05 от 11 февраля 2021 (25866)

udmdunne.ru
+7 951 195 37 65
Мылкыдъёс
Лыдӟисьёс — лыдӟисьёслы
Йӧскалык печатьлэсь нуналзэ пусъемзы сярысь мылкыдъёссэс
верало «Удмурт дунне» газетлэн авторъёсыз.
ГАЗЕТ КОТЫРЫН
№5 (25866)
2021-тӥ ар 11-тӥ тулыспал 5
Кияса черкогуртысь
Геннадий Парфёнов:
________
— Шумпотӥсько, удмурт прессалэсь
нырысетӥ праздниксэ сыӵе сӥё-дано
пусйимы шуыса. 50 ар гожъяськисько
ни, таӵеез ӧй вал на. Огшоры гожъяськись адямиез но
сӥлы карыны быгато вылэм — мыным Россиысь Кун
Думаысь В. Бузилов депутатлэсь Таукаронзэ, Удмуртиысь
Журналистъёслэн огазеяськонзылэсь Данъян
грамотазэ сётӥзы.
Бадӟым тау шуэме потэ визь сынан шудон понна но
— тодон-валанмес но, логикамес но эскерим. Аслым
йылпумъян лэсьтӥ: арлыдлы сётӥськоно ӧвӧл, эшшо
тросгес лыдӟиськоно, котыр улонэн тунсыкъяськоно.
Дэри черкогуртысь Раиса Моторина:
________
— Туж бадӟым тау, таӵе ужрадэ
вуылыны мыным но кылдӥз шуыса.
«Удмурт дуннеез» 7-тӥ-8-тӥ классысен
лыдӟисько ни. Газет борды
бурмемын кадь потӥсько. Улон
кузя вамыштыны но со мыным юрттэ. «Удмурт
дуннелэсь» 100 арзэ пусъёнэ но вуылӥ вал, соку но
туж синмаськи. Таяз но праздникын шумпотыса но
данъяськыса пуки. Туж бадӟым тау «Удмурт дуннелы»,
валтӥсь редакторлы Зинаида Рябининалы, Кун
Кенешлэн Тӧроезлы Владимир Невоструевлы. Кун
Кенешын сокем сӥлы каремзы бере удмурт газетжурналъёс
уката азинскыны кулэ.
Пичи Пурга ёросысь Пуро-Можга
гуртысь Маргарита Тулбаева:
________
— Тауэлэ туж сӥлы каремдылы. Мон
уж дорам 35 ар тыршисько ни, но
тазьы монэ сӥлы ӧз каре на. Таӵе
ужрадэ ӧй ӧтьысалзы ке, ку мон Кун
Кенеше вуысал, Ижкарысь йӧлэсь лэсьтэм скульптураосты
адӟысал, Удмурт театрысь артистъёсын
фотое пуксьысал, газетын ужасьёсын но газетэ гожъяськисьёсын
тодматскысал! Малпасько, мон сямен ик,
мукетъёсыз но авторъёс ӝутскем мылкыдын доразы
бертӥзы. Азьланяз но ми газет лыдӟисьёсты тунсыко
зарисовкаосын, веросъёсын, улонысь учыръёсын тодматыны
мед быгатомы.
Гурт адями — 2020
Вуж магазинын — музей
Эгра ёросын Гыбдам (Сосновские)
Шорни гуртын
2019-тӥ арын пукон корка
усьтӥзы Вера но Пётр
Перевощиковъёс. Пулы
басьтэм коркаез тупатъяса,
выльдыса кузпалъёс
гуртоослы кузьмазы.
Вера Перевощикова ог 15
ар социальной ужась луэ, Шорниысь
но Мужберысь 9 муртэз
утялтэ-чакла. Бордаз ик ужа
Пётр Анатольевич мужикез
но, нялтас Мужберысь культурая
юртын лэсьтӥськись луэ
на.
— Гуртамы 100 пала улӥсез.
Милям номырмы ӧвӧл: клубмы
но, библиотекамы но, пичигес
магазинмы гинэ шат,
— вера кышномурт. — Нош
гуртоосмы шулдыръяськыны
ярато, ачим но калык
пӧлынгес улысал. Пересьёсынгес
ужасько бере, соослэсь
сюлмаськонъёссэс тодӥсько:
ӵош люкаськемзы, концерт
учкемзы потэ. Соин ужрадъёсты
учкыны 2-3 иськемысь
Мужбере пыдын поталлязы.
Жаль потылӥз пересь калык.
Мужикеным вуж магазинлэсь
юртсэ пулы басьтӥм вал. Малпай:
отчы пукон корка усьтыны
луоз ук! Ӵектонме картэ но
умоен лыдъяз.
Юртлэн коръёсыз уродэсь
ӧй вал на. Перевощиковъёс
асьсэ кужымен коркалэсь
вӧлдэтсэ, выжзэ воштӥзы,
пичияк сцена лэсьтӥзы, гур
пуктӥзы, юрттӥськизы гуртоос
но. Люказы на гуртоослэсь
вашкала пӧрткылон (ужан)
арбериоссэс. Корка пӧрмиз
музейлы. Ӝажыос вылын
горд сюйлэсь пӧртэм пумо
горшокъёс, варсь пӧзьтон
арбери, чильпам дуро вашкала
ӵушконъёс, етӥн сэстон,
черсӥськон машина,
керосин лампаос, кышномурт
но пиосмурт дэремъёс —
Эгра ёросысь Гыбдам Шорниысь В. Перевощикова
пукон коркаязы куно пумитаны дасяське.
ваньзэ вайизы асьсэос гуртоос.
Тужгес трос котырзэс
сётӥзы Лидия Шкляевалэн
(улонысь кошкиз ни) пиналъёсыз.
Шорниос корказэс 2019-тӥ
арын сӥзьыл пал, вань гурт
калыкен люкаськыса, сӥёдано
усьтӥзы. Коркае 30-40
мурт пала мыло-кыдо люкаськыны
кутскылӥз вал ини.
Ӵошен Выль арез пумитазы,
арлыдоос керттӥськыны, вуриськыны
потазы. Пиналъёс
но палэнэ ӧз кыле — прихваткаос,
салфеткаос вурыса
гуртоос пӧлын люкылӥзы,
кырӟан дышетыса, концертъёс
пуктылӥзы. Арлыдоос
пиналъёсты перепеч пыжыны
дышетӥзы. Шорниысь юртын
огдырлы велотренажёр
но кылдылӥз, соку гуртоос
пукон коркае мугорзэс кыдатыны
ветлылӥзы. Та арбериез
Вера Перевощиковалэн архивысьтыз
3 гуртлы — Мужбер, Гыбдам
Шорни, Чумой — кузьмаз ёросысь
депутатсы.
Праздникъёслэсь сценарийёссэс
пиналъёсын ӵош
дася ачиз Вера Перевощикова,
со ик палэнысь куноосты ӧтён
понна сюлмаське. Озьы гуртоос
дӥне вуылӥзы ни Эгралась,
Чутырысь, Мужберысь клубын
ужасьёс, кунояз Ижкарысь
кырӟась Виктор Бочкарёв.
Азьланезлы трос малпанъёссы
вал на, но ваньзэ сураз
коронавирус — корказы быдэс
ар буш сылӥз. Но алигес гуртоос
пичиен-пичиен выльысь
люкаськыны кутскизы ни.
Яратӥсьёслэсь нуналзэс — 14-
тӥ февралез — пусъёзы ни. Та
вакытэ Вера Юрьевна Мужбер
клубын Надежда Касаткина
дизайнерен радъям удмурт
дӥськут вуронъя дышетонэ
пыриське. Кышномурт «Булавка»
благотворительной
фондэн ӟеч кусып возе, отысь
гуртэ начар улӥсь семьяослы
дӥськут ваё. Сёто кылеммылем
басма юдэсъёсты но,
соосты Вера Юрьевна прихваткаос,
салфеткаос вурыны
кутэ. Отӥяз гуртоос понна вуриськон
сэрег усьтыны чакла.
Тэк пуконлэсь шорниос отчы
пӧртэм пумо киуж лэсьтыны,
дэрем вурыны поталозы, пе.
Гуртэ газ вуымтэ на, шорниос
пуэн эстӥсько. Пукон
корказэс но шуныт карон понна
Перевощиковъёс асьсэ пузэс
нулло. Тыл но кыскемын
асьсэ коркась ик, пукон корка
юртсы вӧзын ик сылэ угось. Но
гуртоос мылкыдзэс веразы ни,
тыл понна черодэн тыриськозы
шуыса.
Шорниын тыршись, огогезлы
юрттӥськись калык
улэ. Кылем арын ӵошен нылпи
площадка пуктӥзы. Трос
пудо вордо на, 3-4 семьяен
кариськыса, турын утялто,
дэмен секыт ужез вормыны
капчигес, пе. Вера но Пётр
Перевощиковъёслэн 3 пиналзы,
2-ез вузъёсын дышетско
ни, нылзы бордазы школаын
визь-нод люка на. Та адӟем карымон
семья котькыӵе ужрадэ
мыло-кыдо пыриське, семьяос
куспын вожвылъяськонъёсын
вормылэ, корка котырзэ чылкыт
возе, сяськаосын узырмытэ,
шуо соос сярысь гуртоос.
Вера Юрьевна Калыкез
улон-вылонын утён политикая
но ужъя министерстволэн,
Эграысь калыклы улон-вылонын
юрттэт сётонъя центрлэн,
Эгра ёрослэн Данъян грамотаосынызы
пусъемын. Кылем
арын Эгра ёрослэн Данъян пул
вылаз пыртэмын вал.
Гурт калык Вера Перевощиковаез
мыло-кыдо луэмез понна
«Гурт адями — 2020» вожвылъяськонлэн
«Ӟеч сюлэм»
номинацияз ӵектэ.
Данъя гурттэ,
бускельдэ!
Туэ «Гурт адями»
конкурсмес Гурт
удысъя но сиён-юонъя
министерствоен
валче
ортчытӥськом.
Вожвылъяськонэ 2 выль
номинация ватсам на,
озьыен, конкурс 5 номинацияя
мынэ:
«Устоез кивалтӥсь»
(хозяйстволэн, поселенилэн,
предприятиослэн-огазеяськонъёслэн
кивалтӥсьёссы);
«Ӟеч сюлэм» (гуртоос
понна ӟеч уж лэсьтӥсьёс,
волонтёръёс);
«Выжыоссэ утись»
(шаертодон, удмурт
лулчеберет удысын
тыршисьёс);
«Кивоштӥсь» (азинлыко
егит специалистъёс);
«Устоез гурт» (уртче-валче
кариськыса,
тупаса улыны быгатӥсь
гуртоос, улонэ пыӵатэм
кичӧлтонъёссы).
Данъяно адямиосты
гуртоос асьсэос
ӵектыны кулэ, редакцие
жингыртыса яке вотэсысь
группаосамы
гожтыса. Ӵектонъёстэс
кутом 1-тӥ южтолэзёзь,
собере ялом куара
сётон. Туэ, паласькись
висёнэн югдурез чакласа,
куара сётон Интернетын
гинэ радъяськоз,
кинюртэмъёс бичаны
кулэ уз лу ни. Юалляськоно
8-951-195-37-66
телефон номеръя (Ангелина
Снигирёва).