удмурт
крезьгуръёс улсын мугорзэс кыдато.
Фитнесъя тренер Лариса Закирова,
школаын дышетскыкуз ик,
котьмалы туж мыло-кыдо вал, «Чингыли» ансамбле
ветлӥз, удмурт крезьгурез кылэ ке, пыдъёсыз
асьсэос эктыны курисько. Соин ик малпаз сое ужаз
пыӵатыны. Удмурт шӧмъя фитнесэ трос калык люкаськиз.
Удмурт степез эктыны одно ик суйпоскес,
йыркерттэт но гетры кулэ. Мугорзэс куасалляло удмурт
крезьгуръя но удмурт сямен лыдъяса.
ЯР
________
Вунонтэм нунал
Биграгуртын (Дизьмино) усьтӥськиз
культурая юрт. Со
пуктэмын «Культура» нацпроект чотын 18,8
миллион манет тыр.
Кылем арын мартэ биграгуртъёс вазиськизы вал
Президентлэн приёмнояз, гуртазы выль клуб пуктыны
курыса. Со дырысен пуктӥськонлэсь мынэмзэ
чакласа возиз Президентлэн Приволжск
федерал округъя оскем муртэз Игорь Комаров.
Соин клубез усьтонын видеоконференция амалэн
вераськиз солэн воштӥсез Алексей Кузьмицкий.
Биграгуртъёсты ӟечкыланы вуылӥзы Удмуртиысь
Правительстволэн Тӧроез Ярослав Семёнов, культурая
министр Владимир Соловьёв. Выль сценалэсь
макем юн луэмзэ эскеризы, калыклы задор
мылкыд кузьмазы «Айкай» театрысь артистъёс.
Озьы культурая юртлэн усьтӥськемез гуртоос понна
вунонтэм кылиз.