05 от 11 февраля 2021 (25866)

№5 (25866)
26 2021-тӥ ар 11-тӥ тулыспал ЛЫДӞИСЬКОН СИГ
Роман
Кизили ныл
Фёдор Пукроков
Куинетӥ люкет
(Кутсконэз кылем арын потэм
46-тӥ-51-тӥ номеръёсын.)
Сашаен уромъяськонмы ӧз
пӧрмы, сямъёсмы милям чылкак
мукетэсь вылэм. Пумен валай:
пичи но курадӟытэк, азьло
ик ини ассэ нырысь интые пуктэм,
ма, солэн школаез ук та,
нош мон татчы лыктэм адями
гинэ... Озьызэ шӧдэм берам
сое гажан мылкыды ӧжытак
зӥбломиз. Озьы ке но соин
уромъяськыны турттон мылкыды
ӧз кысылы, весь, лушкем
осконэн ке но, сюлмам гыбдаса
улӥз.
Нырысь нуналъёсы мынам
дышетсконэ нокызьы но
ӧрзэ шедьтыны ӧз быгаты:
котькызьы тыршыса мадьылӥ
ке но, могантэк ӧз ортчылы.
Люкетылӥз мыным Сашалэн
мыняса шорам учкылэмез но,
дышетӥсьёслэн кызьы ке мылкыдтэкгес
шуод-а, чидасьтэм
мылкыдынгес шуод-а кылзылэмзы.
Асьсэ отличниксылэсь
верамзэ соос чылкак мукет
тусын кылзо, куд-ог янгышъёссэ
но оло шӧдытэк кылё,
оло шӧдыса но кылымтэ улэ
карисько. Юанъёс но солы каньыл
мылкыдын гинэ сётъяло,
зӥбон вылысь ӧвӧл, ӝутон
вылысь, нош мынэсьтым вольыт
веранме ӵем дыръя кыӵе
ке чыры-пыры юанэн куспетӥ
каро. Дышетӥсьёслэсь сыӵе вожан
сямзэс чик уг возьмаськы
вал. Мон гужембыт мылкыдме,
Сашалэн вогъёсыз вань ке, соосын
нюръяськыны дасяй, нош
дышетӥсьёс но асьсэдыз пинал
мурт кадь возёзы шуыса, ӧй но
малпа. Малы ке сыӵе осконэн
улӥ: дышетӥсьёс понна ваньзы
одӥг кадесь, пинал умой
гинэ мед мадёз; асьсэлэн-а со,
ӧвӧл-а, со ваньзэс одӥг кадь
шумпоттыны кулэ. Ми пӧртэм
школаосысь татын, выль
дышетӥсьёслэн кунулазы-бурд
улазы. Нош соос тӥни, ӟазеглэн
мурт тютюосты кагемез 1 сямен,
милемыз нырк каро...
Юри чаклай: мон макем умой
мадисько, сокем ӝожгес луэ соослэн
мылкыдзы, коть куты но
йӧн-йӧн дасяськытэк ветлыны
кутскы!
Тужгес но сак эскеро мынэсьтым
мадемъёсме директормы,
географиен дышетӥсь
но завучмы, историк. Пичи
гинэ янгыш лэсьтӥсько ке,
шумпотыса сямен кутско ук
сое погылляны, озьы но, тазьы
но берыкъяса, юанъёс сётьяны...
Мон вожме уг поттӥськы,
асме гинэ пыкылӥсько тырмыт
дасяськымтэе понна. Мукетъят
урокме дышетыкум ик ини,
син азям пуктыны вырисько,
кытысен монэ соос дугдытозы,
верамелэн маиз борды но кызьы
мертчиськозы, кыӵе юанъёс
сётозы. Туж яратымтэ темаысь
но мон, маин ке матын
палзэ шедьтыса, яратон темаме
сямен дасясько. Соин мон
котькуд мадёнме кутскисько
ӝутскем мылкыдын, веранэлы
вань визьме но сюлэмме сётыса.
Нош Саша яратымтэ темазэ
кызьы ке вылтӥяськысагес
маде, ас бордысьтыз палэнтыса.
Яратымтэ предметъёссэ
но со нырк карысагес куштэ.
Нош мон вань предметъёсме
одӥг кадь яратыны тыршисько.
Дышетӥсьёс но сое шӧдӥзы,
кезьыт мылкыдзы пумен няськаз.
Со сяна, мынэсьтым урок
валэктэмъёсме кылзыса, соос
вунэтылыны кутскизы, мон
мурт школаысь лыктэм маке
шуыса, куд-огез ымзэс усьтыса
кылзӥськылӥзы. Тужгес но
физикмы. Аслаз тодэмез трос
ӧй вал, куд-ог задачаосыз уг
но пӧрмыло. Луылэ вал озьы
но: огез солэн пӧрме, мынам
уг пӧрмы, мукетыз солэн уг
пӧрмы, мынам пӧрме. Саша
сыӵе ӵошатсконэ туж ик мылокыдо
ӧз пыриськылы.
Сашаен ми тани мар ласянь
но пӧртэмесь вал. Мон ӧй яратылы
дорам лэсьтэм ужъёсын
тетрадьёсме эшъёсылы сётьяны:
мар пайдаез задачаме чик
малпаськытэк кӧчыремзылэн?
Тетрадьме сётытозь, мон кӧня
кулэ валэкто, юа гинэ тон, мазэ
ӧд вала. Но ужпум тани мар
бордын: тросэз соос книгазэс
гинэ но ӧз усьялэ доразы, йырзэс
пичи но ӧз тӥялэ... Асьме
школаысь пиос дышемын вал
ини мынам сямылы, нош мукет
гуртъёсысь лыктэмъёс нырысь-валысь
ӝожтӥськылӥзы
мон вылэ, чурыт куртчем
шуылӥзы.
Саша вӧлак усьтыса сётъялляз
тетрадьёссэ, соин солы
йыбыртъясез трос вал. Котыраз
тросгес бергало бере, иське,
данэ но бадӟымгес, кожа вал,
дыр, Саша... Мыным сыӵе дунтэм
дан кулэ ӧвӧл. Яратӥсько
тыршись эшелы валэктыны:
муртлы вераса, ачим но мургес
валасько. Нош Саша, барин медоезлы
куасьмем нянь пыры
сэрпалтэм сямен, тетрадьёссэ
кисьӧрлань гинэ сётъя но
данъяськыса пуке: кыӵе, пе,
мон усто, быгатӥсь!..
Пумен мыным вазиськисьёс
тросгес но тросгес луыны
кутскизы, пиослы кельшиз,
лэся, мынам валэктылэме,
котыртыса кылзӥськылӥзы,
Сашалэн вожез потылӥз, тае
адӟыса. Монэ со серем но карыны
вырылӥз, но сьӧраз серекъясез
ӧжыт вал. Озьы пумен, чик
шӧдымтэ улсын, классамы мынам
интые юнмаз но юнмаз,
будӥз аслым ачим осконэ. Монэ
ӵемгес но ӵемгес нырысетӥ
интые пуктылыны ӧдъязы.
Нош вормон сярысь кылпум
поттылыны мыным вазь на
ай. Номырин вормонтэм шугсекытэ
мынам: уг быгатӥськы
нажимен гожъяськыны. Али
пиналъёслэн кызьы гожъяськемзы
шоры учкись ӧвӧл
ни, чистописание урокъёс ик
быдтэмын. Соин, лэся, тросэз
Туспуктӥз Максим ЕГОРОВ
нылпиос тетрадязы курег кукен
ӵабъям кадь гожъясько.
Нош мар со нажим, пастаен
гожъяськись адямиослы валэктыны
ик шуг. Тылы яке андан
перо шортӥз пилемын луэ.
Зӥбыку со вайяське, лэзиськод
ке, векчиёме. Нажимен гожъяськон
со таӵе маке: уллань
васькыку, зӥбиськод, гож паськыт,
чебер луэ, перодэ выллань
тубытыкуд лэзиськод, озьы гожед
векчи луэ, гожъяськемед
бырттэм весь кадь жигыль-жигыль
чебер адӟиське.
Милемыз школаямы нажимен
гожъяськыны ӧз дышетэ,
нош татын туж сак учко со ласянь.
Ӟуч кылын гожъяськемъёсам
одӥг янгышез луымтэ
дыръя но дышетӥсь мыным
«куинь» гинэ пуктэ. «Нажима
нет» яке «Где нажим?» гожтэ.
Нырысетӥ классын сямен, табере
выльысь гожъяськыны
дышетскисько, нуналлы быдэ
олокӧня час дырме быдтӥсько,
киме волятыны турттыса.
Нырысь мон сыӵе синмаськисько
вал Сашалэн гожъяськемезлы.
Малпасько вал, мон
ноку но сыӵе чебер уг быгаты.
Киы волямъя аслэсьтым быгатонме
шӧдыны ӧдъяй. Табере
мон Сашаез сутэм гинэ ӧвӧл, та
ласянь но ортчыны медӥсько.
Чакласа валай, со мултэсгес
зӥбе, соин куддыръя пероез
«сялӟыса» кельтэ. Мон ӧжытлы
гинэ векчигес карисько нажимме,
озьы ӝоггес но гожъясько,
тетраде но чылкытгес
луоз.
Кӧня ӝытъёсты пероеным
ӵаштыртыса ортчытъяй! Куддыръя
бер уёзь пукисько вал.
Киы сыӵе умой мыныны кутске
ини кадь, гожъяськеме
шоры шумпотыса учкисько, ас
синмылы оскытэк: «Зэм ик-а
та мынам?!» Нош собере отчы
ик ваньмыз куашка, быре, суйпыд
юскиське. Дышетӥсьсэ ик
адӟем уг пот ни, школазэ но,
адӟем уг пот Сашалэсь тетраде
шоры синпумтӥз гинэ кырыж
пальпотыса учкемзэ.
Мон Сашаез синазькыль
ӧй карылы: вылтӥяськись
луэмезлы ачиз гинэ янгыш
ӧвӧл, школазы сое сыӵе карем,
дышетӥсьёсыз сьӧраз
ортчытӥллям...
Пумен ӟуч кылын тетрадям
но огез бӧрсьы огез нырысь
«ньыльёс», собере «витьёс» адскылыны
кутскизы. Кызьы ке
огпол дышетӥсь мынэсьтым
тетрадьме ваньмызлэсь чылкыт
но чебер гожъямын шуыса
ушъяны шедьтӥз. Саша кӧд
кӧдэктӥз...
Табере мон котыр ласянь
азьпала потӥ. Дышетӥсьёс но
пумен вунэтӥзы «асьмелэн»
но «мурт» карон сямзэс. Азьло
Сашалэн лябгес верамезлы но
«вить» гинэ пукто ке вал, табере
солы но отметказэ вылӥгес
пуктэмысь дугдӥзы, «ньыльёсыз»
тросгес луыны кутскизы.
Сашаез мон пыд йылысьтыз
погыртон понна вормыны
ӧй туртты. Малпасько
вал, быдӟияськон сямзэ гинэ
ӧжытак пурӟыто но, уром кариськыны
шуыса, киме сёто.
Нош со, киме кутэм интые,
керӟегъяськыны шӧтаз. Пумен
осконэ бырыны ӧдъяз, таин
зэм но огъя кыл шедьтыны
луоз шуыса. Нош кыӵе умой
луысал, ми, кык кужмо дышетскисьёс,
ваче тупаса уромъяськысалмы
ке! Ми ог-огмес азьлань
но азьлань кыскысалмы
выльзэ но выльзэ тодон понна,
быгатымтэзэ но быгатыны дышон
понна. Нош озьы тӥни уг
луы.
Кема турттӥ мон Сашаен
матэ кариськыны, озьы но
выри, тазьы но. Нош одӥг учыр
бере валай: милям соин номыр
уз пӧрмы. Валам гинэ уг тырмы,
мон чылкак безӥ 2 солэсь.
Тазьы со луиз. Милемыз
«Быгы» колхозэ пырись Майсы
бригадае картошка октыны
нуизы. Та майсыос узыр
калык, зэм, тросэз татын чурыт
куртчем. Соос сярысь таӵе
вераськон но потэмын: кин
няньзэ туж векчи шоре, шуо
«Майсы шорем»... Бен ваньзы
ик сыӵеесь ӧвӧл. Мынам аслам
ӵужмуртъёсы отын вань, соос
кадь шырыт сямо адямиосты
уд тоды дунне вылын…