05 от 11 февраля 2021 (25866)

udmdunne.ru
+7 951 195 37 65
ЛЫДӞИСЬКОН СИГ
№5 (25866)
2021-тӥ ар 11-тӥ тулыспал 27
Ми малы ке малпаськомы
вал, ужаммы понна майсыос
сюдӥзы ке сюдозы ини адямилэсь
пӧртэм, гуртсылэсь
данзэ уз уськытэ... Нуназезэ
сиськыны лыктӥм но, милемыз
кӧжыпоген пумитало.
Ньылон ваменамы дугдэ ини
со кӧжыпог! Быгы бусыосын
ужакумы но, весь соин гинэ
сюдылӥзы милемыз. Нош ми,
узыр майсыослы юрттыны
шуыса, сокеме пыдын ведь
лыктӥм!
Гуньдылыса-гуньдылыса,
кызьы но озьы сиськеммы
бере ми, сирпогуртъёс, куспамы
пичи но вераськытэк, кызьы
ке беризь ышыге люкаським
но, нюке кариськыса, ужан
интыысьтымы шылӥм 3 — гурт
паламы шонтӥм. Эшъёсы малпало
вылэм, мон, отличник но
учкомлэн членэз, ваментӥсько
но ваньзэ сурало...
Компасмы ке но ӧвӧл,
бертӥмы азимутъя кадь,
нокыӵе сюрес вылэ потатэк,
тодмотэм шуръёс, нюлэсъёс,
возьёс вамен — пырак гуртмы
пала. Выльгуртэ но ӧм пыралэ,
куинь ар дышетскем школамес
адӟеммы туж потэ ке но вал.
Мон, оло, бертыны ӧй но
малпасал, кызьы ке но ньылысал
майсыослэсь таӵе «утялтэмзэс».
Соиз уката ӝож: Быгы
школаысь нырысетӥ дышетскисьсы
Саша Бугреев ӝыны
нунал но ӧз ужа, Бальзягурт
ваментӥзы ортчыкумы, бакча
бертӥз дораз пыриз но кылиз.
Нокин сое дугдытӥсь но, мар
но ӧй вал, озьы ик луыны кулэ
кадь.
Берло ми тодӥм — кӧня ке
балтачъёс но, гордъяръёс но
пегӟиллям. Ӵуказеяз ӵукна,
нырысетӥ урок интые, классной
час лэсьтӥзы. Завучмы
Гай Гереевич ну пыздыриз
ук лулъёсмес. Зол быгатэ вылэм
вераны, сюлэм пыдсы ик
мертчылэ, ява. «Кызьы тӥляд
возьытты тырмиз сыӵе кулэ
ужез куспетӥ карыны? Тӥ ведь
комсомолецъёс, милям вань
осконмы тӥ вылэ. Учке ай, соослы
сиён кельшымтэ. Нош
басьтэ Павка Корчагинэз, со
сютэм луыса вылысь кезьытын,
котын комсомолец луымтэ
егитъёслы оскон но пӧсь
сётӥсь тыл кадь пиштӥз азьпалазы,
бадӟым геройлыко уже
вырӟытӥз соосты. Нош тон,
Выльгурт школалэн нырысетӥ
дышетскисез, татысь учкомлэн
членэз, кызьы тынад возьытэд
ӧз дугдыты сыӵе йӧнтэм вамышлэсь,
эшъёстэ дугдытэм
интые, ачид валтӥд соосыз?!.»
Мон валасько, туж умойтэм
лэсьтӥ, зэм но возьыт, сютэм
ведь ӧз возе бусыын, пичиесь
ӧвӧл ни, сыӵеез гинэ валантэм.
Мон му пыр вияны дась вал
ини, дась вал ини, вань класс
азе потыса, кылме сётыны, мукет
ноку озьы уг ни лэсьты шуыса.
Огез гинэ возиз на монэ:
кыӵе кылъёс вералоз со Быгы
школаысь нырысетӥ дышетскисьлы,
кудӥз колхоз бусые
пыдзэ но ӧз лёгы. Нош завучмы
асьсэ дано муртсэс класс
азе гинэ но ӧз потты, Саша
пуке интыяз, мон шоры кылзэ
возьматъяса... Малпасько вал,
тани-тани дышетӥсь ӝутоз
сое, чурыт кылзэ солэсь но юалоз.
Ӧз, ӧз иса, милемыз интыямы
пуктӥз.
История урокын, литератураын,
классной часъёсын милемыз
дышето, дунне вылын
зэмлык понна нюръяськоно
шуыса. Нош тӥни кыӵе со зэмлык:
асьмелэсьсэ, кык полэс
янгыш ке но, исано ӧвӧл, нош
«мурт» адямиез ӵушкано озьы,
будьто ке со номыр адӟисьтэм,
номыр валасьтэм...
Ӧй, йырме кур ӧй кары мон
завучмылы, ас визьмыным
пусйи гинэ, кыӵе дуныз солэн
шонер кылъёсызлэн. Нош
Сашалэсь со дырысен безӥ,
уромъяськеме но ӧз ни пот...
Микаль, Тимур, Катя но
Галя турттӥзы на ӵош ветлыны.
Соос пӧлы но ӧз ни кыскы
монэ. Ӵем дыръя огнам
мынӥсько, огнам бертӥсько
вал. Мыныса-мыныса жадисько
но дугдыса кисыям пырисько.
Дуно синкышет борды киы
йӧтске гинэ но, суй кузям шуныт
тубе кадь сюлмозям. Со
гинэ на табере мынам буйгатсконэ...
Куддыръя уӵерак гинэ
мугорзэ но адӟисько кадь Вассалэсь,
но со сыӵе ӝог ыше, ымнырзэ
но адӟыса уг вуттӥськы.
Сашалэн лулыз ляб вылэм,
кыкетӥ интые кыльыса, со ӧз
быгаты ни ас интыез понна
чылкыт амалэн нюръяськыны,
вань кужмыныз дышетсконзэ
тупатон интые, олокызьы
но мыным пыдзэ пуктыны
вырылӥз, юнме шорысь трос
пӧсекъяз. Тулыс ваньмылэн
син азьысьтымы пумак усиз.
Тазьы вал со.
Одӥг ӵукна арнянунал
бере школае лыктӥськомы но,
дышетӥсьмы Гай Гереевич кулэм.
Со фронтовик вал, йырвиымаз
вир кисьтӥськыса, усем,
султымтэ ни... Озьы луиз: со
вакыт ик, йырвиымаз вир
кисьтӥськыса ик, Москваын
Сталин кылле вал луло но лултэм.
Нош милям дышетӥсьмы
тӥни шуак гинэ солэсь азьло
кулӥз.
Дышетӥсьмес ватыкумы,
нырысетӥ дышетскисьлы шуыса,
мыным солэсь сьӧд рамкаен
тусбуйзэ нуыны сётӥзы.
Сугым 4 сюрес кузя ми секытэн
вамышъям Бальзя гуртлэн
шаяз. Коросэз нуись вал гинэ
ӧвӧл, адямиос но небӟем сюрес
вылэ мур гуштылӥзы, мон гинэ,
азьпалан капчи портретэн
мынӥсь мурт, гуштылытэк вамышъяй.
Вань вӧсь каремъёссэ,
лэсьтылэм янгышъёссэ мон
дась вунэтыны дышетӥселэсь.
Секыт улонэз ортчем, ӵем
дыръя кулыса усьылэ вылэм.
Нош адямилэн мугор таза луымтэ
ни бере, лул но курадӟе,
уг быгаты ни со улон шоры
эркынак учкыны, висёнэз солэн
лул-визьмызлэсь марзэ ке
но сура, дуннеез со уг быгат
ни чылкак сыӵеен ик адӟыны,
кыӵе со вань. Туж умой вылэм,
дыр, сыӵе тазалыкен школае ик
лыктытэк, но ведь дышетӥсьёс
сотэк но уг тырмо.
Табере тани ми сое берпуметӥ
сюресаз келяськом.
Сыӵе малпанъёсам выйыса,
мон шӧдытэк кылиськем адямиослэсь
висъяськыса трослы
азьпала кошкемме. Мед сутозы
шуыса, дугдыса сылон сяменам
мышлань учки но калыклэсь
висъяськыса дор палаз
кошкись Сашаез адӟи. Куатаськем,
иське... Но ведь та картошка
бусые мынон ӧвӧл, адямиез
берпум сюресаз келяськом,
дышетӥсьмес. Тазьы учконо
ке, мон татысь кошкыны
кулэ: мыным ӧвӧл, Сашалы ук
со дурбасьтӥз, ассэ умойтэме
уськытыса. Трос кужымзэ но
визьзэ сётӥз, дыр, дышетӥсез,
сое школазылэн данъяськонэз
карон вылысь. Табере со
адями тани, дышетӥсезлы
берпуметӥзэ йыбырттытэк,
пегӟыса кошке... Мыным сыӵе
ӝож луиз дышетӥсе понна...
Кожытозяз синмыным келяй
мон Сашаез. Калыклэсь
гинэ висъяськыса ӧз кошкы,
улон сюреслэсь ик палэнэ кожиз
кадь. Бен со озьы ик вылэм
но.
Тямысэтӥ классэз мон «витьёсын»
гинэ быдтӥ. Сашалэн
кӧня ке «ньыльёсыз» но
потӥзы. Секыт вал солы отличникысь
ударнике потыны.
Солэн улэгес васькемезлы мон
чик янгыш ӧвӧл ке но, жаляй:
монэным тазьы ваче вуыны
ӧй ке кемдысал, со озьы ик
йырзэ урдыса ветлысал... Мон
валасько: урдэм йырын туж
кыдёке уд мыны, кытысен ке
но мар ке борды но канжаськод
яке алдэт гуэ усёд. Вазьгес
тазьы канжаськемез, оло,
умой но — малпаськонэ коть
усёз, выль сямен улыны кутскоз,
калыклэсь висъяськытэк.
Ӵапак таӵе йырзэс урдылӥсь
отличникъёсын сэрен ик кудог
адямиос мон шоры но тӥни
«Мактӥ Патӥ» шуыса учко. Зэм,
муртъёслы лулысь-сюлмысь,
вань быгатэмме сётыса юрттэмысьтым,
валамон карыса вераны
тыршемысьтым, тросэз
валаны кутско ини: мон чик
но вылтӥяськись ӧвӧл, нош
урокъёсме ӟеч отметка понна
гинэ умой уг дасяськы, ваньзэ
тодыны турттэменым...
Дышетскон арез йылпумъяса
но, мон гужембыт куректыса
ветлӥ, быгато на-а кайтаяз
но озьы ик умой дышетскыны,
мае ке валаны быгатымтэеным,
возьытэ уг усьылы-а
дышетӥсьёсы азьын, Саша
азьын, ма, эшъёсы азьын но:
куддыръя соос мон вылтӥ серемес
карысагес погыльтӥсько
ке но, урокме чот-чот, лад-лад
веракум, асьсэос ик ымзэс усьтыса
кылзӥсько, шара уг ке но
верало, мон шӧдӥсько данъяськемзэс,
пӧлазы сыӵе тодӥсь
но валась эшсы вань шуыса...
Мон трос малпаськи, кызьы
меда Сашалэсь вогъяськемзэ
дугдытоно, уромъёс ӧм но
ке луэ, эшъёс коть кариськоно.
Мыным секыт тазьы чик
янгыштэк мурт понна куректыса
ветлыны. Саша медаз
керӟегъяськы шуыса, мон уг
быгатӥськы ук урокъёсме юри
суп-сапгес дасялляны, быгатэмме
но юри йӧнтэмгес лэсьтыны,
тодэменым но тодымтэ
улэ кариськыны... Сюриз ук
висьымтэ йырам кышет!
Тазьы курадӟытозь, оло,
кытчы ке мукет интые дышетскыны
кошконо-а? Кооперативной
техникумын, пе,
кылсярысь, умой стипендия
тыро... Соиз, ма, умой, но ведь
соку мон нырысетӥ курсэ пырыны
кулэ, сизьыметӥ классэз
быдтэмъёсын ӵош: быдэс ар
дышетскемме, пересьёс шуэмзэ,
соку горд кунян нюлоз...
Я ини, шуи мон ас поннам, куректыса-куректыса
ке но, школаям
ик дышетско ини...
Укмысэтӥ классэ лыктӥм
но, Саша классамы ӧз ни вуы:
городэ кошкыса, кыӵе ке ФЗУ-э
пырем. Мон школаез быдтэм
бере вуоно араз бертыса, Саша
выльысь укмысэтӥ классэ пырем.
Со выльысь азьветлӥсе
потэм. Школазэ быдтэм бераз
солы институтэ пырыны
сётӥллямтэ ни, аресэз вуыса,
соку ик армие басьтӥллям.
Отын со ӧвӧл чидам отчы-татчы
кыскаса нуллэмзэс. Милям
гуртысьтымы ныллы кӧня
ке гожтэт но гожтэм, укыр
ӝожтӥськыса, ултӥямзэс уг чидаськы
шуыса. Собере солэсь
мугорзэ гуртаз узвесь коросэн
вуттӥллям — ассэ ачиз ыбем...
Кыллён музъемед мамык
мед луоз ини ойдо, Саша…
Мынам малпамея, школа
котькуд адямиез бадӟым сюлэмо,
вань шуг-секытъёсты быгатыса
пумитаны но чиданы
дышетыны кулэ. Нош асьме
школаямы со ӧвӧл, отын тодон
гинэ сёто, нош адями лулэз уг
кыдато.
Мон трос малпаськылӥ,
Сашалэн быремез сярысь кылыса.
Олокӧня пол син азьтӥм
ортчытъяй ӵош дышетскем
толэзьёсмес. Сюлэмы шуген
малпалляй: «Ваньзэ-а мон соку
лэсьтӥ, Сашалы улон сюресысьтыз
шебелянтэм вылысь?
Map карыны быгатысал на, солэсь
улонзэ тупатон вылысь?»
Бер мон вуиськем ини
Быгы школае. Витетӥ классэ
ик ке отчы сюрысал, сокем со
вылтӥяськись ӧй луысал на,
оло, ми соку уромъяськыны
но быгатысалмы. Син азе ик
пуктыны шуг, кыӵе тодмантэм
воштӥськысал милям соку
улон сюресъёсмы, улон сямъёсмы!
Саша но али улэп луысал,
мон но уромтэк ӧй курадӟысал.
Школа, лулъёсты кыдатэм
гинэ ӧвӧл, адямиосты эшъяськыны,
уромъяськыны но мед
дышетысал. Кыӵе узыр луысал
соку асьмелэн улонмы!..
Гай Гереевичез ватэммы
бере ӵуказеяз школае
лыктӥськом но, Сталинлэн
портретэз сьӧд басмаен котыртэмын.
Чалмем, иське, сюлмыз
«Быдӟым атаймылэн». Али ас
поннам кавычкаен верасько
та кылъёсыз. Павол кудо синъёсме
усьтэм дырысен мон палэнын
сылӥсь адями сямен
учкыны кутски сое мултэс
дунъямзы шоры. Мыным табере
зэм кадь уг пот ни, нуназезэ
Выльгуртын дышетскыса
вылысь, ӝытъёсы партийной
дышетсконэ ветлэме. Куатетӥ
классэ ветлӥсь мурт — партийнойёс
пӧлын! Соку ведь мон
комсомолец гинэ но ӧй вал
на, пионер!.. Кыкетӥ араз ини
мон, комсомолец луыса, вуи со
дышетсконэ…
Школае пырыса, учительской
дортӥ ортчисько вал но, ӧс
сьӧрысь вузыса ик бӧрдэмъёс
кылӥсько. Сое кылыса, мынам
сюлмы олокыӵе луыса кошкиз.
Мон, ас мылкыдъёсме
шарае поттытэк гинэ, лушкем
шумпотӥсько вылэм: «Ярам ай,
чоньдэмед, табере крестьянъёсыз
уд ни курадӟыты...» Нош
таос тӥни бӧрдо... Map ватонэз,
визьмо адями шоры ке ӧй
учырасал, таос сямен ик, мон
но али бӧрдысал. Дась визь
басьтыса дышетӥсьёслэсь но
вылӥегес ӝутскыны быгатэме
понна мынам йырме урдыны
эсэпе ик ӧвӧл. Но котьмар
ке но, жаль пото соос мыным:
асьсэзыз гуртын ваньмызлэсь
визьмо адямиосын лыдъяса
вылысь мон мында но соос уг
валало... Кызьы Быгыысь но
мукет гуртъёсысь калык, мон
уг тодӥськы, нош милямъёслэн
ваньзылэн пелязы вуэмын
Сталинлэн Ленинлэсь
кылзӥськытэк крестьян калыкез
кужмысь колхозэ пыртэмез
сярысь. Бен колхозэ амалтэк
пыртэмзэс нокин но валатэк
ӧз кыльы, нош Ленин озьы уг
лэзьы вылэм шуыса, ваньзы
ик уг тодо. Дышетӥсьёс гинэ
но тӥни. Нош милям гуртамы
тодо. Пред но бригадиръёс
сяна, отын бӧрдӥсез ик ӧвӧл,
дыр...
Кагыны 1 — жугыны, обидьыны.
Безыны 2 — сӥялскыны.
Шылыны 3 — пегӟыны.
Сугым 4 — лымы пуктэм.
_______
Азьланьтонэз вуоно номерын.